$1200 首爾勁食5餐放題
#首爾 #美食地圖香港人對Buffet毫不陌生，港人旅遊熱點首爾，以「無限Refill」作招徠的餐廳開到成行成市，無論西式自助餐、傳統醬油蟹、炭火BBQ以至新派韓食都有。今次推介5間由30多元至780元不等的放題，就算你胃口好到食晒這5大推介，價錢不過1,200元！
經過Viking's Wharf的燒烤區傳來陣陣飄香，令人食指大動。
第1站：樓上學生飯堂 餐單日日轉（HK$34/每人）
【第1站】醃蘿蔔、粉絲、魚乾、泡菜、菠菜、烤牛肉、豆芽，中間的豆糕和蛋角，全部家常菜。
【第1站】首爾學生（右）：「一碟就好滿足，不用refill。」學生（左）：「每星期都來兩次，好好味又平。」
經常路過弘大都無留意到呢間3樓飯堂，原來開業已經8年，除了學生和上班族識搵上門，日本遊客也多。Menu每天轉換，小菜選擇多，卻維持5,000韓圜任食的反通漲價，店主解釋原因是想令更多人吃得健康、無壓力，「店名『羅騰樹』也是象徵這份療癒、休息的力量。」至於味道，就像闖進了某個尋常百姓家「黐餐」，人情味濃於一切！
羅騰樹
地址︰首爾市麻浦區西橋洞347-18三樓
電話︰+82（0）2322-3323
營業時間︰11:30am-8pm（星期日及公眾假期休息）
交通︰弘大入口站8號出口，步行約4分鐘
第2站：韓系連鎖buffet 五花肉最正（HK$93/午餐）
【第2站】晚市的食品種類會比午市多，對款式有要求可以晚上才光顧。
【第2站】除紅豆煉奶沙冰、炸番薯，較有特色的甜品是覆盆子冰沙，酸甜醒神。
【第2站】首爾食客︰「好平，味道也很好，我們來過5次了」
要數韓國大眾化路線的西式buffet，不少港人都認識Ashley和高級版Ashley Queen，其實該集團還經營韓系放題「自然別曲」，其受歡迎程度更是有過之而無不及。自2014年創立，至今全國分店已設48間，首爾市內除光化門、弘大、新村、樂天世界等遊客熱點，明洞2街的分店可算是最「就腳」和「最多嘢食」之選。餐廳公關指，餐牌每年會轉7至8次，務求帶來新鮮感。人氣食品包括BBQ五花肉、韓風fusion的大醬意粉和晚市每桌一客的時令鍋物，春天一般是大醬湯、夏天是人參雞，冬季來便遇上花蟹海鮮鍋，以100多港元而言這是回本位！
自然別曲（明洞店）
地址︰首爾市中區明洞2街53-1四樓
電話︰+82（0）2318-0540
營業時間︰11am-10pm
收費：午餐93港元；晚餐133港元
交通︰明洞站6號出口，步行6分鐘
第3站：弘益醬油蟹 送煎餅鍋物（HK$107起/每人）
【第3站】醬油蟹鮮甜、幼滑，拌飯一流，不負醬油蟹的「米飯盜賊」之名。
【第3站】中蝦size的醬油蝦，連殼都醃到軟，酒味香濃，橙紅蝦膏香甜到眼凸！
【第3站】「無限refill」menu仲附送海鮮鍋、蒸蛋及泡菜煎餅，好抵食。
每次去首爾例牌吃一次醬油蟹，以往去開新沙洞一間名店，飲飽食醉閒閒地每人四、五百港元。今次這間「弘益醬蟹」，107港元起竟可做到無限時任食！問老闆點解可以做到咁平？他說一來是大批入手，取得批發價；其次他們家的蟹size較細，以公蟹為主，蟹膏呈黃色，而非大家見慣「大大劈」的橙紅色雌蟹蟹膏，所以能用最平的方法同大家分享，但味道跟新沙洞那些相比，其實並不失色！
弘益醬蟹
地址︰ 首爾市麻浦區城山洞232-12
電話︰+82（0）2-2323-1112
營業時間︰11am-10pm
收費︰醬油蟹+辣醬蟹放題107港元；醬油蝦蟹放題119港元；醬油蝦蟹+辣醬蟹放題133港元
交通︰弘大入口站1號出口，步行約8分鐘
第4站：弘大牛腸燒烤 韓妹至捧場（HK$147/每人）
【第4站】金德厚的牛小腸庫
【第4站】店舖由地面伸延至樓上2至3樓，門口座位有屋台風味。
弘大是「無限Refill」的聖地，而專吃牛內臟料理的「金德厚的牛小腸庫」向來是年輕人熱選，全國分店已有27間，連K-Pop男團VIXX都是捧場客。勢估唔到平日晚上7點未夠，弘大店已見20人排長龍，目測八成係韓妹。內臟同港式牛雜的味道好唔同，首先經過攝氏0-3度冰鮮的「自然熟成」後上桌再鐵板燒，肉質更彈牙、味道更厚重，特別是大小牛腸和牛百葉，前者酥香爆油，後者的肥厚軟熟！
Smart Tips：雖說入場價僅147港元，但Budget可預鬆少少，事關牛腸燒烤實在太適宜佐酒，不知不覺飲多咗（飲品13港元起）。
金德厚的牛小腸庫
地址︰首爾市麻浦區西橋洞 369-41
電話︰+82（0）707-592-0590
營業時間︰3pm-3am
交通︰上水站1號出口步行約5分鐘，或弘大入口站9號出口步行約8分鐘
第5站：龍蝦無限添食 海鮮選擇多（HK$780/每人）
【第5站】燒烤區搶手貨包括即燒牛油蜂蜜芝士龍蝦、鮑魚、中蝦和帶子，先在吧枱落order，服務員會畀個龍蝦形「call 機」你，龍蝦著燈時便可自取。
【第5站】Mozzarella芝士龍蝦加少少蒜鹽，味道並不濃重，至少食到兩份！枱上仲備有鉸剪同紙圍裙，方便進食。
【第5站】熟食區約有20款選擇，其中藥膳燉牛肋條無論味道同造型都精細。
【第5站】海鮮區提供金目鯛、劍魚、鱸魚、鰹魚等魚鮮，及來自鷺梁津漁的貝殼類水池，可即點即劏海菠蘿生吃。
780港元一頓自助餐，價位絕對稱唔上大眾化，但Viking's Wharf在首爾是又一「爆場放題」之選。蠶室本店的Booking已經去到1個月後，旺到剛於12月開埋永登浦新店。創辦兩年多，稱得上係韓國首間無限refill龍蝦的自助餐食肆，每星期三次空運進口的美國龍蝦，仲要一蝦兩食！食客入場，放低手袋，就個個直奔龍蝦長枱，先取清蒸開邊，同時去埋旁邊嘅燒烤區「掛號」，等攞牛油蜂蜜芝士焗龍蝦，實行食番夠本。龍蝦身長最少15cm，但兩種食法都不覺飽滯，於是我先K.O.一條清蒸、再連掃兩條芝士！
Viking's Wharf
地址︰首爾市松坡區Lotte World Mall四樓
電話︰+82（0）1644-3210
營業時間︰午市11:30am-3:30pm，晚市6-10pm
交通︰蠶室站10號Lotte World Mall出口，步行約5分鐘