過往專欄

　　家用問題往往是家庭爭拗的導火線。有網民數算舅仔只給1,000家用，但外母除了買樓給他，又支付雜費，批評她太偏心。社工指部分長者仍然重男輕女，給家用視乎能力，子女也要調節心態，勿太干預父母運用金錢，否則造成家庭不和。

　　父母對子女「大細超」，難免會出現爭拗。有男網民訴說從事文職的舅仔，每月只給父母1,000元家用，但日日回家「黐餐」兼帶飯盒，所住單位又是母親買給他，事主認為外母對子女厚此薄彼，為此感不滿。帖文指，「咁多年來，我外母所有支出，電話費、家用、雜費，所有嘢都係我老婆出嘅……」。

部分長者重男輕女

　　有網民指其男友家有三兄妹，但男友母親對長子偏心，事事為他著想，對其餘兩個子女則不太關心。另有網民認為，部分家長會對經濟環境較弱的仔女照顧周到，而環境較好的子女，就未必會幫忙太多。亦有人批評事主是「塘邊鶴」，不應干擾外母一家的事。

　　香港長者權益協會總幹事李立航指，部分長者對弱勢子女偏護，的確會引起其他子女不滿。「曾有婆婆有一女一子，女兒當教師，兒子任散工，家住居屋由女兒供款，兒子每月只給一至兩千元家用，手緊時甚至向媽媽討錢支付生活費！」結果，女兒不滿媽媽偏袒弟弟，常在母親面前「單單打打」，令婆婆難受。

　　香港基督教女青年會督導主任蘇艷芳表示，部分長者重男輕女的傳統觀念難改，覺得兒子才是家族延續下去的人，女兒婚後有夫家照顧。「曾有長者不捨得食及去旅行，將子女給她的家用省下，為其中一名兒子供樓，引起其他子女不滿。」她建議子女給家用按能力而定，但長者對子女需一視同仁，子女亦不應對父母如何用錢干預太多。

家用分配不均損和諧

　　香港長者協會主席麥漢楷指，每位子女的性格不同，部分人或不計較，部分人或專「搵著數」，家用分配不均有損家庭和諧。「好像個案中的女兒給媽媽家用，媽媽見有錢剩，就用來貼個仔。過去亦有父母甚至借錢幫個別子女，令其他子女不滿。」他建議長者勿透露各子女給多少家用，即使生日或旅行等費用資助也不用透露太多。

　　不論你係第一次升職做人上司，定係轉工空降到新團隊，都仲會經常感到不少迷惘。一時間唔了解自己應該站喺乜嘢位置、用邊種手法處事、有幾多空間發揮等等。就算長時間碰釘，都未必掌握當中概念。以下有三個新手Leader常遇到嘅錯誤觀念，有助反思自己如何管理團隊同工作。

單一領導風格

　　坊間有好多教學談及不同領導風格，每種風格都有其優點缺點。例如專制型領袖，習慣控制所有事情，事無大小都由一人決策。好處係因減少意見而令每事決策加快，如果團隊大多經驗不足，員工或公司／工種需經常處理變化急速事情，呢類風格亦相對地適合。不過缺點係員工自主性同歸屬感會好低，因害怕上司而對公司失去忠誠，同時有礙員工發展。

　　各種風格都有較為適用行業、公司、下屬等。但其實除老闆或高高高管外，大部分管理人員都難以單一風格走天涯。對一般打工仔嚟講，建議最好具備兩組風格應對上、下層。可先以下屬情況為優先考慮，根據不同下屬組合而採用一組多變風格，因材施教。之後再專門用另一組風格應對上層、老闆。以上方法好處係能有效發展各人所長，反之換來自己需具備多變嘅能力。並非要違背自己性格作另一風格處事，多變風格只係一個「難學易精」嘅起手點，但如慢慢活用多變風格，最後就能衍生出你獨有而強大的一套。

Change Management 不在於事情本身

　　做得Leader必然會面對好多轉變，公司轉變影響你同團隊之外，你嘅上任都係團隊轉變之一。好多公司、Leader處理Change Management 時側重於事件本身，而忽略承受事件嘅人。有調查指當，團隊面對轉變時，只得 20%員工會表示支持，50% 冇意見、跟大隊，30% 會非常抗拒而感到不安。其實大部分人並非唔想改變，只係佢哋擔心改變後對自己嘅影響。所以我哋除咗要喺Change Management 中多加入員工元素，亦要化解佢哋當中疑慮。盡量安排員工參與整個過程，同時要更著重溝通，唔好有「下屬唔需要知咁多」呢種概念。咁先能夠將Change 變成Chance。

遲遲唔做決定

　　傳統亞洲職場都有一個通病，就係「少做少錯，多做多錯」。害怕做錯，所以一係就做少啲，一係就唔決定「拖」字決。但其實唔做決定或拖住做決定，都係一種決定。而呢個處事模式，除咗會令你錯失好多機會之外，更會浪費有潛質下屬。就算下屬有不少想法，但都會好快被你感染，最後整個團隊變成零創新。公司愈大規模，呢個問題愈嚴重，亦係傳統企業永遠唔能夠突圍而出嘅原因。新手上路做上司，千萬唔好怕做錯決定，當然出錯並非好事，但錯誤都係進步過程之一，肯承擔先係重點。