過往專欄

　　《機動戰士高達》動畫，是不少男生的童年回憶。有港男便因花2萬元買高達模型「追夢」，慘被女友嫌棄，更有分手危機。有戀愛顧問指，問題不在於為嗜好花費多少，令女性缺乏安全感才是「戀情死症」。

　　買高達模型，竟令戀情告急？有男生在討論區求助，指早前瞞着女友豪花2萬元買高達模型，結果女友提出分手。帖文指︰「與女友本來計劃明年結婚，所以要開始儲錢，但我一直是高達迷，暗中買了不少模型。最近女友『查數』，發現我用了2萬元買高達，即批評我無諗將來，只願花費在自己身上，然後同我講分手﹗」

雙方應定下底線

　　帖文公開後，不少網友認為重點不在於花費多少，而是事主收入是否能支撑嗜好︰「你若儲了20萬元，那花2萬元買高達都有得拗。如果低收入，咁就抵死了。」另有高達迷認為事主花費十分誇張，直言︰「仲話打算結婚，工作1年便如此大使，邊有女仔肯跟你。」

　　Ms Mactching創辦人施言欣及顧問團隊指，若為嗜好付出的心力、時間和金錢超過正常指標，且影響他人，便屬病態，建議伴侶間應設定雙方能接受的底線，避免過火。

忌太投入嗜好 致忽視伴侶

　　婚介公司連戀愛顧問Joyful Matching負責人Joe Wong指，不少個案是女生不愛男友打機或砌模型，而與男友起爭執，問題主因在於相關嗜好令女方難以理解︰「男仔毋須戒了自己的興趣，但要懂得製造浪漫位，例如砌好一個模型便送花畀女方慶祝，以示沒有忽視伴侶；最忌太投入，不聽女方電話或不回信息。」

　　Joe續指，男女雙方起爭執，未必因嗜好或花費有問題，而在於伴侶未能量入為出，令人缺乏安全感︰「如果收入低仲花大量金錢在嗜好上，難免有不明智的感覺，或會令伴侶想分手。」他又笑言，男生若有令人反感的興趣，就不宜太坦白。

　　富三代鍾培生一向都高調兼言論出位，自信爆棚嘅佢身邊長期不乏女伴，日前佢就連登一啲「仇女」言論拍Reel，指係某啲港男嘅個人問題先識唔到女仔，又分享自己認為一個稱職男友嘅應有條件。有網民挑機問到有關佢外形嘅問題，都被佢嘅自信回應秒殺。

　　鍾培生喺片段中講到連登論壇嘅男性認為所有港女都係「雞」（意指港女貪錢），佢表示：「雖然有啲港女真係雞嚟，但我自己覺得一個男性30歲，起碼要照顧到自己條女（女朋友），你話廿幾歲啱啱grad，未搞得掂，可以接受；但你三十而立，你起碼（做）各行各位都有番咁上下（位置）啦。最基本，照顧條女衣食住行，尊重自己條女，就算你今日搞唔掂，起碼邁向可以做得到先啦。如果唔係學咩人溝女呀，返去打xx啦（意指自慰）。」

　　唔少人都反對鍾培生講法，指香港生活指數做到佢講嘅嘢都有難度，而佢係含金鎖匙出世先咁「口響」：「有爸爸， 你照顧幾多條女都得。」、「你有錢先咁講啫，衣食住行，最難就係住，租屋租成世呀？買樓又冇你咁有錢，我諗你咁講全香港4成男人都要靠打xx過日子。」鍾培生回應：「sad fact（可悲的事實）, 所以啲女去晒嗰60%度。」

　　另外，都有唔少人關心鍾培生嘅外形，因為以佢嘅財力絕對可以更加「四正」，但鍾培生就長期「爛面」，生暗瘡同埋佈滿凹凸洞，有網民留言問：「點解你溝到女，但係唔整吓自己塊面？」鍾培生自信留言，指自己係為咗「斬桃花」，令呢位網民都反駁唔到：「唔想太多女，所以我出街都已經唔gel頭，日日uniqlo。」