過往專欄

　　與朋友飯聚，最怕是夾錢上有爭拗。有網民指朋友帶外傭參加聚會，卻要其他人負擔外傭的用餐費，被批評做法「太Cheap」。有禮儀專家指，帶外傭隨行者宜主動付款，或預先安排工人進餐，避免計數時尷尬。

　　夾錢食飯，有人喜歡「一人請一次」，有人卻喜歡「AA制」。有網民指，自己及朋友均有聘用外傭，但朋友帶外傭參加飯聚，卻沒有支付外傭的飯錢。事主曾向朋友討回數目，對方卻表現愕然。帖文提及「你帶埋工人姐姐去食放題，點解會預你啲朋友要畀埋你工人姐姐嗰份？問你拎番工人姐姐嗰份錢，點解你會咁愕然」。

先了解費用問題 免傷感情

　　有過來人指，曾經遇到類似經驗，對方認為外傭「食量少，計錢好唔公平」。亦有僱主坦言，現在跟親友食飯會盡量不帶外傭同行，「除非諗住我埋單，如果唔係，都識做唔帶姐姐去」。大部分人亦批評事主的朋友太Cheap，直言「無責任要幫佢畀錢，如果幫佢畀咗錢，個姐姐會跟我返屋企打掃，我實畀」！

　　香港外傭僱主關注組召集人徐曉彤指，如帶外傭同行食飯，朋友大多不會計外傭的飯錢，除非是食自助餐，以人頭計算的形式。「若與不太相熟的人聚會，例如媽媽會搞生日派對，活動涉及逾百人，個個帶外傭出席就不得了，故大家會均真些，進行活動前說明如帶外傭，會計一人或計半個人的收費。」

　　徐曉彤認為，帶外傭出席活動，僱主要有心理準備多付一人的飯錢，「若活動搞手不計姐姐的飯錢，是表現體諒，也不代表每位會這樣做」。她建議參加聚會前，可探問籌辦者有關費用問題，避免因錢傷感情。

若為主人家 可主動埋單

　　專業商務禮儀顧問主席梁迦傑博士指，為免計數尷尬或被指「黐飲黐食」，僱主可安排外傭在飯聚前先行進餐，好讓她們在活動時專心照顧小孩。「如果自己是主人家，又帶著外傭，可主動埋單，表現大方些。」

　　他又指，假如朋友之間習慣食飯「AA制」，可輪流付帳，其他參與者便即時夾番錢。「遇上善忘的朋友，可等機會讓對方下次請客，如追（錢）得太緊，隨時導致友誼決裂。」

　　不論你係第一次升職做人上司，定係轉工空降到新團隊，都仲會經常感到不少迷惘。一時間唔了解自己應該站喺乜嘢位置、用邊種手法處事、有幾多空間發揮等等。就算長時間碰釘，都未必掌握當中概念。以下有三個新手Leader常遇到嘅錯誤觀念，有助反思自己如何管理團隊同工作。

單一領導風格

　　坊間有好多教學談及不同領導風格，每種風格都有其優點缺點。例如專制型領袖，習慣控制所有事情，事無大小都由一人決策。好處係因減少意見而令每事決策加快，如果團隊大多經驗不足，員工或公司／工種需經常處理變化急速事情，呢類風格亦相對地適合。不過缺點係員工自主性同歸屬感會好低，因害怕上司而對公司失去忠誠，同時有礙員工發展。

　　各種風格都有較為適用行業、公司、下屬等。但其實除老闆或高高高管外，大部分管理人員都難以單一風格走天涯。對一般打工仔嚟講，建議最好具備兩組風格應對上、下層。可先以下屬情況為優先考慮，根據不同下屬組合而採用一組多變風格，因材施教。之後再專門用另一組風格應對上層、老闆。以上方法好處係能有效發展各人所長，反之換來自己需具備多變嘅能力。並非要違背自己性格作另一風格處事，多變風格只係一個「難學易精」嘅起手點，但如慢慢活用多變風格，最後就能衍生出你獨有而強大的一套。

Change Management 不在於事情本身

　　做得Leader必然會面對好多轉變，公司轉變影響你同團隊之外，你嘅上任都係團隊轉變之一。好多公司、Leader處理Change Management 時側重於事件本身，而忽略承受事件嘅人。有調查指當，團隊面對轉變時，只得 20%員工會表示支持，50% 冇意見、跟大隊，30% 會非常抗拒而感到不安。其實大部分人並非唔想改變，只係佢哋擔心改變後對自己嘅影響。所以我哋除咗要喺Change Management 中多加入員工元素，亦要化解佢哋當中疑慮。盡量安排員工參與整個過程，同時要更著重溝通，唔好有「下屬唔需要知咁多」呢種概念。咁先能夠將Change 變成Chance。

遲遲唔做決定

　　傳統亞洲職場都有一個通病，就係「少做少錯，多做多錯」。害怕做錯，所以一係就做少啲，一係就唔決定「拖」字決。但其實唔做決定或拖住做決定，都係一種決定。而呢個處事模式，除咗會令你錯失好多機會之外，更會浪費有潛質下屬。就算下屬有不少想法，但都會好快被你感染，最後整個團隊變成零創新。公司愈大規模，呢個問題愈嚴重，亦係傳統企業永遠唔能夠突圍而出嘅原因。新手上路做上司，千萬唔好怕做錯決定，當然出錯並非好事，但錯誤都係進步過程之一，肯承擔先係重點。