職場

　　「代服務」近年愈嚟愈盛行，相信絕大部分香港人都一定用過，例如外賣平台專人代客攞外賣，物流公司代客取件送件等等。代服務看似近年先興起，但其實喺約10多年前已經開始。早期有啲代服務係因應不同國家獨特文化而發展出來，而有部份就係代勞解決問題；亦有啲係純粹以娛樂為主，又有其商機。

　　日本早喺2017年開始興起代客辭職服務，代理公司幫客人向公司辭職同安排當中事宜。除咗向公司／上司交代之外，代理亦會幫忙處理辭職後嘅事，希望減少因辭職後同公司不和所產生嘅後續問題。現時代客辭職每次收費約數萬日圓，根據客戶工種及不同情況而定。雖然好多人覺得辭職係簡單事，但在日本文化當中辭職係一件較負面事情。因日本傳統大多公司使用終身僱用制，公司盡量避免解僱員工，打工仔亦會好少離職，同時打工仔怕離職後較難搵工。另一方面，就算真係好想辭職，日本人更會怕因自己離開而帶畀別人麻煩，經常到最後都失敗收場。以上種種問題底下，令呢類代理辭職興起。

　　除咗職場分手難，同男女朋友分手亦唔容易。看似電影橋段，但其實大約喺2000年代初已經出現「分手代理」公司。佢哋服務範圍十分廣泛，除咗最簡單代你電話或短訊與對方分手之外，更有面談分手同代送分手禮物的服務。而最特別是有公司更提供「勸退小三」服務。呢類服務技術含量較高，需更多時間執行，所以收費相對地高，可高達上十萬港元。其實分手代理喺不同國家都有其巿場，針對有錢客群為主，因有錢人較易吸引小三，正印不惜用錢去保護家庭。

　　早年國內開始盛行「代體驗服務」，收費幫客人體驗事情後，再報告真實用後感。其中一樣代體驗就係代飲／食服務，用家先喺餐廳／茶飲店網上訂餐，代理員就會到該餐廳代飲／食。代理員會即時拍片證實有真正用餐，同時亦會提供真實食評，令用家一同感受美食。雖然大家都明白代飲／食只係商家嘅噱頭，但仍有部分人認為，唔需要吸收過多脂肪又能享受美食，畀錢都係值得。

　　俗語話「時間就係金錢」，當富人愈富時，就會多利用別人時間去忙自己事情，所以近年代客攞外賣、代收件送貨等有其巿場。能幫別人解決時間問題，將來就會有更多代服務衍生而出。

　　YouTuber界近期發生咗較為少見食評炒車事件，當中有兩位YouTuber《有啖好食》同《點Cook Guide》馬田喺同日出片談及文苑飯莊嘅食後感。但兩條YouTube片食評各走兩極，不論食物味道、整個用餐過程待遇等都截然不同。兩位YouTuber稱今次用餐係全自費，並非餐廳方請客，影片內容全屬真實食評。

　　炒車事件發生後，餐廳營運總監更接受電台節目《在晴朗的一天出發》訪問解釋炒車事件。可惜營運總監嘅解話未能平息事件，其後馬田更再次拍片，利用當日錄音反駁餐廳方嘅解釋並非正確。另一方面，有YouTuber發現《有啖好食》影片中用字，同2023年明報一篇文章十分相似，被人質疑佢照抄鱔稿，並非真實食評。不同單位喺不同事情上嘅出錯，令事件繼續發酵。

　　當中有兩個要點值得留意同反思，首先營運總監喺不同情景上嘅處理手法。並非每間公司都有PR部門，但作為營運總監自行處理PR事件未必係最好方法。另外，其實餐廳方接受訪問或作出回應前，應先掌握整件事情100%真相。例如當日侍應同馬田對答、當日用膳過程細節、自己個人 / 餐廳社交媒體發文，以及不同單位嘅背景同影響力。仲有一點，營運總監嘗試將焦點轉向到「關房門唔俾入去，擔心唔知發生緊咩事」。「轉向」係PR常用伎倆，但要轉得精準先唔會被人發現。而今次轉向亦間接向對手「開火」，將問題轉到對方上，呢類手法會令事件走向「必有死傷」嘅局面。但因營運總監未能掌握大局，最後令事情愈描愈黑。

　　其實事件發生後，不論餐廳方選擇對外回應與否，都應該先主動同兩位YouTuber溝通。如同《有談好食》有合作關係的話，各自作出回應前應先了解對方回應切入點，避免出現二次炒車。而亦要同馬田平心靜氣商討事情，雖然馬田食評較為負面，但成熟地處理手法先能將事件傷害減至最低。

　　發生公關災難時，有時唔回應、保持低調可能係最佳方法。如選擇回應 / 道歉 / 反擊的話，反應快當然重要，但亦要夠準。唔了解會局就出招，隨時出現反效果。