世事政情

　　區議會選舉塵埃落定，估唔到一場事前咁唔被睇好嘅選舉，最終都能夠咁戲劇性收場。唔少人唔睇好投票率，點知喺政府力推之下都推到上27%，仲要臨收工搞到個系統故障要加時作賽，真係劇本都好難寫到咁精彩。

　　今次選舉，焦點並不在於邊個選區選到咩人，而係各大政團最終能夠收割到幾多議席。直選議席方面，44個地區直選選區，一共有88個席位，貴為香港第一大黨嘅民建聯，每區派出一個人，最終只係得3個人落馬，一共奪得41席之多，成功率達九成三。另外佢哋喺地委會界別共有77人參選，68人贏咗，成功率亦有八成八。透過呢兩個選舉已經囊括109席，仲多過梁山泊嘅好漢。

　　睇番搶灘第二位嘅建制派工聯會，25人出戰直選，7人落選，18人搶到議席，當選比率都有七成二，但喺地委會選舉，21人出選就只係得9人當選，即係合共僅取得27席，只係得民建聯嘅四分之一，更遑論其他議席更少嘅新民黨、自由黨同經民聯。

民建聯及工聯會是今次區選得到議席最多的頭兩大政黨。（資料圖片）

　　民建聯紮根地區咁多年，得到較多議席自然係好正常嘅事，例如2015年區議會選舉，全部議席都係直選，佢哋派出171人出選，都有119席，放飛其他建制派政團。不過有其他建制中人就指出，今次完善咗嘅區選制度，直選畀民建聯拎到44席都無問題，但問題在於連地委會界別佢哋都拎到咁多席，畀人嘅感覺就係成個選舉遊戲出現明顯偏差，搞到其他政黨都不是味兒。

　　呢位建制中人表示，依家無咗泛民，全部建制派對陣，好明顯嘅一個效果，就係無論地區直選定地委會選舉，「識得人多就有著數」，佢又話：「大家講嘅政綱都差唔多，喺市民心目中亦都覺得選到邊個都差唔多，所以投票率創新低，而咁嘅環境之下，有樁腳、動員能力強嘅政黨，優勢顯而易見。而民建聯過往做區出身，咁三會入面好多人都有民建聯背景或者同民建聯領導層都係熟絡，進一步鞏固佢哋嘅優勢。試問一日個選舉制度不變，啲細黨或地區聯繫無咁強嘅政團，有乜可能同到佢哋競爭？」而喺選舉期間，已經出現工聯會嘅重量級人馬專係去幫民建聯嘅對手站台嘅現象，好明顯就係大家對於「大黨」好有怨言。

　　仲有個細政團叫香港新方向，讀者可能無聽過，不過佢哋嘅立法會議員張欣宇都算係曝光率幾高嘅議員。佢哋區選出五人，僅僅得一個當選，地委會更加無派人去選。之後佢哋就向全港市民發公開信，信中有一段提到：「政治，從來不應該只是僅僅取悅粉絲或圍爐埋怨的遊戲。政治，本就應當回歸到市民日常生活的每一天。」呢一句正正道出成個新選制之下，要贏，就要靠圍爐、就要靠日常生活嘅每一天去取悅粉絲。睇嚟未來兩年（現屆立法會餘下任期），各大政團都會諗諗計點樣減低「大黨」嘅影響力。

　　今年度立法會接近尾聲，完善選舉制度之後嘅立法會，不經不覺差不多過咗四分之三，下年年底又會再一次進行選舉。完善咗之後，立法會效率當然係奇高，法例同撥款過得「發發聲」，不過亦唔可以話立法會無把關，最起碼好似爭議極大嘅垃圾徵費就係喺議員施壓之下，最終政府都唔敢硬推。

　　繼垃圾徵費之後，短期之內又會有一條新戰線，就係早排由醫務衛生局推出嘅十項控煙新政策，包括禁止加味煙如薄荷煙、糖果煙、水果煙，及擴大禁煙區域如禁止排隊候車時吸煙等。

　　香港煙民已經係少數，吸煙率已經低過10%，剛剛亦大幅增加煙稅，政府都話期望出年呢個數跌到8%以下。吸煙本身係危害健康，吸煙人士亦唔會有異議，所以政府再出手控煙，本來都預計大部分政黨都會企喺政府嗰邊，除咗商界代表點都要維護一下煙商同小報販、便利店等利益而作出反對，但點都估唔到，第一大黨民建聯亦都作出180度轉變，令呢個政策隨時充滿變數。

政府推出控煙十招，期望明年香港煙民比例降至8%以下。(Shutterstock)

　　翻查政府公布十項措施之後各政黨嘅表態，民建聯嘅衛生事務發言人、立法會議員梁熙就發出題為「梁熙支持政府全方位控煙，關注旅客體驗，籲有措施鼓勵戒煙」嘅新聞稿，入面講到非常支持政府全方位控煙，無提出任何對禁止加味煙嘅關注同反對，甚至質疑政府點解唔監管埋俗稱「火車頭」嘅一路行一路食，佢只係表達擔心新措施會影響旅客體驗同驚佢哋誤墮法網。

　　唔夠一個星期，同黨另一直選議員劉國勳就話控煙十招太辣，認為社會需要進一步討論，係唔係現階段就禁止加味煙。梁熙轉個頭更加喺立法會向政府提出書面質詢，要求政府就各種口味香煙嘅銷量同稅收、吸煙人士同非吸煙人士嘅醫療成本差異、禁加味煙會令多少煙民戒煙，以及對商務及觀光旅客嘅影響，畀出數字同答案，大有反枱嘅意味。

　　有其他政黨人士就估計，民建聯作為第一大直選政黨，唔少選民都係來自基層，更加有唔少係煙民，「選民嘈一嘈，你估佢哋唔會腳軟、唔會轉軚？基層煙民如果連買加味煙嘅權利都無埋，點會唔反對？」該政黨人士仲話，要說服醫務衛生局局長盧寵茂並唔係易事，盧局長呢幾年都係最硬淨嘅局長之一，不過現時商界加上民建聯齊齊反對的話，搞到最後喺議會唔夠票過，亦唔係政府希望見到，所以呢條戰線誰勝誰負，仍然都係未知之數。