世事政情

　　藝人兼前港隊代表方力申近排再次成為頭條人物，不過今次並唔係因為佢嘅緋聞，而係佢旗下泳會一名小泳手，因為香港游泳總會制度不公嘅問題，就算成績達標都不能出賽。最後方力申大聲呼冤，為小泳手四出奔走，泳總最終都同意准小泳手以「個人身份」參加分齡游泳錦標賽，叫做「暫時解決件事」。

　　泳總作出相關決定之後，會長王敏超接受傳媒查詢時就話，「唔想事情再鬧大」，決定今次容許呢位小泳手出賽，希望事情「可告一段落」，唔好影響其他泳手，尤其係精英運動員。Tina聽到會長咁解釋，第一個感覺就覺得非常「哽耳」，咩叫「唔想事情再鬧大」？佢咁樣講，潛台詞即係話已經幫方力申解決咗小泳手參賽嘅權利問題，唔好再「搞大件事」，即係唔好郁到個制度，暗示要方力申「見好就收」。

方力申為他旗下泳會一名小泳手發聲，指香港游泳總會制度不公；圖為其授課情況，學生非當事人。（方力申fb圖片）

　　有政壇中人就話，見到今次泳總處理小泳手事件嘅手法，同埋業界代表霍啟剛等個個都唔多出聲希望低調處理，估計事件已經驚動到更高層次嘅關注，王會長咁樣講得，好明顯係有更高層次嘅人落咗柯打，要盡快處理事件，唔好再升溫，「一升溫，即係話要督促泳總現有呢個保障既得利益者嘅小圈子制度。一石可以激起千重浪，會唔會有其他制度會令人覺得有問題要改變？會唔會有啲有心人會喺其他方面借題發揮？幕後會思考呢方面對整體社會嘅影響，所以下令問題要從速處理」。

　　不過方力申似乎未有因為「成功爭取」而「見好就收」，仲批評泳總現時解決嘅方法係偷換概念，其他有潛質嘅選手，日後都係要泳總格外開恩批准先可以參賽。方仲批評泳總來來去去都話就制度問題持續作檢討，但何時檢討、如何檢討都無討論，短期內都唔會有任何改變。政壇中人就相信，事件應該告一段落，暫時嘅討論應該點到即止，要爭取改變去拎掌聲的話，正路都會由霍啟剛去牽頭。但問題都係嗰句，「一座大山，已經難郁，郁親的話，咁多座大山都話要郁，影響會有幾大？政治之中，妥協亦都係重要嘅一環」。

　　自從2019年《逃犯條例》引發風波以來，香港多間大專院校都不約而同捲入政治漩渦之中，當中香港中文大學更加係「一浪接一浪」。

　　已經辭職嘅校長段崇智，早前搞出的「換校徽」事件又有新發展，中大校董、立法會議員及行會成員張宇人，上星期質疑中大校方換校徽項目大約1200萬元嘅餘款下落不明，話自己窮一生之力都要追究到底，似乎係有真憑實據暗指校方有人「穿櫃桶底」。

　　點知同一日，校方就出聲明澄清，指大學撤回更新校徽後，所有未動用嘅預算已經全數退回大學中央基金，仲話有關傳言毫無事實根據，「對網上有關不實言論感到深切遺憾」。

　　更神奇嘅係，有關澄清聲明極速被下架，而其後傳媒收到風，中大校董會主席查逸超喺內部信件承認，將澄清聲明下架係佢親自拍板。簡而言之，校董質疑、校長澄清、校董會主席下令下架，充分顯示呢三路中大最高管治架構嘅人馬，處於互相質疑、互不信任嘅狀態，所作所為甚至係將校譽置之不顧。

中大校董、校董會主席及校長三方處於互不信任狀態，對校譽有負面影響。(Shutterstock)

　　有政界中人指出，一間咁大規模嘅大學， 就算如校長有咁大職權範圍嘅人，要穿櫃桶底都難過登天，更何況呢啲項目嘅支出一般都係實報實銷，如果項目未進行未有單據，啲錢就肯定留番喺個戶口度，無真憑實據而作出指控，其實對於校長嘅聲譽真係好大傷害，「我都諗唔明，既然佢自己本身係校董，可以聯同其他校董會成員去處理，要求校方詳細交代，點解要去到公開呢一步？」

　　嗰位政界中人仲話，最令人匪夷所思嘅係，中大校董會主席查逸超要求將澄清聲明下架嘅動作，「一方指控、一方澄清，如果澄清內容不實，校董會主席更加應該出面力斥其非，要求將澄清聲明下架又唔講邊一方先係真理，唔好話大學，就算一個屋企都唔可能發生，試問點能夠令人覺得呢間學校係管理優良、能夠作育英才？又點可以吸引到海外資優學生入讀？」

　　之前港大已經搞到一鑊粥，依家中大又係咁不斷內耗，政治風波沒完沒了。有教育界人士坦言，香港依家都好難再吸引到頂級海外學者來港任教，要發展成為國際教育樞紐嘅口號，怕且都只會係空中樓閣。