世事政情

　　近排社會出現兩件比較大嘅事件，雖然本質上係南轅北轍，但結果都係一樣，就係被政府盡早想辦法，將反對嘅聲音盡早撳低。

　　第一個就係全民關注嘅「的士大戰Uber」嘅放蛇事件。警方好幾年未有再打擊白牌車Uber嘅經營，的士業界早就怨聲載道，幾位「的哥」見警方唔做嘢，自告奮勇去放蛇，迫警方「落簿」。事件激發全城市民動怒，過往受過的士千百種氣嘅市民，都齊聲聲討，更有唔少人發起舉報行動，向警方上報各類的士嘅路面違法行為，令到唔少的士司機「白狗當災」。

　　放蛇事件更獲得特首李家超親自回應，並指放蛇人士可能有違法風險，不過「的哥」放蛇行動喺特首開腔之後仍然繼續多一次。而原本呢個星期的士業界諗住搞嘅政總外面請願，以為事在必行之際，點知臨門一腳就取消咗。負責人回覆媒體時就話，並唔係收到有關部門「提示」，而係特首已經回應業界訴求，認為問題已解決，無請願必要。

　　不過據Tina八卦所知，政府一知道有關團體準備請願之後，就已經積極應對，務求團體自行取消有關請願，避免將事件進一步升級。背後嘅想法，就係市民大多對的士服務質素出現一致嘅反感，政府亦都認同，但的士問題難以一下子解決，暫時只希望保持現況，唔好再將事件升級，所以透過唔同人向有關團體「溫提」，最終亦得到正面回應。

近日社會兩單爭議性事件，都被政府壓下去，避免再生枝節。(Shutterstock)

　　另一壇就係喺立法會審議緊嘅《牙醫註冊條例》，要求原本6年制嘅牙醫學生，要花多一年喺公營機構實習，先可以取得執業資格，令到現屆學生非常不滿，認為修例不設過渡期，會令畢業時間推遲，更加打動到審議緊議案嘅立法會議員，打算提出修正案，希望修例令到現屆學生不受影響。不過政府「企得勁硬」，對有關修正案如臨大敵，約見議員希望逐個擊破以外，仲玩「政府消息人士」向報章放料，將一啲未公開過嘅資料，包括「個別牙科畢業生牙都未剝過」，爆畀媒體知。

　　Tina亦有就事件同政壇中人八卦，嗰名人士就批評，政府既然有咁強改革牙科醫生嘅決心，點解唔一早同議員解說，係要去到有議員提出修正案，先透過「消息人士」向傳媒放料？嗰名政壇中人仲話，今次改革唔係憑空爆出嚟，政府實在有責任充分掌握民意先至推出政策，不過依家就聽聞，喺政府態度強硬之下，議員會提修正案嘅機會率每況愈下，似乎最終都係政府原方案上陣。

　　政壇中人就形容，上面兩件事係獨立事件，但政府處理方法都係如出一轍，喺「垃圾徵費」可能胎死腹中之下，現屆政府更要保持管治威信，反對聲音要盡早撳低，以免再生枝節。

　　唔經唔覺，立法會又去到暑假休會時間，要去到10月先會恢復會議。無會開唔代表議員係悠悠閒，事關10月就係《施政報告》公布嘅日子，呢排一眾議員就忙緊輪住「面聖」，向特首提交《施政報告》建議，希望特首接納佢哋提出嘅意見，放入去《施政報告》之中，咁亦都係完善選舉制度之後，立法會議員其中一個比較容易理解嘅KPI。

　　接納建議係一個指標，但其實立法會議員另有一個重要職能，就係監察政府運作、監察政府有無亂咁用公帑，呢方面立法會又有無起到佢嘅功用呢？近年講嘢愈來愈大膽、其中一位最資深嘅議員謝偉俊，似乎就唔多認為立法會起到監察作用，佢噚日見完特首交建議，亦都指出立法會依家嘅監察功能「失真」，例如立法會常設嘅政府帳目委員會，以及《權力及特權法》賦權成立嘅獨立調查委員會，都係為咗調查公營機構財政、監察政府運作，但最近一次帳委會只有兩個記者出席，而呢屆立法會出年就完結，至今從未召開過獨立調查委員會。

　　無獨有偶，早幾日被視為「唯一反對派」嘅議員狄志遠，亦質疑立法會監察功能較以往削弱，佢話有議員提出反對意見後，獲官員致電「唔使咁呀？」，事後更加惹來另外兩位建制派立法會議員公開反駁。

完善選舉制度後，立法會與政府的關係無以往那麼緊張。(Shutterstock)

　　Tina就以上觀點問過幾位立法會議員，一位今屆先當選嘅「嫩口」議員某程度上亦認同謝嘅講法，佢話留意到過去帳委會開記者會都係非常大陣仗，好多記者追問，之後嘅媒體篇幅都唔細；但係今屆帳委會似乎無咗相關功能，如謝偉俊所講，最近一次報告記者會，得兩個記者到場，再問番相關委員，原來當日記者係零提問，帳委會讀完新聞稿之後好快就完咗個新聞發布會，傳媒朋友對帳委會呢次報告根本係漠不關心。

　　「出現咁嘅情況有兩個可能，一就係帳委會喺審議嘅過程唔夠賣力，發現唔到政府點樣大花筒、點樣失職；另一個就係審計署本身份審計報告其實亦只不過係小罵小鬧，專門搵啲搔不著癢處嘅位去批評其他政府部門，等公眾唔好認為現屆政府有失職嘅地方。不過，就咁睇最新兩個進行公開聆訊嘅篇章，似乎又真係睇唔出審計署搵到咩政府部門有重大甩漏嘅地方，向好方面諗，就係政府部門真係有改進、公務員都係跟足程序去做嘢。」

　　然而有資深議員就特別指出，議員並唔係無監察嘅功能，只不過有啲議題可能好早就已經叫停政府，或者提出咗反對意見等政府吸收，好似垃圾徵費咁，議員反對嘅角色就非常重要，如果唔係，政府一定按時間表推出咗，都證明立法會係有監察作用嘅。嗰名資深議員同時強調，完善選舉制度之後嘅立法會亦會監察政府，不過就唔會再好似以前咁樣，透過喺立法會入面投反對票，而係事先作良好溝通，認為咁樣都係良好互動。