世事政情

由於呢個星期突然爆出多單猛料，所以今期專欄分別就人大選舉同錯播國歌事件同大家八一八啲花邊消息。

一、人大選舉

　　立法會補選提名期已經完咗， 4個補選位置將會由6人爭奪，估唔到同期舉行嘅人大選舉先係眼球焦點所在。噚日有媒體報道，由於人大常委譚耀宗由於已經有返咁上下年紀，所以佢就唔會再尋求連任，取而代之嘅，可能會係前特首林鄭月娥。

　　呢單傳聞傳出之後，Tina即時反應就係「唔係呀嘛！」，立即打電話俾政圈朋友打聽。大家都話對於呢個傳聞絕對係難以想像，事前更加係諗都無諗過。其中一位熟悉內地政治體制嘅圈中人指出，林鄭嘅地位當然夠晒料去做呢個位，履歷表上唯一較差嘅就係林鄭多年來喺香港官場打滾，其實係對內地法律體制無深入認識，要做常委的話絕對係要先行做好多功課先接到手。不過呢位圈中人就話，「好打得」又「考第一」嘅佢，呢啲都只不過係碎料。

　　林鄭接手譚Sir做人大常委嘅最大問題，就係會令林鄭多好多面對傳媒嘅曝光機會，因為一旦涉及人大立法又關香港嘅事，媒體都係直接搵譚Sir，林鄭取而代之的話，加上佢前特首嘅身份，上鏡嘅機會只會有增無減。讀者應該都記得，過往前特首梁振英都不時喺社交媒體對林鄭政府指指點點，惹來不少風風雨雨，到後來先有所收斂，如果林鄭做咗人大常委，少不免都要對一啲涉及國家同香港嘅政策點評，到時又會唔會令到李家超政府尷尬呢？呢個絕對係考慮要點。另外有人話以佢曾經係一區之首嘅身份去做人大常委，身份上絕對係唔匹配，不過Tina認為，呢個唔會係林鄭考慮之列，只要有位畀佢繼續服務國家，林鄭係一定會做。就睇下嚟緊林太會唔會再次站喺鎂光燈之下。

二、國歌風波

　　周初掀起嘅香港欖球隊國歌風波，雖然有唔少立法會議員喺施政報告致謝議案之中對事件抨擊香港欖球隊，但係去到周末前似乎已經熄咗少少火。

　　事件由一開始未搞清楚責任誰屬，建制派KOL蜂湧而出諗住「港獨再現」，甚至有人諗住要去韓國領事館抗議，到依家發現極可能係韓國方面一啲超低級錯誤導致發生事件，反而轉口向香港欖球隊問責，仲有議員要求解散欖球隊。

　　其實Tina就唔多明白呢班指責欖球隊員嘅建制派議員邏輯所在，運動員一向都專注於運動上表現，要佢哋能夠滴水不漏咁處理呢件突發嘅政治事件，絕對係強人所難，更何況呢班球員之中大部分都係非華人，將問題指向一班被問題所影響嘅人身上，係唔係議員應有之言？Tina認同整個香港體育界應該要汲取教訓，訂立一個應對方式以免再有咁尷尬嘅情況再次出現，但你話要批鬥到懲處呢班唔係佢哋做錯嘅運動員，只會令人心寒。

　　唔經唔覺，立法會又去到暑假休會時間，要去到10月先會恢復會議。無會開唔代表議員係悠悠閒，事關10月就係《施政報告》公布嘅日子，呢排一眾議員就忙緊輪住「面聖」，向特首提交《施政報告》建議，希望特首接納佢哋提出嘅意見，放入去《施政報告》之中，咁亦都係完善選舉制度之後，立法會議員其中一個比較容易理解嘅KPI。

　　接納建議係一個指標，但其實立法會議員另有一個重要職能，就係監察政府運作、監察政府有無亂咁用公帑，呢方面立法會又有無起到佢嘅功用呢？近年講嘢愈來愈大膽、其中一位最資深嘅議員謝偉俊，似乎就唔多認為立法會起到監察作用，佢噚日見完特首交建議，亦都指出立法會依家嘅監察功能「失真」，例如立法會常設嘅政府帳目委員會，以及《權力及特權法》賦權成立嘅獨立調查委員會，都係為咗調查公營機構財政、監察政府運作，但最近一次帳委會只有兩個記者出席，而呢屆立法會出年就完結，至今從未召開過獨立調查委員會。

　　無獨有偶，早幾日被視為「唯一反對派」嘅議員狄志遠，亦質疑立法會監察功能較以往削弱，佢話有議員提出反對意見後，獲官員致電「唔使咁呀？」，事後更加惹來另外兩位建制派立法會議員公開反駁。

完善選舉制度後，立法會與政府的關係無以往那麼緊張。(Shutterstock)

　　Tina就以上觀點問過幾位立法會議員，一位今屆先當選嘅「嫩口」議員某程度上亦認同謝嘅講法，佢話留意到過去帳委會開記者會都係非常大陣仗，好多記者追問，之後嘅媒體篇幅都唔細；但係今屆帳委會似乎無咗相關功能，如謝偉俊所講，最近一次報告記者會，得兩個記者到場，再問番相關委員，原來當日記者係零提問，帳委會讀完新聞稿之後好快就完咗個新聞發布會，傳媒朋友對帳委會呢次報告根本係漠不關心。

　　「出現咁嘅情況有兩個可能，一就係帳委會喺審議嘅過程唔夠賣力，發現唔到政府點樣大花筒、點樣失職；另一個就係審計署本身份審計報告其實亦只不過係小罵小鬧，專門搵啲搔不著癢處嘅位去批評其他政府部門，等公眾唔好認為現屆政府有失職嘅地方。不過，就咁睇最新兩個進行公開聆訊嘅篇章，似乎又真係睇唔出審計署搵到咩政府部門有重大甩漏嘅地方，向好方面諗，就係政府部門真係有改進、公務員都係跟足程序去做嘢。」

　　然而有資深議員就特別指出，議員並唔係無監察嘅功能，只不過有啲議題可能好早就已經叫停政府，或者提出咗反對意見等政府吸收，好似垃圾徵費咁，議員反對嘅角色就非常重要，如果唔係，政府一定按時間表推出咗，都證明立法會係有監察作用嘅。嗰名資深議員同時強調，完善選舉制度之後嘅立法會亦會監察政府，不過就唔會再好似以前咁樣，透過喺立法會入面投反對票，而係事先作良好溝通，認為咁樣都係良好互動。