職場

　　好多打工仔自覺成日唔夠時間用，除咗工作太忙、公司太多豬隊友、老細個腦太細之外，亦因為能做到真・時間管理嘅人唔多。而且不少人對時間觀都唔太了解，結果有再多時間也唔能夠完成工作。以下幾個對時間觀同工作效率嘅誤解，值得大家反思。學懂改善時間管理技巧，就算做唔到時間管理大師，都要學會用較少時間完成更多工作。

「有更多時間，先能夠完成手上工作」

　　首先要明白，如果係自身唔識好好管理時間，就算一日有 36個鐘，你都係唔夠時間用，36個鐘亦會出現36個鐘工作量。不免經常會感到，今日雖然時間好似鬆動咗，但後來又因出現相對嘅工作而變得好忙。歸根究柢重點係高效率，唔係時間多少；當做到高效率時，時間就會變得更多。所以唔係更多時間完成工作，而係更高效率完成工作。

　　要做到高效率有好多方法。老生常談，最先要學懂何時放棄。何時放棄工作質素、何時放棄某啲工作、何時放棄老細每一個要求等等。當然人人都想每件事情做到最好，但如果時間已迫爆時，只能放棄某啲事情。交由他人處理或用錢去處理，都係放棄嘅一種。不過點放棄都好，絕唔可以放棄自己底線，不然就會跌落忙死輪迴之中。

「親力親為係最好、最快」

　　職場上唔難見到好多高效率、高能力嘅同事，通常都係最忙一群，其中一個原因係佢哋傾向凡事親力親為。經常會覺得「我教得佢嚟，我做自己已經做完」，大多都係藉口。因為當你有能力嘅時候，你就有方法搵到對的人、做對的事。其實主要原因係呢類人往往缺乏安全感，一來唔放心交低工作，二來如果自己有太多空餘時間時，反而感到不安。最後習慣自己親力親為，習慣「忙」呢種感覺，沒完沒了嘅壓迫最後迫死自己。親力親為只能換來一刻嘅方便，要以長線嘅高效為目標先係真理。

「時間管理只在於管理工作」

　　好嘅時間管理同高效工作能力，只係助你完成工作嘅一種方法，係所有事情嘅第一步。最終目的係當你完成工作後，先能夠可以好好管理人生唔同事情。千萬唔好自己已經做到高效，而「搵野做」去填補每一個空檔。得閒冇野做，唔代表浪費時間。人生好多更重要的事情需要管理，不論係家庭、朋友，健康、興趣等，以上先係你嘅目標。緊記，100%填滿工作，並非充實人生。

　　如果你上司屬一位較為自戀或自我中心的話，咁佢哋好大機會都係冇乜安全感嘅人。同事工作事無大小都會干預一番，經常限制你開會時嘅發言，而且情緒變幻無常，決定一時一樣，令你工作寸步難行。其實上司對你缺乏安全感同拍拖好相似，永遠係相向，一方面係個人性格，另一方面係你能唔能夠比到對方安全感，以上兩點只要出現一點都會令事情失衡，最後情緒過份敏感下而做作好多過界線事情。如果面對毫無安全感上司，必先學會調較你上司，令佢冇咁擔心之餘同時令你工作得以正常運作。

　　一個人如果缺乏安全感，係好容易會無限惡化落去。第一日返工新同事如用咗佢最唔鍾意嘅文件格式，之後已經冇運行。所以當遇到呢類上司，首要任務係先唔好令佢病情惡化。喺適當距離下觀察根源何在，了解佢根源問題。意思並非指佢是否著緊文件格式還是溝通用字，呢啲只係佢無安全感下所作出嘅行為，並非根源於在。而指佢係咪擔心自己能力不足會被下屬取代，或者係老闆迫得太緊導致過份擔心工作出錯等等，了解後再嘗試對症下藥。

　　首先要明白，我哋好難估計做啲乜野事情會令佢情況惡化，著眼點反而係做啲乜野先會令安心。例如學習如何「做多少少」，嘗試做超過上司預期嘅事情，但又要拿捏得宜，唔可以畀佢得一想三。如上司原本只要你交一個計劃書方案，但其實最理想就係做兩個方案。當佢覺得有選擇或有後備方案時，佢就會對你信任度加強。雖然會加重工作量，但仍然值得作長遠投資。再者你交兩個自己早有準備嘅方案，能減低佢提出一個天馬行空念頭嘅機會。另一方面，你亦可以藉著比較兩個方案，去提高對你有利方案嘅成功率，一舉兩得。

　　另一樣較為被忽略嘅事情係，當公司/工作出現危機時你如何協助上司。無安全感嘅人雖然口硬，但心底裹其實好想有人明白佢，亦希望有一個真伙伴扶持。尤其喺危機處理時，無安全感會令佢哋更加徬徨無助。可惜大部分員工面對呢啲情況時會較為被動，怕自己講多錯多。其實主動面對、做更多功夫去幫助上司。畀佢知道你係一位賢臣，幫同陪伴佢渡過難關，而唔係乘人之危，就能把握時機去建立佢對你嘅信心。

　　下屬好難改變上司冇安全感嘅問題，但你可以較主動去迎合佢。用你自覺舒服方式去滿足佢嘅不安全感，總好過佢對你做出一連串過火嘅行為，而令關係惡化。