過往專欄

言歸政傳
11/09/2017

薯片向網紅進發 直播整餅又呼籲關注自殺

#整餅 #網紅 #逼逼青路 #問號黑人 #阿茂 #2 Hours For A Life #自己朋友自己救 #聆聽 #聆聽 #薯片叔叔 #自殺 #世界防止自殺日 #YouTuber

  大台日日鋪天蓋哋宣傳「逼逼青路」,希望可以捧到個「網紅」出來生金蛋,計Jenny話,大台如果夠「吉士」,其實可以考慮邀請有「薯片叔叔」之稱嘅前財政司司長曾俊華加盟,皆因佢出親片唔理內容係咩都都吸到Like,可謂收視保證。話口未完,噚日佢又出片喇!唔通佢真心覺得唔從政做YouTuber呢條路諗得過?定為儲人氣鋪路?

 

 

「薯片叔叔」趁住9月10日世界防止自殺日,一身黑衣呼籲大家付出2小時,關心吓自己嘅朋友。

 

自己朋友自己救

 

   Jenny上個星期先講緊「薯片叔叔」曾俊華落選之後,似乎轉投民間攻勢去拍片,個勢似想做「網絡紅人」或者KOL。不過,佢都係悠閒慣,所以出片都唔算密,結果啱啱好隔咗兩個禮拜,佢先玩直播整餅,再幫一間NGO拍咗段片叫大家關心身邊朋友。

 

  近日接連有後生仔女自尋短見,無論佢哋係咩身份、因為咩原因,Jenny睇見新聞時個心沉一沉,畢竟係一個年輕嘅生命就此消逝。噚日「薯片叔叔」就趁住9月10日世界防止自殺日,一身黑衣咁拍咗條分零鐘嘅片,仲分享咗喺佢自己嘅個人Facebook上面,原來係叫大家支持「2 Hours For A Life」呢個聆聽活動,呼籲大家付出2小時,關心吓自己嘅朋友,實行「自己朋友自己救」!薯片叔叔雖然淡出政壇,之不過仲係好留意社會嘅大小事咁噃!

 

再參選好「阿茂」?

 

  要做YouTuber,又點只拍片咁簡單呢?除咗佢嘅個人帳戶有新片之外,星期六仲喺個粉絲專頁到開live,同田少齊齊整餅。嘩!連直播都玩埋,薯片叔叔果然好緊貼社交媒體嘅潮流!

 

  話說薯片叔叔整緊餅嘅時候,有人就問佢會唔會(再)參選呀?薯片叔叔就答咗句:「好阿茂嘅問題!」Jenny聽完即刻問號黑人(下圖)上身,滿腦「即係點?」,依小妹解讀,唔通佢係話參選特首係「無嗰樣,整嗰樣」?即係佢跟本冇得再去選?

 

 

 

幾悶都有3000幾個Like

 

  咁近日佔據各大新聞版面嘅「民主牆風波」有冇留意呀?佢又唔肯答!淨係話今日係整月餅喎!好啦,再問佢會唔會應田少嘅諗法整返個「3JT」,佢都係避談,不過就將個波射咗落曾前主席到,「佢(曾鈺成)都話唔洗搞」,都算開咗吓金口嘅。之後仲拉埋特首林鄭月娥落水,叫佢來學整餅順便學埋「修補撕裂」。

 

  直播入面唔算有咩語出驚人嘅金句,而且都係睇住班大男人整餅,講真係幾悶㗎!但吸Like同吸心能力就極強,轉眼已3000幾個like、心心都有400幾個、嬲嬲就有2個。曾生如果有心做「網紅」有冇興趣去大台嘅「逼逼青路」度幫手呀?好過選特首啦!

 

 

兩個大男人整餅,都呃到3000幾個like

 

28/05/2024

東張西望何伯新何太直播咀嘴超恩愛!計劃生B爆:佢一日五次!自言能靠努力將450萬變成50億

#晴報文章 #娛樂 #抖音 #東張西望 #網紅 #林作 #影視娛樂

  《東張西望》報道76歲何伯跟後生30年的內地女人街市情緣,因閃婚而令何伯跟五名子女關係決裂,何伯更報《東張》聲討孻女將他的450萬積蓄從銀行取走。事件報道後,引起全城熱話,連「抽水王」林作都揚言要跟新何太傾合作,可惜兩人因銀碼問題談不攏而決裂。早前新何太抖音突發開直播,大送驚喜給網民,高峰期有幾千人一同觀看。

 

 

  新何太被揭發抖音賬戶後,不單止沒有刪走,反而勤力拍片更新,又經常親自回覆網民。何太早前預告將會在周三(29日)晚上10時直播,不過早前何太下午突然直播送驚喜,高峰時期更有幾千人觀看。新何太與何伯一同外出食晏,新何太主力面對鏡頭同回覆大家,更毫不在意一邊食一邊傾,認真親民,期間咀嚼聲之大,加上噴飯,被網民直斥「冇文化」。新何太直播引起不少網民食花生,期間她見到網友留言話見兩人法式濕吻先相信是真愛,即興跟何伯當眾咀嘴,這個時刻的Cap圖更是令「何伯&何伯老婆關注組」瘋狂洗版。

 

 

  新何太透露將會正式做網紅賺錢,預告之後的直播會開始帶貨,《東張西望》星期二晚會再度播出她與何伯的訪問。對於網民提到她有450萬就會走,何太繼續向何伯深情示愛:「點解會走呢?就算我老公窮到燶,我都會伴佢一世㗎!你明唔明呀?」何太還豪言指若果拿到100萬做生意:「幫我老公嘅家業越做越大。」又指若果何伯如果成功取回450萬:「交畀我去打理嘅話,我肯定好努力,將450萬變成4,500萬,變成5億,變成50個億都有,我個目標係要搵夠1萬億㗎!」

 

 

 

  新何太在直播中表示一早已經想同老公生BB,她更完全唔怕醜自豪話:「佢啊,一晚五次㗎!」網民留言斥新何太面皮厚,她正面反擊寸爆說:「如果我面皮唔厚,畀你哋咁攻擊法,點頂得順啊?係有啲厚㗎!」之後何太表示無帶後備電池,直播快將完結,更即場與老公咀嘴,咀到有「啜」一聲,笑得相當甜蜜。何太還直言何伯無老人味:「佢連一啲口氣都冇。」認真肉麻。

 

  而林作在IG公布跟新何太談判破裂,更力斥對方的態度令他憤怒,「睇完何太直播,我真係火都嚟!你話你唔同我反面,日後話唔定有機會合作?我做人敢愛敢恨,從不怕得罪人,我同你反面啊!等我又嚟做個直播,同大家分享你係點同我傾?睇下邊個係沒有誠意啲?PS 我個腎好好,絕對沒問題」

 

#食譜 #素食 #數碼營銷 #電影 #移民 #減肥 #創科 #Netflix #外賣 #辦公室貼士 #疫情 #在家運動 #WFH #抗疫不悶 #限聚令 #辦公室求生術
more on etnet.com.hk