財智

　　乜叫散戶？即無權無勇無財力加上無知識，但就烏卜卜夢想發達，以為可以刀仔鋸大樹，學人走入金融世界「投資」。簡直似群水魚自動游入大鱷血盤之口，唔吞你就唔正常啦！

金融世界中的散戶與大戶，恍似森林規律中的水魚與大鱷。

　　一如賽馬，所有散戶投注者，乜都無得決定（操練、餵料、出擊timing、點跑⋯⋯），擺明你在光幕後人在黑。此外，更場場未開閘已被大莊馬會抽兩成水（納稅、善款及行政費用），如此不利形勢下，你仲想贏？有無食錯藥？

 股市與馬場皆賭場，散戶想從中發達，完全是個夢。

　　近日小弟四出做退休分享會，正正盡力揭露散戶未知的金融世界險惡，希望救得一個就一個，以免佢哋一時貪心或無知，連棺材本都蝕埋，晚年坎坷，搞到要食綜援，咁就該煨。

　　我點解知咁多金融圈污糟手段？無他，因30多年前「誤墮塵網」，入咗間倫敦金公司做經紀，親身見證班「大賊」點樣用合法與非法手段去劏客，總之，當客人一簽下授權書（藉口為：「你無咁多時間睇住個市，畀我替你揸盤，好易捕捉到賺錢機會㗎！」），就即變水魚，合法劏你的，就是不停替你買入賣出，賺盡佣金。

　　非法的如何？布局更精。首先，經紀自己也開一個戶口，然後，不停買賣，無論金價升跌，賺的，就入自己戶口數，蝕的，就篤入客人戶口，只要佢預早與盤房打龍通「分贓」即掂。到你發覺被騙時，也難追究，鬼叫你簽下授權書，咁就上法庭都告唔入。

　　呢種手法，其實不少基金經理都有用，不過，無班倫敦金「大賊」咁狼胎。

倫敦金行騙，可以合法，可以非法。

　　爆多單散戶儍吓儍吓被劏安排。但凡有公司上市而你去認購，就是水魚！

　　大家可記得，90年代中開始，大量國企排隊上市？當時，勢頭極勁，因散戶憧憬買國企或紅籌股等於賺硬。點解？因國際證券大集團慣技，上市前創作一個極度rosy的故事（玫瑰園式美好故事），然後，花大量金錢賣廣告及組織「股票分析/評論員」合唱團，唱到隻股天花龍鳳，令小投資者以為一買就發達，唔認購正豬頭。

　　未夠未夠，國企幕後班大孖沙，更會利誘（當然天文數字！）幾位香港有頭有面的超級富豪，邀請「入股」，借個名畀上市公司用，作「形象式站台」，以進一步加強信心及影響力。

　　若大家有記憶，應知90年代至2000年代中，上市的大紅籌及國企，間間排晒長龍認購，一上市立即炒到飛起，之後⋯⋯之後點？你有興趣知，可以睇睇所有呢類集團的股價走勢圖，上市至今，似唔似過山車？

大戶上市，造勢成功，散戶水魚排隊入籠，中港皆如是。 

　　每次有公司申請上市，不少散戶都會戇居一次，以真金白銀預先過數、蝕息，然後可能只分得一手。但「借名富豪」又如何？從不用過戶任何錢去申請，指吓個鼻哥就當認咗，然後，真正上市時，才一手交錢一手交貨。

　　呢類公司，例必有晒部署上市即狂炒一轉，吸引散戶慌怕執輸行頭，紛紛高追。而借名造勢的富豪，當然無咁蠢揸貨，必定在高位仙女散花，乜都唔使做就賺三幾億。豬仔們，你哋明白未？

　　古語有云：道不同，不相為謀。

　　人人皆有選擇朋友的自由，啱傾，俗語形容「啱嘴形」，走埋一齊，關係即似水乳交融，大家快樂。

飲食是人生一大樂趣，故此，「飯腳」必須能似水乳交融！

　　小弟做人極度崇尚自由，尤其退休後（即從正職工作退下），即實行delete大法，唔想見的人唔見、唔想做的事唔做，舒服晒！

退休後，我將不想見的人、不想做的事全部delete，舒服晒！

　　咁，我想見乜嘢人呢？能大家互相感染快樂的人，尤其有共同價值觀、共同嗜好、共同品味⋯⋯共同語言。

　　共同語言重要，因大家交往，尤其開開心心食餐飯，若語言不通，好難真正享受，因有礙溝通外，更怕異地人以為你背著佢講乜（負面嘢）。

　　故我堅守原則——食不同，不相為謀。

開開心心飯局，不宜談政治及宗教，只宜分享親情、友情、旅遊、藝術、音樂、電影⋯⋯及美酒美食帶來的快樂。

　　食飯組合，俗稱「飯腳」，對每餐飯的化學效果，極重要。當然，最理想是政治觀及宗教觀大家相若，有共鳴感。若不，也可來個君子協定，進餐時不談政治、不談宗教，專心欣賞食物之餘，也可討論人生其他範疇，例如親情、旅遊、運動、藝術、電影、音樂⋯⋯

　　有一類人，小弟堅拒相交，正是「食不同」者，即飲食習慣無法融合的一類。

　　對於飲食，我一貫以開放態度處理，不濫食，也絕不偏食，總之凡美食皆百無禁忌，來者不拒，因能嚐天下美味乃人生大樂事！

　　故此，最怕遇上「凡事驚」的一類。尤其一坐低，未上菜已散布恐懼，私人拿出火酒抹布，乜都消毒一番。

最怕與「消毒狂」進餐，乜都驚餐懵，毫無樂趣。

　　然後，遇上任何食物，都第一時間指出其害處，勸大家咪食咪飲，包括：（一）任何酒類，害肝；（二）任何汽水，引致肥胖糖尿；（三）肥美元蹄，令膽固醇急升；（四）煎炸食物，高熱量、高脂肪，令蛋白質、維生素及礦物質受破壞，帶來肥胖及三高；（五 ）內臟靚湯（豬心豬肺豬粉腸豬橫脷）帶來嘌呤(Purine)，導致尿酸及痛風症；（六）蝦蟹，容易引起皮膚病，例如濕疹；（七）生蠔，分分鐘內藏水銀毒及諾如病毒，引起屙嘔；（八）日本魚生， 核污染；（九）鹹魚臭豆腐，長期醃製而成，可能致癌；（十）深海大石斑，可能內藏雪茄毒，食後令人四肢麻痹、噁心頭暈；（十一 ）淡水海產，養魚業普遍視孔雀石綠為有效的抗真菌及抗蟲劑，但會致癌，本世紀初被禁，但不少魚場仍有殘留，及部分不法漁農仍偷偷用。

一切美食，皆有其「壞處」！乜都擔心者，其實起床已經開始面對空氣污染，怎活下去？

　　對於食物的擔心及恐懼，再寫下去，真的可以沒完沒了，將飲食樂趣一掃而空。

　　我的態度，雖未到「大菌食細菌，細菌當補品」那樣豁達，但也覺生死有命，故此，基本小心是會的，但絕不會乜都驚。

　　故此，為保人生最大樂趣⋯⋯嚐盡美食，早早堅決執行——食不同，不相為謀。