【職場心理學】4個就有1個中招!身邊有疑似患上抑鬱症的同事怎麼辦?
#職場 #上班族 #心理情緒 #抑鬱症 #焦慮症 #都市病 #減壓 #精神病 #情緒病返工有壓力係好正常,但如果壓力大到出現情緒困擾,甚至患上焦慮或抑鬱症嘅話,就要快啲搵專業人士協助!早排中大和新生精神康復會委託調查機構,調查咗一千個在職成年人嘅精神及心理健康,發現有四分之一受訪者有抑鬱及焦慮症狀,其中又以18至29歲年輕受訪者情况最嚴重,佔37%。同時有一半受訪者表示,就算自己有情緒困擾,都未必會尋求支援!(咁唔得㗎喎!)
(《丈夫得了抑鬱症》劇照)
抑鬱症的主要症狀
1. 情緒低落、煩躁、經常發脾氣
2. 悶悶不樂、失去對事物、活動的興趣,如運動、打遊戲機或以往喜愛的活動
3. 食慾不振、暴食或體重驟降/驟升
4. 很難入睡、拒絕起床、早醒或渴睡
5. 行動遲滯或說話/行為表現比平時激動
6. 感到疲累乏力或無精打采
7. 專注力下降、失去學習動機
8. 容易過份內疚、自責或覺得無人喜歡自己
9. 反覆有死亡、自殺念頭,寫遺書或把自己最愛的物件送給別人
(資料來源::醫院管理局)
所以如果你發現身邊有同事出現以上症狀,咁就要多加留神,有機會嘅話就不妨主動啲去關心下佢!(咪諗住自己打份工啫,因乜解究連同事嘅健康都要關心埋一份。衰啲講句,你嘅同事有咩事,最後搞到嘅咪又係你自己!)
唔識點關心?等小編畀啲貼士你啦~
如果你懷疑甚至發現身邊同事真係患上抑鬱症,記得記得,千祈唔好亂咁評論佢嘅狀態,包括話佢懶、自我中心、唔合群,或者工作能力低,因為咁樣做有機會加劇佢嘅抑鬱情緒,令佢更確信自己無能,甚至無生存意義。
(《一念無明》劇照)
以下分享三個「地雷位」,大家要小心啲,千祈咪踩中啊!
1. 輕率咁提供自以為寶貴嘅意見
要知道抑鬱症唔係普通嘅情緒低潮,唔係隨便叫人「諗多啲開心事」、「唔好喊」、「出嚟見多啲朋友」就可以解決,所以大家唔好太急,應該要細心聽咗佢哋嘅分享先,到揣摩體會咗佢哋嘅心情之後,再提出自己嘅意見!
避免講:
-「你諗開啲嘛!凡事都有正反兩面,不如試下睇好嗰一面?」
-「陣間放工咪返屋企鬱啦,跟我哋去happy hour,包你咩唔開心事都無晒!」
建議講:
-「你係咪有咩唔開心呀?我好願意聽你分享。」
-「你對我真係好重要,不如你話畀我知,我點樣做可以令你覺得舒服啲?」
2. 用責備嘅口吻
要知道對付憂鬱症並唔係一眨眼嘅功夫,就算患者有依時食藥都好,其實都需要幾個星期時間先會見效。所以喺藥物見效之前,患者可能仍然會無心力去參加任何活動,如果大家唔明白呢個係一個循序漸進嘅過程,而只顧一味責備患者無進步嘅話,只會令佢哋感覺更挫折,佢哋甚至會因為咁而選擇疏遠你。
避免講:
-「做咩又匿埋喺屋企呀?你一直咁頹唔得㗎喎。」
-「次次我關心你,你講嚟講去就係嗰個問題,唔解仲未識諗!」
建議講:
-「我知道你可能唔係好想出街,不如我哋一起去散下步,或者睇場你鍾意嘅電影、做啲你之前好鍾意做嘢吖,你點睇?」
-「你好似每朝早都有好難先起到身嘅情況喎,有無咩需要我幫忙嘅地方呀?」
(《超脱》劇照)
3. 用自己嘅經驗相提並論,看輕對方內心嘅痛苦
抑鬱症患者通常都會覺得其他人無辦法了解同明白佢哋嘅處境同感受,所以心裏面會覺得好孤單。呢個時候,佢哋最需要嘅唔係經驗分享,而係有同理心嘅聆聽!
避免講:
-「我之前捱得仲辛苦啦!你嘅問題簡直係微不足道。」
-「我明,我真係明喎,有呢啲問題好正常咋嘛,你唔好再鑽牛角尖喇!」
建議講:
-「雖然我無法完全體會你嘅感受,但係我好在乎你,亦都好願意幫助你。」
-「我好希望可以畀你一個溫暖嘅擁抱,等你可以好好大喊一場。」