世事政情

　　「完善選舉制度」後第一場立法會選舉，本文刊登之後剛剛一個月就係投票日，但相信各位讀者同Tina一樣，無論喺街上面定係喺網絡上面，都完全感受唔到絲毫嘅選舉氣氛。

　　呢股淡風愈吹愈淡，建制派當然係最清楚，所以見到早一個星期開始，建制派大佬個個講投票率嗰陣，都先行為可能出現嘅低投票率解畫。譚耀宗譚Sir就話，喺比較平和、理性嘅環境之下，投票率低唔出奇，咁係反映選民認同一眾候選人，唔使特意出嚟投票支持某一派，「大家都無問題、認同，咪好放心唔出嚟囉。」

　　前立法會主席曾鈺成就分析，好多市民或者唔清楚立法會選舉投票日同選區劃分，而地區直選參選人由以往8至10隊變為現時得3至5人，無之前咁熱鬧，都可能影響選民投票意欲，佢更話「投票率低唔代表甚麼」。好明顯，大家都係做緊「期望管理」，無希望就無失望，預測得返兩成投票率，咁開出來有兩成半，大家都歡歡喜喜。

　　不過建制派嘅期望同阿爺嘅期望似乎好唔同。阿爺辛辛苦苦為香港度身訂造一個完善選舉制度，希望愛國者治港之餘，更希望大家投入呢個新選舉模式，所以做到各個界別有得選。如果做到咁都咁低投票率的話，就的確會令阿爺一番心思付諸流水。

（資料圖片）

　　有負責地區直選嘅建制派人士就透露，谷高投票率已經係最新嘅硬任務，各政黨應該都收到指示，要落實提高投票率呢個硬任務，並且只問結果不問過程，唔理大家點樣宣傳投票，最緊要就係不能太低。呢位建制派人士仲話，最吊詭嘅係，至今大家都唔知點為之高、點為之低，背後根本無人夠膽落咩指標。佢自己就估計，縱觀各建制大佬言論及估計，背後可能希望以三成為界線，超過三成就已經當交到功課，不過當Tina問佢地有無信心「達標」時，建制中人就頻頻嘆氣：「睇呢個情況，泛民支持者都幾難會行去投票站，建制支持者的話，除非係某政黨協助過嘅市民同埋一班死硬紛絲仲話容易動員佢地去投票，咁嘅選舉氣氛之下，其他人亦都幾難叫得郁，呢個硬任務應該都係難以完成喇…」

　　近呢一個星期，政壇佳話離不開「性」，就係教育局早前公布中三公經社科教材入面有關性教育部分，包括提到遏止性衝動方法可以「去球場打羽毛球」，更提議年青人要簽署承諾書制訂親密界限等。有關教材見光之後，全城「上中下左右」一片劣評，更惹得幾間重量級外媒關注，當新聞甜點咁報道，令到香港再次跌入國際嘅目光之中。

教材見光後，全城一片劣評，更惹外媒關注 (AP)

 　　有本地媒體日前就批露，一壇咁細嘅政策，最終就要放到上政府高層張枱上面，特首李家超更加要喺早會之上作出指示。據聞超超對於負責嘅政策局，即係教育局頗有意見，包括喺推出指引之前，無用到「紅隊」機制去檢視教材以至搞出個國際大笑話。

　　官場中人指出，其實成份指引內容問題不大，都係向初中生灌輸正確價值觀，所以超超唔高興嘅係，當中一啲小枝小葉無掌握得好，搞到外媒大造文章，令到香港喺國際出醜。睇返又真係勁多外媒當笑話咁講，《紐約時報》、英國廣播公司(BBC)、《泰晤士報》、《每日電訊報》、《獨立報》都有報道，之後就連意大利、印度、新加坡、台灣都有跟進，「好事不出門，呢啲咁嘅事獲得廣泛報道，其實就係證明指引部分內容確實係荒謬，事前有人跟眼睇過的話，絕對無可能咁樣就出到街。特首成日話要說好中國故事、講好香港故事，咁樣畀人唱的話，絕對唔會係特首希望見到！」

　　不過另有政壇中人就話，如果特首真係要特別講用「紅隊」去搵出政策嘅問題所在，其實某程度亦顯示出近年政壇出現嘅新常態，「以前制定政策之時，下屬發覺有乜唔妥，好多都自然會出聲；但係依家官場唔少官員都係『長官意志』強盛，下屬唔敢出聲，個個聽長官指示照做，所以先諗到另外設立『紅隊』去挑戰政策，睇下政策有乜唔妥先出街。所以某程度上亦都反映出，依家官員同公務員咁嘅心態，對於政府長遠制定政策，亦未必係一件好事。」

　　至於今次性教育後續發展，官場中人指出，教育局局長蔡若蓮都係「好打得」之人，指引出來之後惹來立法會議員江玉歡同張欣宇等嘅批評，佢都係企得好硬；不過特首既然咁樣開聲，最終肯定會「跪低」進行微調。