職場

　　打工仔最關心嘅一定係人工！唔知大家又知唔知，最低工資委員會舉行嘅最低工資水平公眾諮詢已經喺噚日完結咗？小編聽講，三大勞工團體要求將最低工資水平由而家嘅每小時34.5元，喺出年調升到42.5元，甚至44元……

 

 

　　香港物貴，係人都知。按照而家嘅最低工資時薪（34.5元），一個基層員工就算每日做足8個鐘，月薪都係得個大槪7千幾元，試問又唔夠生活！有位73歲嘅保安員（秋叔）都話，佢1990年開始做保安，5年前加入而家任職嘅保安公司，人工一直都係得最低工資，「一個仙都唔會多」，所以每個月頂盡都係得8、9千元，「深水埗一個飯都要45蚊，港鐵又加價，點承受呢啲壓力呢？」

 

　　工聯會話，如果時薪得34.5元，一個人返工返足6日，每日8個鐘，得到嘅人工比起一個兩人家庭嘅綜援金額連租金津貼都仲要少超過1000元，所以建議將最低工資增加至42.5元。而職工盟亦批評過往嘅最低工資水平滯後通脹，提出要增加到44元先夠！

 

　　不過香港環境衞生業界大聯盟召集人甄瑞嫻認為，提高最低工資就一定要帶動成本增加，通脹亦會一咁而上升，到時打工仔即使人工增加亦得不償失。而香港物業管理公司協會會長陳志球亦表示，如果增加最低工資，會對中小企嘅管理公司影響最大，因為人工已經佔咗佢哋營運嘅8成開支，一旦最低工資增加至40元或以上，估計每呎管理費需加1至2元。

 

　　身為打工仔嘅你，又係點睇嘅呢？小編就趁機會睇下幾個香港人比較熟悉嘅國家／城市嘅最低工資（時薪），當中竟然發現……

 

國家／城市：現時最低工資（時薪）

 

　　澳洲：18.29澳元，約13.75美元

　　法國：9.67歐元，約11.39美元

　　加拿大：介乎9.5至11加拿大元，約9.7至11.2美元

　　德國：8.84歐元，約10.41美元

　　韓國：7530韓元，約6.675美元

　　日本：介乎737至958日圓，約6.65至8.64美元

　　台灣：140新台幣，約4.8美元

　　香港：34.5港元，約4.39美元

 

　　而英國就比較特別，竟然係以年齡區分！25歲以上嘅有7.50英鎊（10.11美元），21－24歲就有7.05英鎊（9.50美元），18－20歲有5.60英鎊（7.55美元），18歲以下就得4.05英鎊（5.46美元），至於學徒與實習生更只有3.50英鎊（4.72美元）。