職場

　　俄羅斯世界盃今個星期四開鑼啦！比起上屆嘅主辦國巴西，雖然香港同俄羅斯嘅時差唔算好大，但由於大部分焦點賽事都喺香港時間夜晚10時、11時或者凌晨2時舉行，所以唔少熱愛足球嘅打工仔，間唔中都係要捱更抵夜睇波。而有人為咗唔想第二朝再捱眼瞓返工，索性「射波」扮病同公司請假，搞到唔少腦細大呻頭痕，擔心影響工作進度。

 

 （《三個女人一個因》劇照）

 

　　而喺呢個時候，有間國際人事顧問公司就發表咗份白皮書《與你的團隊一起在世界盃中得分吧！》，指出員工投入度對提升公司嘅整體競爭力有著決定性嘅影響，尤其工作嘅自由度同彈性仲直接影響員工嘅去留，所以呢間人事顧問公司就鼓勵各大中小企業做個「順水人情」畀員工，等佢哋可以喺世界盃期間以彈性時間返工，例如有賽事喺凌晨2時舉辦，企業可容許員工下晝1時才開始工作，一直至晚上9時。咁樣做，一來可以成人之美，二來亦可以趁機會拉近同員工之間嘅關係、提高佢哋對公司嘅歸屬感，一舉兩得！

 

　　白皮書亦提到，除咗彈性上班時間外，畀員工喺球賽期間清理年假、以公司名義舉辦觀賞活動、舉辦賽果競猜投票，都係企業可考慮採用嘅做法。

 

　　不過小編最羨慕嘅係，巴西政府為咗畀民眾為國家選手加油，所以宣布只要國家隊有比賽嘅日子，公務員只需要返半日工，即係如果巴西隊嘅賽事喺當地時間早上舉行，公務員就可以喺下晝2時開工；如果比賽時間係當地下晝嘅話，公務員就可以喺下晝1時放工，真係超正！

 

　　揭下頁即睇香港直播安排、分組賽焦點賽事日期及時間！

 

1. 香港直播安排？

 

　　收費電視Now TV獨家播足64場，免費電視ViuTV播映其中19場，包括揭幕戰、分組賽重頭戲西班牙對葡萄牙、兩場4強戰及決賽。

 

2. 分組賽焦點賽事（*香港時間）

 

　　6月14日／晚上11時／俄羅斯 對 沙地阿拉伯（揭幕戰）

　　6月16日／凌晨2時 ／葡萄牙 對 西班牙

　　6月16日／晚上6時 ／法國   對 澳洲

　　6月16日／晚上9時 ／阿根廷 對 冰島

　　6月17日／晚上11時／德國   對 墨西哥

　　6月18日／凌晨2時 ／巴西   對 瑞士

　　6月19日／凌晨2時 ／突尼西亞 對 英格蘭

　　6月22日／凌晨2時 ／阿根廷 對 克羅地亞

　　6月25日／凌晨2時 ／波蘭   對 哥倫比亞

　　6月26日／晚上10時／丹麥   對 法國

　　6月28日／凌晨2時 ／巴西   對 塞爾維亞

　　6月29日／凌晨2時 ／英格蘭 對 比利時