世事政情

　　仲記得國務院港澳辦主任夏寶龍喺完善選舉制度後嘅立法會選舉期間，講到新制下首次立法會選舉，不搞「清一色」，而是「五光十色」，有不同身份、階層、界別人士參與比拼政綱，之不過去到今時今日，政府一個撥款申請，明知係夠晒票數喺立法會獲得通過，但竟然係容不下一粒反對聲音。

　　立法會財務委員會好快就會審議首批約值149億元嘅「簡約公屋」項目，而呢個項目其實早前已經喺財委會轄下嘅工務小組獲得通過，當時票數係34票贊成，一人棄權，棄權者正正係當區嘅立法會議員楊永杰。

　　楊永杰投棄權，當然好明顯係意識形態做畀佢嘅選民睇，無乜實質意義，因為佢嗰一票比螳臂更加無力。但勢估唔到，無力嘅螳臂真係連舉起之力都無埋，佢喺財委會未開之前就已經率先宣布，基於重大議題需要同佢所屬「聯盟」綑綁投票，所以佢會跟隨其他成員投下贊成方案。所以外界普遍預料，財委會今日將以全票通過「簡約公屋」。

（資料圖片）

　　有立法會議員私底下就透露，今次「簡約公屋」係政府過去年幾咁多個撥款以來，最受「當局」關注嘅。「當局」並不單止係講添馬，而係連西環都打醒十二分精神，早已經透過所屬部門聯絡對應嘅議員，同佢地講明今次呢個撥款係「不容有反」，大家都要坐定定支持。呢位議員仲話，其實一直以來表明立場反對嘅議員都係得嗰三四個，更加係以楊永杰最出位，點數都係夠晒票過，「又何必要追求100分」。而一般來講有人要反對或者棄權先至會要求記名點票，大家覺得無問題就一般舉手通過就算，但今次呢個撥款，暫時都仲未知道有無人會提出記名，「如果係咪都唔畀反對嘅，我諗應該係會舉手通過呱」。

　　另外本來對於撥款仍然有疑問嘅議員就形容，「當局」嘅關注令到佢嘅疑問亦都「收斂」，未必會喺財委會上帶有質疑或者攻擊性嘅語氣去質詢政府，會稍為修改下語調，要求政府澄清一啲問題，避免自己成為「主角」。

　　不過令人唏噓嘅係，普通一個必定可以通過嘅撥款申請，都容不下一張棄權或者反對票，「清一色」嘅支持，又係咪真真正正嘅「支持」呢？

　　唔經唔覺，立法會又去到暑假休會時間，要去到10月先會恢復會議。無會開唔代表議員係悠悠閒，事關10月就係《施政報告》公布嘅日子，呢排一眾議員就忙緊輪住「面聖」，向特首提交《施政報告》建議，希望特首接納佢哋提出嘅意見，放入去《施政報告》之中，咁亦都係完善選舉制度之後，立法會議員其中一個比較容易理解嘅KPI。

　　接納建議係一個指標，但其實立法會議員另有一個重要職能，就係監察政府運作、監察政府有無亂咁用公帑，呢方面立法會又有無起到佢嘅功用呢？近年講嘢愈來愈大膽、其中一位最資深嘅議員謝偉俊，似乎就唔多認為立法會起到監察作用，佢噚日見完特首交建議，亦都指出立法會依家嘅監察功能「失真」，例如立法會常設嘅政府帳目委員會，以及《權力及特權法》賦權成立嘅獨立調查委員會，都係為咗調查公營機構財政、監察政府運作，但最近一次帳委會只有兩個記者出席，而呢屆立法會出年就完結，至今從未召開過獨立調查委員會。

　　無獨有偶，早幾日被視為「唯一反對派」嘅議員狄志遠，亦質疑立法會監察功能較以往削弱，佢話有議員提出反對意見後，獲官員致電「唔使咁呀？」，事後更加惹來另外兩位建制派立法會議員公開反駁。

完善選舉制度後，立法會與政府的關係無以往那麼緊張。(Shutterstock)

　　Tina就以上觀點問過幾位立法會議員，一位今屆先當選嘅「嫩口」議員某程度上亦認同謝嘅講法，佢話留意到過去帳委會開記者會都係非常大陣仗，好多記者追問，之後嘅媒體篇幅都唔細；但係今屆帳委會似乎無咗相關功能，如謝偉俊所講，最近一次報告記者會，得兩個記者到場，再問番相關委員，原來當日記者係零提問，帳委會讀完新聞稿之後好快就完咗個新聞發布會，傳媒朋友對帳委會呢次報告根本係漠不關心。

　　「出現咁嘅情況有兩個可能，一就係帳委會喺審議嘅過程唔夠賣力，發現唔到政府點樣大花筒、點樣失職；另一個就係審計署本身份審計報告其實亦只不過係小罵小鬧，專門搵啲搔不著癢處嘅位去批評其他政府部門，等公眾唔好認為現屆政府有失職嘅地方。不過，就咁睇最新兩個進行公開聆訊嘅篇章，似乎又真係睇唔出審計署搵到咩政府部門有重大甩漏嘅地方，向好方面諗，就係政府部門真係有改進、公務員都係跟足程序去做嘢。」

　　然而有資深議員就特別指出，議員並唔係無監察嘅功能，只不過有啲議題可能好早就已經叫停政府，或者提出咗反對意見等政府吸收，好似垃圾徵費咁，議員反對嘅角色就非常重要，如果唔係，政府一定按時間表推出咗，都證明立法會係有監察作用嘅。嗰名資深議員同時強調，完善選舉制度之後嘅立法會亦會監察政府，不過就唔會再好似以前咁樣，透過喺立法會入面投反對票，而係事先作良好溝通，認為咁樣都係良好互動。