世事政情

　　特首李家超呢個星期三公布咗佢首份嘅《施政報告》，Tina作為一位已經睇咗25份特區《施政報告》嘅小市民，我可以話呢份《施政報告》的確係與別不同，有過去24份完全無嘅特質。

（Tony攝）

　　其中一個創先河嘅特質，就係為不同項目設定咗KPI績效指標，總數達到110項之多，雖然細心啲睇有唔少明顯係「湊夠數」，但有啲都真係一條要達到嘅實數。KPI呢樣嘢今屆立法會議員講咗好多，李家超喺當選特首之後亦都有提及，但就萬萬想唔到會放喺施政報告之中。我諗好多打工仔，特別係做過Sales嘅讀者都會好體會到，每到年尾老細就會檢討一年條數係點，有賞有罰，仲會定立明年嘅「銷售指標」，要大家諗計點樣去跑好條數，跑到就升職加人工，跑唔到就拜拜都有份。

　　家超特首喺《施政報告》附表放咗呢個KPI，各個局、各個部門首長都事必會將相關嘅KPI目標放喺枱頭成年，準備日日月月向下屬「捽數」。咁到唔到數有咩後果？Well，咁就要講埋以下嘅全新有獎有罰機制。

　　獎嘅就係「行政長官表揚榜」獎勵計劃，會用嚟表揚一啲「業績超卓」嘅公務員或者團隊，上面嘅KPI當然係其中一項指標，另外亦會包括其他工作範疇，相信上咗榜嘅公務員升職可期；罰方面，眾所周知要炒一個公務員向來都唔係易事，不過今次特首就講到明表現欠佳嘅公務員喺督導同輔助後都無改善，就要拜拜。

　　Tina相信，李家超定得獎罰機制，其實都係將私營機構嘅一套搬入去公務員體制之中，而Tina聽聞，呢個機制都會有KPI。門常開中人透露，機制一訂立，獎就非常容易，總係會有勤力嘅團隊做到成績；至於罰方面，幾十萬公務員團隊，枯枝肯定有，要搵人「祭旗」應該都有好多中高層樂見，所以明年底必定會公布罰幾多人，話唔定最達標嘅更加係特首出身嘅保安體系。

　　以上嘅新特質，暫時嚟睇都算係好嘅，起碼畀香港嘅政治一啲新風，不過《施政報告》最大嘅重點，仍然係要回應市民嘅願望、訴求。《施政報告》無論喺吸引人才、造地建房、經濟復元、醫療教育各方面都有回應咗，但市民甚至係整個商界，現時最最最想嘅，就係我地嘅邊境檢疫措施能夠完完全全恢復正常，等市民同遊客可以自由往返，呢個先最能夠幫到香港疲弱不堪嘅經濟，做到所謂嘅「由治及興」。呢部分連一丁點嘅路線圖都見唔到，絕對係《施政報告》嘅缺失。

　　唔經唔覺，立法會又去到暑假休會時間，要去到10月先會恢復會議。無會開唔代表議員係悠悠閒，事關10月就係《施政報告》公布嘅日子，呢排一眾議員就忙緊輪住「面聖」，向特首提交《施政報告》建議，希望特首接納佢哋提出嘅意見，放入去《施政報告》之中，咁亦都係完善選舉制度之後，立法會議員其中一個比較容易理解嘅KPI。

　　接納建議係一個指標，但其實立法會議員另有一個重要職能，就係監察政府運作、監察政府有無亂咁用公帑，呢方面立法會又有無起到佢嘅功用呢？近年講嘢愈來愈大膽、其中一位最資深嘅議員謝偉俊，似乎就唔多認為立法會起到監察作用，佢噚日見完特首交建議，亦都指出立法會依家嘅監察功能「失真」，例如立法會常設嘅政府帳目委員會，以及《權力及特權法》賦權成立嘅獨立調查委員會，都係為咗調查公營機構財政、監察政府運作，但最近一次帳委會只有兩個記者出席，而呢屆立法會出年就完結，至今從未召開過獨立調查委員會。

　　無獨有偶，早幾日被視為「唯一反對派」嘅議員狄志遠，亦質疑立法會監察功能較以往削弱，佢話有議員提出反對意見後，獲官員致電「唔使咁呀？」，事後更加惹來另外兩位建制派立法會議員公開反駁。

完善選舉制度後，立法會與政府的關係無以往那麼緊張。(Shutterstock)

　　Tina就以上觀點問過幾位立法會議員，一位今屆先當選嘅「嫩口」議員某程度上亦認同謝嘅講法，佢話留意到過去帳委會開記者會都係非常大陣仗，好多記者追問，之後嘅媒體篇幅都唔細；但係今屆帳委會似乎無咗相關功能，如謝偉俊所講，最近一次報告記者會，得兩個記者到場，再問番相關委員，原來當日記者係零提問，帳委會讀完新聞稿之後好快就完咗個新聞發布會，傳媒朋友對帳委會呢次報告根本係漠不關心。

　　「出現咁嘅情況有兩個可能，一就係帳委會喺審議嘅過程唔夠賣力，發現唔到政府點樣大花筒、點樣失職；另一個就係審計署本身份審計報告其實亦只不過係小罵小鬧，專門搵啲搔不著癢處嘅位去批評其他政府部門，等公眾唔好認為現屆政府有失職嘅地方。不過，就咁睇最新兩個進行公開聆訊嘅篇章，似乎又真係睇唔出審計署搵到咩政府部門有重大甩漏嘅地方，向好方面諗，就係政府部門真係有改進、公務員都係跟足程序去做嘢。」

　　然而有資深議員就特別指出，議員並唔係無監察嘅功能，只不過有啲議題可能好早就已經叫停政府，或者提出咗反對意見等政府吸收，好似垃圾徵費咁，議員反對嘅角色就非常重要，如果唔係，政府一定按時間表推出咗，都證明立法會係有監察作用嘅。嗰名資深議員同時強調，完善選舉制度之後嘅立法會亦會監察政府，不過就唔會再好似以前咁樣，透過喺立法會入面投反對票，而係事先作良好溝通，認為咁樣都係良好互動。