職場

　　呢幾日係咁落雨，搞到唔少打工仔返工嗰陣都非常頭痕，唔係怕件衫濕晒罨住個身唔舒服，就係怕對鞋入水噏到對腳臭崩崩，天文台今日仲一度發出咗紅色暴雨警告……究竟場雨幾時停呀？

 

（《奇怪的搭檔》劇照）

 

　　話說小編噚日同同事食飯嗰陣，A同事問，聽日「8號」啦喎，有冇得唔駛返工呢？大家聽到A同事咁問之後，即刻反左個大白眼，人人唔係心諗就係明講：呢個gag已經搞到爛晒啦，咪再講好冇？

 

　　然後再一本正經咁問：究竟8號風球、黑色暴雨，駛唔駛返工？又有冇得早走？

 

　　「梗係有啦！8號波喎、黑色暴雨喎……」

 

　　「但員工指引好似話編輯部8號波都要返……」

 

　　「唔係紅、黑色暴雨都唔駛返咩？」

 

　　大家你一言我一話講完一大輪之後，都係冇結果，最後A同事用一句「算啦，香港有幾可打得成8號波吖」，終結咗呢個話題。

 

　　但後來小編發現，原來都有唔少打工仔試過喺網上發問：「黑色暴雨、紅色暴雨，打工仔有冇得早走？應唔應該返工？」

 

　　「如果返咗工，公司會點安排？有冇交通津貼？」

 

　　「冇返工嘅，會唔會畀公司當曠工處理？」

 

　　一於等小編話你知答案啦！

 

　　嗱，首先紅雨呢，就一定要照常返工嘅。至於黑雨呢，原來根據勞工處規定，如果黑雨警告喺辦公時間內發出嘅話，喺戶內工作嘅僱員要如常工作；而喺戶外及空曠地方工作嘅僱員就應該停止工作，仲要立即去安全嘅地方暫避，直到警告取消、天氣情況許可先恢復工作。

 

　　不過僱主亦可以因應員工嘅個人情況，例如住喺離島區、低窪地區等，酌情決定畀唔畀員工提早收工。

 

 

　　而如果黑色暴雨警告係喺辦公時間前發出嘅話，因為道路可能會有嚴重水浸，所以僱主唔應該要求員工返工；同時亦應照顧部分必須喺黑色暴雨警告生效期間返工嘅員工，例如提供接送服務，或發放特別交通津貼等。

 

　　要注意嘅係，如果僱主扣減員工年假、法定假期及休息日，嚟補償因黑雨而損失嘅工作時間，即屬違法！

 

　　最後，小編想趁機會衷心感謝──所有喺惡劣天氣下都依然默默緊守崗位嘅打工仔！

 

（天文台Facebook）