職場

　　你唔可以用錢買開心，但你可以用錢買一個機會去令自己開心。

　　記得，用錢只係有機會令自己開心，因為有時用咗錢，反而會操心。

　　有人一擲千金，用150萬比首期「上車」，但日日提心吊膽，擔心加息、擔心一日樓價下跌，變成負資產，或者擔心樓價一年內升唔到想要嘅水平。又有人用咗1萬5千蚊，請家人去上海旅行，縱使唔係豪華團，亦無入住六星級酒店，但旅程中家人嘅互動、互相取笑，一點一滴都足以令大家回味多年。有時洗錢多少同你有幾開心並非成正比。

　　賺錢只為自己獲取更多機會令自己開心。有啲機會，你知道比較大容易令自己開心，而且開心得更長久；但有啲機會，只會令你有短暫嘅快感。快感過後，更可能會有失落；有啲用錢買返嚟嘅開心只適用於某一類人，如果人云亦云地將錢投放喺別人認為嘅開心之上，到時錢又洗咗，又唔開心，只會total loss。

　　有一位法官喺哈佛大學向一眾畢業生致詞，有別於希望大家good luck、前程萬里，佢祝大家「盡快遇到惡運」。法官解釋如果一個人曾經遭遇不幸、曾經歷過不愉快事件，先會懂得何謂真正開心快樂、先會知道邊類型嘅開心最適合自己。你愈年輕遭遇不幸，你就愈多時間為自己爭取真正開心嘅機會，減少浪費時間、浪費金錢去換取短暫快樂。

　　工作無非兩大原因——餬口同埋賺錢換取機會比自己做喜歡做嘅事。了解自己真正喜惡，自然可以減少浪費花錢喺無謂事上。你又有幾了解自己？有咩事能令你真正開心？又有咩事能令你真正長久地開心？每日辛苦返工賺錢，係時候為自己檢討專屬標準。

　　人愈大會覺得愈唔快樂，以前簡簡單單嘅事情都可以好開心，但今日你再了解自己都好，做一啲覺得自己開心嘅事，開心程度都不及以前十份一。就算搵再多金錢、財務鬆動令你可以花錢換取快樂，但最後原來快樂度並唔會提高，反而可能帶來更多問題，令你更唔開心同感到更空虛。

　　玩瑜伽、camping 、打麻雀等，慢慢變得並非娛樂，而只係一剎那逃避。逃避辦公室海量工作、上司/客戶嘅脾氣、家庭財政壓力、父母伴侶對你各方面期望等等。漸漸知道人當去到某個階段時，發現快樂係會到達樽頸位。

　　其實長大後所有事情都唔能夠令自己快樂嘅原因，係因為身體到達某個年紀、心靈去到某個階段時，心靈同快樂就會出現落差，兩者調節唔到就會失衡。所有事情都已經有所變化，但自己就未懂得如何改變內心一向對快樂嘅睇法，繼續用舊有一套方法去追求快樂，唔懂得改變快樂來源、唔學習如何從新感受快樂核心。

　　唔同年紀有著不同需要，快樂亦一樣。例如讀書時同朋友食飯聚餐，最緊要係食得飽、坐得耐，一個價錢任食必定首選。但當出嚟做嘢後你對任食已經並非之前咁熱衷，反而開始著重食物質素，食一份A5和牛更勝多份普通牛肉。到你再大啲，有經濟能力時亦未必一定會去貴價餐廳，而係重視餐廳環境同朋友，一個能夠舒服暢談嘅地方變成基本。

　　年紀愈大，愈多人生負擔，掣肘會隨著年紀而增加，做每一件事背後都有一百個考慮。不能用同一個價值觀、做多年前同一件事換取快樂，因為不同掣肘會大大減低快樂度。首先要明白，以前會將娛樂就等同快樂，但大個後快樂未必等於娛樂，娛樂只能令你得到某種感觀上嘅享受，但並唔係唯一快樂來源。嘗試新事物、學習新技能、去新地方、擴闊視野，對事物產生好奇心亦能得到快樂。 雖然學習嘅新技能未必係你最喜愛、接觸嘅新地方未必係你常去，但正正就係要跳出多年嘅框架，才能有新感受。

圖片來源：Unsplash

　　慢慢會意識到快樂來源其實十分簡單，每一件新事情都係快樂開端，經歷任何事都能有其樂趣。香港打工仔返工時間佔多，工作雖然辛苦同呆板，每日對住同一個唔開心嘅環境，難免感到厭倦甚至難以呼吸。如果唔能夠轉工，可以嘗試將書枱大執位、揀一條新路線返工放工享受路途中嘅新光景、工作上學習其他部門嘅事，或放工後學習同工作無關嘅事情，都能令你對生活再次燃起心中嘅一點火，為工作嘅苦加上一點甜。