職場

　　美國早年鉛筆生產商為咗令大眾知道，佢哋出產嘅鉛筆都以中國高級材料製造而成，所以用咗代表著中國皇室嘅黃色為主色。直到而家，約75%美國出產嘅鉛筆都以黃色為主，目的就係想以顏色同消費者嘅潛意識掛勾，令人想起黃色鉛筆，就自然聯想到好質素嘅原材料同埋其皇室氣派。

　　其實較多人／公司都會忽略咗顏色同品牌嘅重要性，早年有外國學者研究指出，顏色能夠影響顧客對產品嘅購買取向高達六成多。而大眾對品牌嘅「First Impression」，好多時都係以顏色為主導，更指出顧客第一次見到產品／品牌嘅首七秒係十分關鍵，直接影響佢哋對你長遠嘅喜愛度。

　　顏色看似係一件好小嘅事，但其實顏色同人喺觀感上嘅潛意識十分相關，亦係一種同品牌與人、人與人嘅溝通方式。常見例子，有好多快餐店都會用紅、黃兩色去做佢哋嘅主色。紅色喺亞洲地區除咗代表著喜慶、吉利之外，同時喺大眾嘅潛意識中代表愛、熱情、刺激、迫切等，能夠引起顧客食慾、肚餓意識，更能刺激食慾。而黃色就代表快樂、友善、創意等，觀感較易令人接受之餘，亦能比人感到餐廳嘅多樣性。另一方面，同technology相關嘅公司，就會多以藍色為主色，藍色代表著智慧、信任、和平等，有研究指男性較多喜愛深色系，女性就喜愛淺色系，而男性喺technology相關產品嘅消費比女性高，所以較多公司用藍色。

　　公司品牌以外，顏色對人嘅品牌同樣重要。因應不同場合，用上不同顏色去配合不同需要。研究發現，運動員比賽用嘅戰衣，紅色戰衣較易勝出，除咗係紅色能夠刺激該運動員自己之外，更可以刺激觀眾更落力為佢哋打氣，更有人懷疑，裁判有可能會偏袒著紅色運動衫嘅一方。

　　當政客或公司高管代表國家／地區／公司／自己出席公開場合時，男士都會跟據場合而配上唔同顏色嘅領帶，而絕大多數都只會用紅色或者藍色。以政客為例，紅藍兩色除咗代表政黨之外，亦係出席不同場合時「表態」嘅方式。例如紅色領帶代表進攻、熱情、權勢，而藍色代表冷靜、和平、信任，所以如果政客想彰顯權力時，多用紅色，如果係和談時，則多用藍色。

　　不論公司、產品定係個人品牌，其品牌構造包含咗好多元素，而First Impression永遠都係首要處理嘅事，因為潛意識會不斷影響顧客，不論係logo嘅顏色，字體圓邊定係起角，重要性超乎你想像。

　　疫情出現加上科技發展飛快，大眾開始以線上為主要消費渠道。除咗部分行業如飲食業、服務業等，其他行業線下消費或營銷活動慢慢失去其定位。所以近年部分企業都開始作不同嘅轉型，除咗將生意元素轉為O2O（Online/ Offline to Offline/ Online）模型，亦有企業完全地將線上線下定位改變，線上為消費主戰場，線下只作陳列產品等等。但一些較傳統業務嘅公司，就需另作對策。以書店為例，近年開始出現「多元化書店」經營模式，呢類模式看似成功，但事實上又係咪可以長線持續發展？

圖片來源：Unsplash

　　自網上文章同社交媒體盛行後，大多人只會網上睇免費文章或買網上書籍，嚴重影響實體書店生意。最後去書店只為預覽書籍，並唔會消費。數據指十年前後實體書店數目變化，中國、台灣、日本等亞洲地區約有四至五成書店已經倒閉，而人流亦大減約六成。但近年中國實體書店開始進行轉型，企業為書店加入不同元素，令其變得多元化、百貨化同體驗化。雖然倒閉潮持續，但國內過去兩年仍有不少新書店開業。

　　其實書店多元化、百貨化等轉型模式好早已經出現，而最為人熟識嘅例子必定係台灣誠品書店同日本蔦屋書店。以文青風格作為包裝，再將書店結合餐飲同其他零售，或舉辦各類活動同講座等等，變成綜合式書店。書店文青氛圍能提升其他商品格調，引流目標客群到書店內不同生意之上。

　　書店多元化慢慢變成趨勢，而其他傳統嘅生意都有朝呢個方向發展。跨業務生意雖然能增加收入，同時加強客群到訪書店嘅理由，但書店多元化模式亦有其限制。首先書店多元產品類別不能走得太遠，要配合書店本業或其文青氛圍，如果過分偏離就會令書店變成百貨公司或超巿，繼而巿場定位失去重心，影響長遠發展。另外，大多客群到書店逛主要因為其文青氛圍濃厚，產品只係其次。慢慢書店由賣書/ 產品，變成賣空間/ 氣氛，大眾鍾意逛呢類書店去感受氣氛，但又未到好願意消費，最後變成旺丁唔旺財。就算書店能聯乘不同大品牌開設Pop Up Stores（快閃店）或店內活動，但都只能短時間加人流/ 消費，活動過後就會打回原形。

　　書店喺新時代下轉型之路，對比其他生意嘅路更難行。加上大眾貪新鮮習慣，令一時間嘅成功難以持久。所以未來生意轉型呢回事，將會變成一場持久戰。