快樂退休—瞓身年金保終生
#年金 #政府年金 #終身年金 #退休哈哈哈，哈哈哈！我終於等到喇！等到乜？正是等到自己變成「兩蚊雞族」，成為六十五歲，除了兩蚊搭公共交通工具及有醫療券外，就是可以購買政府年金了。
我65 歲喇，變「兩蚊雞族」，更可瞓身買年金，感覺很正
半年前提起年金，多數人會藐嘴藐舌多多意見，包括：（一）都唔知分配得幾多，掟一萬每月收幾十，就算十萬每月收幾百也濕濕碎，自己投資好過啦；（二）買咗後，要錢急甪又攞唔返，不如存定期；（三）買大藍籌隨時都有三、四厘息啦，更可能「有升有息」，點解買年金？
人人都要退休，為了未來快樂生活，必須早早為「財務自由」而認真規劃
加上，各大金融機構及銀行有「利益衝突」（自己亦正售賣有豐厚佣金的投資產品），故此，年金呢類「太公波」，點會積極推呢？
結果，慘情！第一批年金遭遇滑鐵盧，登記的5500客戶，4成人又失聯又「縮沙」，搞到反應冷淡。
政府年金「出閘脫腳」，幸而立即優化，令吸引力大増
呢呢，咁就正嘞，因為第一次推失敗，年金公司立即針對種種漏洞補救，上限去到200萬，有需要時可以提回部分本金應急，吸引性大增。
有了終生的每月基本「收入」，人就安心泰然，開懷享受人生
投資，永遠是個孤獨決定，尤其涉及退休後的「棺材本」，小弟絕不願作「蠶蟲師爺」替別人出意見，不過，自己決定就是瞓身落去。點解？
（一）任何退休投資，第一要訣是保本保本保本。政府年金，百分百做到這標準。其他一切投資（股票、外幣、債券、期貨）皆無法擔保，只有存定期可比較。但定期？哪有永遠4厘息呀？
（二）退休投資，絕不可影響內心安寧。買任何「有升有跌」的投資產品，心情少不免隨價格起落而波動，無法晚晚安睡。政府年金穩如泰山，穩坐釣魚船，無懼風浪起跌。內心安寧，睡得好，自然容易快樂及免疫系統增強，直接令身體健康，驅走百病。這個，並非一般投資者關注到的思考性境界。
（三）百分百不會蒸發。理論上，任何投資產品，皆可能變零（例如，雷曼可以執笠、上市公司可以破產、外幣可變廢紙⋯⋯）但，買政府年金，簡直是鑽石級堅挺。不少人以為特區政府只有二萬億儲備，錯！政府的資產，更包括國際機場、隧道、公路、數千政府物業，數千公頃土地（郊野公園在冇錢時也可開發⋯⋯）絕對是全球最富貴的城市。
任何投資商品，皆未能有齊年金的三大優勢：絕對保本、月月派息、幕後機構穩如泰山
請問，呢個世界上，可有完全符合以上三個條件的投資產品？有就扑我個頭！
講完。為了「快樂退休」，我決定瞓身年金，保障一生。