世事政情

　　中聯辦主任鄭雁雄繼去年7月之後，今日再一次去到立法會出席午宴並作出致辭。今時今日以中聯辦主任嘅身份喺立法會度講一番話，其實就等同向政府及一眾議員「宣旨」，唔少官員及議員更要從字裏行間，去揣摩主任心入面究竟係想表達啲乜，從而等自己往後交足功課。

　　有資深議員今日聽完鄭嘅講話之後，認為鄭最想表達嘅係，香港喺《香港國安法》同23條相繼立法之後，社會環境已經穩定下來，依家更加要著眼於「一國兩制」之中嘅兩制。

　　呢位資深議員指出，鄭最可圈可點嘅一段，就係「要守住國際關係，當好聯通世界的橋頭堡，更好融入國際擁抱世界，不會被邊緣化，更不會內地化；要守住發展之本，用好中國機遇，把握好中央政策」。細味呢一段，大家就會明白到，喺鄭同中央眼中，香港的而且確出現內地化嘅趨勢，而香港如果變到同深圳一模一樣的話，必然就會被邊緣化，所以鄭就係想話畀政府同議員知道，依家呢個時勢，保住香港同國際接軌，幫國家聯通世界，係重中之重。

適逢放寬內地旅客來港澳消費免稅限制，鄭的一席話，就似當頭棒喝。（網上片段截圖）

　　更加要睇通嘅係，鄭將守住國際關係呢一點，放喺「要守住發展之本，用好中國機遇，把握好中央政策」前面，好明顯就係同一眾事事要求香港同內地接軌嘅議員同官員講，用好兩制去聯通國際，比起下下問中央拎著數更加重要。而適逢今日阿爺公布放寬內地旅客來港澳消費嘅免稅限制，其實都真係好似當頭棒喝：著數就已經畀咗香港，依家就唔該搞好國際關係。

　　另一位議員亦都認同，鄭嘅講話係明顯擔心香港正慢慢走向內地化，所以重點提出，以收醍醐灌頂之效。不過鄭希望香港繼續守住國際關係，議員坦言「上至特首、下至市民，有邊個唔想做？」，但呢方面並唔係單向，由香港透過推出幾好嘅政策就能夠達到，最重要係睇西方國家點樣睇香港嘅定位，「中美繼續角力，西方國家仍然將香港睇成為深圳、上海一樣，咁我哋無論話自己有幾咁國際化都無用」。不過既然鄭咁樣打開口牌，相信特區政府及一眾立會KOL應該都識做，唔會再下下推動一啲將香港進一步內地化嘅政策，亦唔會忌諱同西方國家多加接觸，呢點都係好事。

　　唔經唔覺，立法會又去到暑假休會時間，要去到10月先會恢復會議。無會開唔代表議員係悠悠閒，事關10月就係《施政報告》公布嘅日子，呢排一眾議員就忙緊輪住「面聖」，向特首提交《施政報告》建議，希望特首接納佢哋提出嘅意見，放入去《施政報告》之中，咁亦都係完善選舉制度之後，立法會議員其中一個比較容易理解嘅KPI。

　　接納建議係一個指標，但其實立法會議員另有一個重要職能，就係監察政府運作、監察政府有無亂咁用公帑，呢方面立法會又有無起到佢嘅功用呢？近年講嘢愈來愈大膽、其中一位最資深嘅議員謝偉俊，似乎就唔多認為立法會起到監察作用，佢噚日見完特首交建議，亦都指出立法會依家嘅監察功能「失真」，例如立法會常設嘅政府帳目委員會，以及《權力及特權法》賦權成立嘅獨立調查委員會，都係為咗調查公營機構財政、監察政府運作，但最近一次帳委會只有兩個記者出席，而呢屆立法會出年就完結，至今從未召開過獨立調查委員會。

　　無獨有偶，早幾日被視為「唯一反對派」嘅議員狄志遠，亦質疑立法會監察功能較以往削弱，佢話有議員提出反對意見後，獲官員致電「唔使咁呀？」，事後更加惹來另外兩位建制派立法會議員公開反駁。

完善選舉制度後，立法會與政府的關係無以往那麼緊張。(Shutterstock)

　　Tina就以上觀點問過幾位立法會議員，一位今屆先當選嘅「嫩口」議員某程度上亦認同謝嘅講法，佢話留意到過去帳委會開記者會都係非常大陣仗，好多記者追問，之後嘅媒體篇幅都唔細；但係今屆帳委會似乎無咗相關功能，如謝偉俊所講，最近一次報告記者會，得兩個記者到場，再問番相關委員，原來當日記者係零提問，帳委會讀完新聞稿之後好快就完咗個新聞發布會，傳媒朋友對帳委會呢次報告根本係漠不關心。

　　「出現咁嘅情況有兩個可能，一就係帳委會喺審議嘅過程唔夠賣力，發現唔到政府點樣大花筒、點樣失職；另一個就係審計署本身份審計報告其實亦只不過係小罵小鬧，專門搵啲搔不著癢處嘅位去批評其他政府部門，等公眾唔好認為現屆政府有失職嘅地方。不過，就咁睇最新兩個進行公開聆訊嘅篇章，似乎又真係睇唔出審計署搵到咩政府部門有重大甩漏嘅地方，向好方面諗，就係政府部門真係有改進、公務員都係跟足程序去做嘢。」

　　然而有資深議員就特別指出，議員並唔係無監察嘅功能，只不過有啲議題可能好早就已經叫停政府，或者提出咗反對意見等政府吸收，好似垃圾徵費咁，議員反對嘅角色就非常重要，如果唔係，政府一定按時間表推出咗，都證明立法會係有監察作用嘅。嗰名資深議員同時強調，完善選舉制度之後嘅立法會亦會監察政府，不過就唔會再好似以前咁樣，透過喺立法會入面投反對票，而係事先作良好溝通，認為咁樣都係良好互動。