世事政情

　　筆者執筆之際，仲未收到政務司司長李家超呈辭嘅消息，不過政圈之中已幾可肯定，家超必定係會辭職「跑馬仔」，仲要係跑一場「一匹馬嘅賽事」。

　　上一篇文章Tina提到，最大可能出選嘅會係李家超同埋財政司司長陳茂波「其中一人」，而當時收到嘅風更係陳茂波稍為佔先，並且已經連辭職信都印好入好信封等寄出，但點解最終入閘嘅會係波波變家超？Tina再去問返之前收風嘅政壇中人，佢就話上個星期，波波仍然係對阿爺畀佢出閘充滿信心，佢亦心知自己同家超兩個人之中只能有一個人入閘。政壇中人話，波波心知自己嘅優勢，由於佢近年掌管特區嘅財政大權，加上係會計行業出身，近年亦表現得出佢對經濟政策達到瞭如指掌境界，所以阿爺關心疫後重整經濟的話，必然會以佢為首選。

　　波波優點當然正如上文所講，喺香港呢個國際金融中心來講當然係不可或缺，但係阿爺嘅想法亦未必係咁單一，特別係過去咁多屆特首去管香港都出現不同程度嘅問題，究竟邊一度出錯？係咪特首同太多不同界別有千絲萬縷嘅關係而令到香港管治出問題？呢個亦係最終話事人要全盤考慮嘅地方。政壇中人指出，可能就係波波一向畀人太過溫文爾雅的態度、同商界太過過從甚密嘅背景，令到佢無緣特首寶座；而家超喺各方面就正正係波波嘅相反，阿爺未必再需要關心香港喺國家安全方面嘅問題，估計家超未來主力唔係呢方面，反而係借助佢嘅強勢去全面整頓公務員架構，令到香港管治班子從回正軌。不過依家最大嘅問題係家超嘅管治班子會點樣埋班，究竟波波會唔會繼續做財爺(無論係佢自己唔想做定係阿爺唔畀佢離開)亦都係政壇拭目以待嘅，之後再同大家八一八。

(資料圖片)

　　再講一講我諗已經無乜港人關心佢去向嘅林鄭。自古以來，千算萬算都唔夠個天算，林鄭早三四個月前，亦都無諗過自己係咁樣畀阿爺拉低唔畀佢連任。林鄭好希望連任嘅取態，任何同佢有交心傾過嘅人都一清二楚，佢自己同家超連番暗鬥更成為政壇一時熱話；但係一場第五波，充分顯示出整個管治班子千蒼百孔、各自為政。而之前都講過，換轉林鄭喺內地官場的話，面對同樣嘅事情，絕對係「即炒無賠」，試問又點可以畀佢繼續連任影響整個國內同香港官場嘅睇法？既然阿爺揀得家超喺香港行「硬管治」路線，對林鄭手硬亦係意料中事。

　　唔經唔覺，立法會又去到暑假休會時間，要去到10月先會恢復會議。無會開唔代表議員係悠悠閒，事關10月就係《施政報告》公布嘅日子，呢排一眾議員就忙緊輪住「面聖」，向特首提交《施政報告》建議，希望特首接納佢哋提出嘅意見，放入去《施政報告》之中，咁亦都係完善選舉制度之後，立法會議員其中一個比較容易理解嘅KPI。

　　接納建議係一個指標，但其實立法會議員另有一個重要職能，就係監察政府運作、監察政府有無亂咁用公帑，呢方面立法會又有無起到佢嘅功用呢？近年講嘢愈來愈大膽、其中一位最資深嘅議員謝偉俊，似乎就唔多認為立法會起到監察作用，佢噚日見完特首交建議，亦都指出立法會依家嘅監察功能「失真」，例如立法會常設嘅政府帳目委員會，以及《權力及特權法》賦權成立嘅獨立調查委員會，都係為咗調查公營機構財政、監察政府運作，但最近一次帳委會只有兩個記者出席，而呢屆立法會出年就完結，至今從未召開過獨立調查委員會。

　　無獨有偶，早幾日被視為「唯一反對派」嘅議員狄志遠，亦質疑立法會監察功能較以往削弱，佢話有議員提出反對意見後，獲官員致電「唔使咁呀？」，事後更加惹來另外兩位建制派立法會議員公開反駁。

完善選舉制度後，立法會與政府的關係無以往那麼緊張。(Shutterstock)

　　Tina就以上觀點問過幾位立法會議員，一位今屆先當選嘅「嫩口」議員某程度上亦認同謝嘅講法，佢話留意到過去帳委會開記者會都係非常大陣仗，好多記者追問，之後嘅媒體篇幅都唔細；但係今屆帳委會似乎無咗相關功能，如謝偉俊所講，最近一次報告記者會，得兩個記者到場，再問番相關委員，原來當日記者係零提問，帳委會讀完新聞稿之後好快就完咗個新聞發布會，傳媒朋友對帳委會呢次報告根本係漠不關心。

　　「出現咁嘅情況有兩個可能，一就係帳委會喺審議嘅過程唔夠賣力，發現唔到政府點樣大花筒、點樣失職；另一個就係審計署本身份審計報告其實亦只不過係小罵小鬧，專門搵啲搔不著癢處嘅位去批評其他政府部門，等公眾唔好認為現屆政府有失職嘅地方。不過，就咁睇最新兩個進行公開聆訊嘅篇章，似乎又真係睇唔出審計署搵到咩政府部門有重大甩漏嘅地方，向好方面諗，就係政府部門真係有改進、公務員都係跟足程序去做嘢。」

　　然而有資深議員就特別指出，議員並唔係無監察嘅功能，只不過有啲議題可能好早就已經叫停政府，或者提出咗反對意見等政府吸收，好似垃圾徵費咁，議員反對嘅角色就非常重要，如果唔係，政府一定按時間表推出咗，都證明立法會係有監察作用嘅。嗰名資深議員同時強調，完善選舉制度之後嘅立法會亦會監察政府，不過就唔會再好似以前咁樣，透過喺立法會入面投反對票，而係事先作良好溝通，認為咁樣都係良好互動。