世事政情

　　新一年第一篇文章，先同《經濟通》讀者講聲新年快樂，希望疫情盡快過去，大家可以除低口罩，過返正常嘅生活。

　　通常新一年，大家都會想有啲新搞作，作為一個新開始。估唔到特首林鄭月娥喺疫情仍然非常嚴峻，政府全副心力用喺抗疫之時，都搞搞新噱頭，喺禮賓府拍片，同行會召集人陳智思嚟咗一次「深情對談」，講咗唔少市民都關心嘅議題，似乎係想用另一種方式，將佢自己想講嘅嘢傳遞畀市民知。

　　不過熟悉政府宣傳嘅人都知，政府向來有唔少方法去將訊息傳遞。最簡單直接，有新消息就做記者發布會，等傳媒向大眾公布；近幾年，特首都會定期去立法會接受議員質詢，議員必定會問一啲最火熱嘅問題，特首可以將政府嘅睇法好好咁表達；再唔係，特首Call一Call各傳媒老總，各傳媒都自不然會派最資深嘅記者去「配合」訪問。

　　今次林鄭自己拍片「扮」對談，做好多Youtuber都做緊嘅嘢，有資深PR就估計，背後有幾方面嘅估量。首先從片段內容去分析，今次林鄭有好多「議題」想講解，而部分議題，亦未必係傳媒或者議員會問及嘅，想講得清清楚楚，做「Youtuber」最實際。而以上呢一點，從佢去搵陳智思做對談對象就更可以睇會得到；陳係出晒名嘅「公職王」，公職遍及各類政府事務，加上為人幹練，瓣瓣都答到幾咀，由佢同林鄭對談，絕對符合晒林鄭嘅口味。

　　「但林鄭畀定份問題紙記者去問，效果一樣，做訪問更中肯，點解要搵陳智思？」的確，呢個係好多人心入面嘅疑問，但今時今日前線記者對政府嘅態度係點，大家都知，如果硬係好似之前咁搵個媒體好「配合」特首做訪問，問啲「好Soft唔硬」嘅問題，出來嘅效果仲衰過宣傳片；但如果前線記者主導問題，到時林鄭被問到尷尷尬尬，又真係倒不如拍片好過。

　　有政壇中人就指出，幾個建制政黨同林鄭唔單止心不和，幾乎都已經係面都不和，再加上疫情踏入第四波，面對建制陣營，林鄭政府可以話係四面楚歌，都唔敢期望林鄭對談會搵到政黨，「依家同政黨嘅關係已經夠晒僵，同政黨做對談，又可能畀政黨挾持開支票，倒不如建立自己嘅安全區，拍片出來自然有人傳返去北京畀阿爺睇，到時知道佢嘅難處，就唔怕畀政黨瘋狂督背脊啦！」

　　唔經唔覺，立法會又去到暑假休會時間，要去到10月先會恢復會議。無會開唔代表議員係悠悠閒，事關10月就係《施政報告》公布嘅日子，呢排一眾議員就忙緊輪住「面聖」，向特首提交《施政報告》建議，希望特首接納佢哋提出嘅意見，放入去《施政報告》之中，咁亦都係完善選舉制度之後，立法會議員其中一個比較容易理解嘅KPI。

　　接納建議係一個指標，但其實立法會議員另有一個重要職能，就係監察政府運作、監察政府有無亂咁用公帑，呢方面立法會又有無起到佢嘅功用呢？近年講嘢愈來愈大膽、其中一位最資深嘅議員謝偉俊，似乎就唔多認為立法會起到監察作用，佢噚日見完特首交建議，亦都指出立法會依家嘅監察功能「失真」，例如立法會常設嘅政府帳目委員會，以及《權力及特權法》賦權成立嘅獨立調查委員會，都係為咗調查公營機構財政、監察政府運作，但最近一次帳委會只有兩個記者出席，而呢屆立法會出年就完結，至今從未召開過獨立調查委員會。

　　無獨有偶，早幾日被視為「唯一反對派」嘅議員狄志遠，亦質疑立法會監察功能較以往削弱，佢話有議員提出反對意見後，獲官員致電「唔使咁呀？」，事後更加惹來另外兩位建制派立法會議員公開反駁。

完善選舉制度後，立法會與政府的關係無以往那麼緊張。(Shutterstock)

　　Tina就以上觀點問過幾位立法會議員，一位今屆先當選嘅「嫩口」議員某程度上亦認同謝嘅講法，佢話留意到過去帳委會開記者會都係非常大陣仗，好多記者追問，之後嘅媒體篇幅都唔細；但係今屆帳委會似乎無咗相關功能，如謝偉俊所講，最近一次報告記者會，得兩個記者到場，再問番相關委員，原來當日記者係零提問，帳委會讀完新聞稿之後好快就完咗個新聞發布會，傳媒朋友對帳委會呢次報告根本係漠不關心。

　　「出現咁嘅情況有兩個可能，一就係帳委會喺審議嘅過程唔夠賣力，發現唔到政府點樣大花筒、點樣失職；另一個就係審計署本身份審計報告其實亦只不過係小罵小鬧，專門搵啲搔不著癢處嘅位去批評其他政府部門，等公眾唔好認為現屆政府有失職嘅地方。不過，就咁睇最新兩個進行公開聆訊嘅篇章，似乎又真係睇唔出審計署搵到咩政府部門有重大甩漏嘅地方，向好方面諗，就係政府部門真係有改進、公務員都係跟足程序去做嘢。」

　　然而有資深議員就特別指出，議員並唔係無監察嘅功能，只不過有啲議題可能好早就已經叫停政府，或者提出咗反對意見等政府吸收，好似垃圾徵費咁，議員反對嘅角色就非常重要，如果唔係，政府一定按時間表推出咗，都證明立法會係有監察作用嘅。嗰名資深議員同時強調，完善選舉制度之後嘅立法會亦會監察政府，不過就唔會再好似以前咁樣，透過喺立法會入面投反對票，而係事先作良好溝通，認為咁樣都係良好互動。