過往專欄

　　港鐵沙中線醜聞不斷，今勻政府仲報埋警，引發刑事調查，港鐵終於有人問責「下台」！港鐵行政總裁梁國權「提早退休」、工程總監黃唯銘則「請辭」。至於佢話Ok就Ok嘅非執行主席馬時亨(肥馬)，暫時都仲好Ok，皆因獲特首林鄭極力挽留，只係未知年尾會唔會有得續約啫!各位讀者收唔收貨？Jenny就有保留喇！

因醜聞大地震 唔係第一次

　　今日港鐵宣布短暫停牌，以待刊發內幕消息公告，大家都估同近日層出不窮嘅早有關架喇!只係唔知關有負責內地業務高層涉嫌貪污事？沉降？高鐵？定沙中線事？到下晝Jenny陸續收到消息，原來係關沙中線事！而且仲會係高層大地震！

　　其實，港鐵都唔係第一次因醜聞搞到高層大地震。2014年港鐵被揭一早就知高鐵工程延誤，但就冇向政府同埋公眾講將延期通車，時任港鐵CEO韋達誠最終提早一年離任；時任工程總監周大滄亦於同年10月提早退休。

解釋唔到螺絲頭唔對數 政府一於報警

　　運房局率先開記招，發現港鐵在7月13日提交有關沙中綫紅磡站嘅工程報告，同之前6月15日提交嘅資料出現嚴重偏差，又冇依圖則施工，港鐵解釋皆因紅磡站幅連續牆頂部「難做」，所以改咗圖則，仲用少咗2000個螺絲頭添。

　　第一，唔跟圖則施工已經非常錯，更大問題就係既然用少咗螺絲頭，咁點解政府去咗咁多次地盤，同睇咗咁多次文件，都係話用咗2.35萬個螺絲頭，仲要全部有人簽名作實！唔通見鬼？

　　路政署署長鍾錦華直頭話「呢啲係小學生數嚟!」，問來問去港鐵都解釋唔到出現矛盾嘅原因，懷疑有人用假文書，事態咁嚴重，政府決定報警處理，仲講到明對沙中線管理層冇晒信心，要求解除相關人員職務。

沙中線管理層全部OUT!

　　轉個頭，相隔唔夠兩個鐘，港鐵亦都開記招，宣布重組管理團隊，換句話說即係有高層「人頭落地」啦!CEO梁國權宣布「提早退休」、工程總監黃唯銘則「請辭」，其餘高層呢？梁國權就答得好隱晦，只係話：「一位姓李、一位姓黃，同一位外藉人士」，其實唔使答成咁噃，上網一查沙中線管理層就知佢地分別係：沙中線及機電工程總管李子文、沙中綫土木工程(東西綫)黃智聰，同埋沙中綫土木工程(南北綫)胡宏利Aidan Rooney。

　　成日港鐵出事後第一個出來講嘢嘅肥馬，一直傳佢會宣布做到年尾唔續約就此ByeBye。結果又點呢？答案係:暫時仲有得留低！咁即係唔走、有得續約？肥馬就冇講明，只係話要等由佢領導嘅小組喺全球招聘到個CEO返來先講喎！

肥馬兩度請辭獲挽留 4次強調「有責任感」

　　肥馬話其實自己請辭過兩次架喇!第一次係喺7月6日立法會通過無約束力議案要求佢引咎辭職嘅第二日，佢向特首請辭，結果特首挽留佢;第二次就係噚日，知道個報告前後矛盾咁大劑嗰陣，但又獲特首挽留噃!所以佢就決定留低「體現問責精神」，執埋沙中線啲手尾喇。平常人重要嘅事要講三次，肥馬一於講足4次，話留低係「好有責任感」嘅做法！

　　肥馬好堅持港鐵制度冇問題，只係有人唔跟制度做事。Jenny就覺得，管理層就係要睇住下面啲人有冇行差踏錯吖嘛!小妹只知，唔係個個管理層都係好人，所以炒得快好世界啊!

　　暑假完結，立法會都仲有接近一個月先復會，不過呢個暑假對好多經營者來講，可以話係「寒冬」，唔少做零售飲食嘅朋友都不約而同話，今年暑假竟然係淡過淡季。的而且確，市面上不時見到有啲已經做咗幾十年、經歷過大大細細金融風浪嘅小商店都做唔住，「光榮結業」告示，街頭巷尾比比皆是。

暑假變經濟「寒冬」，民生區不難發現空置街舖。(Shutterstock)

　　港人北上熱潮、股市樓市低迷等等因素影響之下，問十個行業，有九行半都話吊緊鹽水，不過見到政府無乜表示咁，甚至過往大刀闊斧對中小企嘅扶持措施，例如退稅、百分百擔保等等，更加係買少見少。有政界中人就指出，香港經濟出現根本性嘅變化係不爭嘅事實，你知我知，當然特首都知，而財爺望住個庫房日日漏水咁款，好自然都唔敢投放大量銀兩去進一步扶持經濟。

　　「但如果經濟再咁樣差落去，好多民生區街舖十室九空都唔係辦法喎，依家行政主導，政府都係有責任㗎喎！」Tina提出呢個香港人都好想有答案嘅問題，而政界中人就解釋：「推動經濟發展，政府當然係有責任，但你要諗吓，香港樓市股市差係咪政府責任先？一向以來經濟都係有周期，就連內地樓市股市都係陣痛連年，特區政府高層呢方面可以推得一乾二淨！至於港人北上融合，根本就係阿爺所樂見，咁又點會怪罪特區政府呢？你有無見特首近一兩個星期講咗幾次商界要『升級轉型』，佢就係話畀你哋知道，唔好旨意政府再有乜嘢消費券之類措施去幫助經濟 ，商家仲係用舊思維去做生意一定唔掂，一定要睇住新形勢度新橋，咁先可以生存落去！」

　　睇番政府新聞稿，李家超上個月29日喺香港中華出入口商會經濟論壇同埋9月12日嘅廠商會90周年誌慶酒會，分別講到香港正經歷經濟轉型期，政府亦將繼續積極求變，同埋香港企業家一定能夠識變、求變，「升級轉型」以推動新產業、新模式、新動能。好明顯，政府嘅口徑已經唔會再提及點樣扶持企業，依家係要大家都「變」，以去適應新時代、新環境。

　　另外有立法會議員亦都指出，近排各大政黨已經唔再糾結於提及結業潮、空舖論，因為主旋律就係「有人漏夜趕科場」，一樣係有投資者來港做生意，應該用更正面嘅思維去面對逆境，而唔係一味指摘政府唔做嘢。香港一路走來都經歷過幾次升級轉型，確實每次都愈變愈強，學小超話齋：「歷史話畀我哋知，邊個賭香港長期差都錯。」咁惟有希望呢個短期嘅差好快就完結！