過往專欄

　　上個星期Jenny講到新一屆政府過咗三個月嘅「試用期」，特首同三位司長嘅外訪次數都唔少。特首林鄭出Trip次數最多，一共去咗9次；最少嘅就係成日要「署理」行政長官個位嘅政務司司長張建宗，只係返大陸兩次，仲要兩次都係即日來回，Jenny都覺得有啲唔抵，不過話唔定「打呔就興奮」嘅佢好Enjoy留喺香港呢！咁跟住落嚟Jenny又同大家睇吓各位局長嘅外訪情況又係點啦！

除左特首之外，仲有邊個咁頻撲?

聶德權8次外訪5次做「陪客」
 
　　經Jenny精心策劃、粗略統計之後，除咗特首之外，原來去得最多外訪嘅官員，就係政制及內地事務局局長聶德權，佢喺三個月內都外訪咗8次咁多！不過好彩佢去親嘅地方都唔係好遠，全部都係中國境內嘅。而且其實好多時佢都唔係主角，8次入面有5次都只係做「陪客」，陪「老闆」林鄭或者張建宗去外訪(其實係內訪)啫！

政制及內地事務局局長聶德權7至9月外訪日期、地點及日數一覽:

邱騰華飛定過英國等林鄭

　　除咗財政司司長陳茂波嘅單次外訪日數最多，有6日之外，其實商務及經濟發展局局長邱騰華9月去英國都一樣用咗6日，頭兩日就先飛定過去，參觀當地著名嘅設計同藝術學府，了解嗰邊嘅創意產業發展；之後4日就傍住林鄭出席宴會同會議等等。另外佢嘅外訪次數都有5次，係咁多位局長入面次數第二多，不過其實有3次半係陪林鄭去，拉勻嚟計都唔係好多啫~

商務及經濟發展局局長邱騰華7至9月外訪日期、地點及日數一覽:

劉江華默默出訪4次

　　至於「寧願一生都不說話」嘅民政事務局局長劉江華，Jenny唔查返資料都唔知，原來佢都默默地外訪咗4次；而食物及衞生局局長陳肇始同埋運輸及房屋局局長「帆哥」陳帆，都只係外訪咗3次；保安局局長李家超同創新及科技局局長楊偉雄仲少，得兩次外訪機會咋！

民政事務局局長劉江華7至9月外訪日期、地點及日數一覽:

食物及衞生局局長陳肇始7至9月外訪日期、地點及日數一覽:

運輸及房屋局局長陳帆7至9月外訪日期、地點及日數一覽:

羅智光留港密密做

　　不過低處未算低，因為有五位局長都係喺呢三個月入面出得1次Trip，分別就係環境局局長黃錦星、勞工及福利局局長羅致光、發展局局長黃偉綸、財經事務及庫務局局長劉怡翔同埋教育局局長楊潤雄喇！

　　楊局長上屆仲做緊副局長嗰陣，就因為前教育局局長、有「旅遊局長」之稱嘅吳克儉成日出埠，經常要「署理」，而家到佢要做局長嘅時候，都講過一個月一次外訪嘅機會「好細」，所以佢三個月嚟都係上咗去北京做禮節性會面；而財庫局局長劉怡翔都係得一次外訪紀錄，但其實佢都係陪同林鄭去英國，唔係做主角。

　　有人風塵僕僕，有人就留港埋首工作。Jenny就發現到，其實仲有一位局長係未有外訪紀錄，就係公務員事務局局長羅智光，不過呢個局又的確唔使點出埠，Jenny記得上屆局長張雲正2015年接咗手做局長，都係一年外訪兩、三次Only！

其他局長7至9月外訪日期、地點及日數一覽:

　　政壇震撼彈一個接一個，「罪郭詔」演變成中聯辦喺香港角色問題，再燒到政制及內地事務局三發新聞稿，改完一次又一次，從而再觸發「政府大膽違旨」嘅罪名。伴隨今次嘅震撼彈，傳聞即刻四起，包括港府將進行一次高層大換血。

　　Tina執筆之時政府仲未正式公布，不過傳聞名單之中，被撤換嘅包括民政事務局局長劉江華、公務員事務局局長羅智光、創新及科技局長楊偉雄，同埋財經事務及庫務局局長劉怡翔，呢個陣勢應該都幾準確。

　　Tina月前文章都已經交代添馬艦計劃局長大換血，提及過劉江華肯定喺名單之上，最終人選除以上四位之外，仲要加埋政制及內地事務局局長聶德權。傳媒消息指聶嘅位置會由入境處處長曾國衛接任，而聶就被平調至公務員事務局局長一職。添馬艦消息就透露，今次聶被平調，絕對係一次「意外」，本來並唔係喺林鄭嘅日程上面，「三發新聞稿單嘢，絕對係觸怒咗京官，令到中聯辦處於非常尷尬嘅局面，呢隻鑊點都要揹咗佢。」

　　不過消息指出，如果因為改新聞稿而將聶免職，會令外界觀感極差，「過去錯得更多嘅都未被人郁，如果跟返以前嘅論調去發新聞稿都係死罪，咁真係會嚇怕所有人才唔敢入政府」。所以將聶平調至其他局係較佳選擇，最終就揀咗公務員事務局局長落馬，聶平調過該局。

　　而今次整體換血之中，可以見到被換嘅大多係年紀稍長，劉怡翔今年已經70歲，楊偉雄65歲，劉江華同羅智光都係63歲。而傳聞接替人選就非常「後生」，好似傳接替劉江華嘅徐英偉，今年都係得43歲；傳接替劉怡翔嘅許正宇，亦都係4字出頭。林鄭今次換血，為班子帶來活力似乎係重點之一。

　　但喺現時嘅政治氣氛之下，咁大個金剛箍箍住香港嘅頭殼頂，空有活力又能夠跳得出五指山咩？