職場

　　六月，又係香港各大專院校嘅畢業季節，意味住又有一班「小薯」即將投身職場！喂、咪住！邊個話學生一畢業就要返工㗎？話說近幾年工作假期（Working Holiday）愈嚟愈流行，唔少後生仔都會選擇利用畢業後一、兩年時間出走，體驗下呢種「寓工作於旅遊」嘅生活！

 

　　但其實Working Holiday並唔係畢業生嘅專利！小編相信，喺每間公司入面，都總會有幾個「小薯」發緊一個「Working Holiday夢」，只係佢地實際啲，諗住返多一兩年工、儲多少少旅費先出發！

 

　　不過面對林林總總嘅國家選擇，真係心大心細。究竟去德國好定法國好？去日本好定韓國好？但荷蘭好似都唔錯喎，仲要佢上個月先正式宣布向香港推出Working Holiday計劃……

 

　　好，一於等小編同你精選返幾個好地方啦！

 

1. 荷蘭

 

 

　　唔講唔知，原來荷蘭嘅單車數量比當地人口仲要多，名副其實係一個「單車王國」。喺荷蘭，好多打工仔都會踩單車返工，所以有興趣去嗰邊Working Holiday嘅，記得一定要練好自己手單車呀！

 

　　但大家比較需要擔心嘅係，荷蘭有唔少戶主都會列出「只限荷蘭人」或者「只限女生」嘅放租條件，加上當地留學生好多都要租屋租房（當地大學無宿舍，好多第三方合營嘅屋又經常爆滿），所以如果係男仔嘅話，睇嚟將會面對幾多爭屋對手！

 

年齡限制：18-30歲

名額：100名（2019年1月1日起實施）

最長逗留時間：12個月

 

2. 匈牙利

 

 

　　匈牙利首都布達佩斯有「東方巴黎」嘅美譽，仲擁有世界文化遺產──布達城堡和煙草街會堂（全世界第二大嘅猶太會堂）等名勝，啱晒鍾意睇文化歷史嘢嘅人！而且匈牙利當地實施五天工作制，由星期一至星期五，每個星期嘅標準工時係四十小時，周末去玩就fit晒啦！

 

　　不過匈牙利嘅法定最低工資只有約444歐元（大概4047港元），唔知大家知道後會唔會怕咗唔敢去呢？

 

年齡限制：18-35歲

名額：200名

最長逗留時間：12個月

 

3. 瑞典

 

 

　　好多人覺得位處北歐嘅瑞典又悶、又凍、又黑，不過好多曾經喺瑞典旅居，甚至做過嘢嘅人都會話，當地嘅工作文化真係「一級棒」，例如公司嘅上司、同事都會好鼓勵對方做好一件事，最重要嘅係，瑞典人唔鼓勵OT工作，絕對可以做到Work Life Balance！

 

年齡限制：18-30歲

名額：不受名額限制

最長逗留時間：12個月

 

4. 德國

 

 

　　德國除咗有強大嘅經濟實力，仲係個風景如畫嘅國家，公餘時間最啱就係去天鵝堡、柏林圍牆等參觀，仲可以喺啤酒節大玩特玩添！

 

年齡限制：18-30歲

名額：300個

最長逗留時間：12個月

 

5. 日本

 

 

　　被大部分港人喻為「鄉下」嘅日本，當然都係Working Holiday嘅熱門國家之一啦！曾經有人喺網上列出「去日本工作假期必做嘅10件事」，包括等超市特價時段搶購、參加花火大會、同同事返工後去居酒屋飲酒、新年時排隊買福袋、賞櫻花等。

 

年齡限制：18-30歲

名額：1500個

最長逗留時間：12個月

 

　　除咗以上五個國家之外，其實仲有新西蘭、澳洲、韓國、加拿大、法國、德國、愛爾蘭、英國、奧地利等合共十三個國家選擇！只要大家仲未超過35歲，都仲有機會資格參加Working Holiday，去其他國家體驗下人哋嘅生活！想知多啲有關Working Holiday嘅事宜，都可以參考下勞工處工作假期網站㗎！