世事政情

　　政治炸彈一個接一個，以為香港政圈已經夠晒多野發生，喺北京舉行兩會期間再多一個炸彈，就係人大決定要推出港版《國安法》(*筆者按：執筆之時人大尚未正式公布詳細條文)，並將佢直接插入《基本法》附件三，唔使立立亂嘅立法會通過，可以直接喺香港實施。

　　Tina唔係法律專家，太複雜嘅唔敢亂講，但《基本法》23條寫明香港政府係有責任要為國家安全「自行立法」，所以今次阿爺推行嘅港版《國安法》，為咗唔違背《基本法》23條嘅「自行立法」，所用嘅字眼同23條有明顯分別，特別係將「恐怖主義」加入以針對去年反修例以來引發嘅一連串衝擊。有建制派中人初步估計：「23條所列嘅係非常具體嘅行為，但《國安法》可能會係更廣泛，阿爺目標係一步到位，立咗《國安法》，就連立唔立23條都無乜所謂，肯定會『辣』過23條」。

　　不過喺今次突然公布推行港版《國安法》之前，香港部分建制派已經大力鼓吹23條立法，點解阿爺今次點都要冒住香港社會同國際大反彈，甚至被稱為「毀掉一國兩制」都要立法？建制派中人指出，香港形勢自去年中後急轉直下，香港出現前所未見嘅動亂難以平息，再加上區議會建制派大敗，阿爺對管治香港嘅擔心已經達致前所未見嘅警戒水平；今年立法會選舉建制派選情料難有起色，23條立法肯定遙遙無期，更重要嘅係，阿爺已經見唔到特區政府管治班子有任何人可以擔起呢個重任，自行成功訂立23條，所以拍板自行立法。

　　阿爺信唔過特區官員，從近排官員腳震震爭取表現可見一斑。先有教育局局長楊潤雄急急腳出頭要取消歷史科考題，再有商經局局長邱騰華親手殺掉港台節目《頭條新聞》，呢兩位高官向來做嘢都慢幾拍，最近秒速反應爭議事件，肯定早已經得到「關照」要盡心盡力維護國家面子。至於一眾建制派，阿爺更唔敢寄予厚望，單單係郭榮鏗事件要搞咁耐先處理到，幾位建制嘅揸弗人已經喺阿爺面前失晒分數，亦唔相信有邊個能夠擔起大旗搞掂23條。

　　阿爺既信唔過港府官員、又信唔過建制派，經此一役，「京官治港」模式將被確立，「一國兩制」相信比有名無實的處境更差。

　　唔經唔覺，立法會又去到暑假休會時間，要去到10月先會恢復會議。無會開唔代表議員係悠悠閒，事關10月就係《施政報告》公布嘅日子，呢排一眾議員就忙緊輪住「面聖」，向特首提交《施政報告》建議，希望特首接納佢哋提出嘅意見，放入去《施政報告》之中，咁亦都係完善選舉制度之後，立法會議員其中一個比較容易理解嘅KPI。

　　接納建議係一個指標，但其實立法會議員另有一個重要職能，就係監察政府運作、監察政府有無亂咁用公帑，呢方面立法會又有無起到佢嘅功用呢？近年講嘢愈來愈大膽、其中一位最資深嘅議員謝偉俊，似乎就唔多認為立法會起到監察作用，佢噚日見完特首交建議，亦都指出立法會依家嘅監察功能「失真」，例如立法會常設嘅政府帳目委員會，以及《權力及特權法》賦權成立嘅獨立調查委員會，都係為咗調查公營機構財政、監察政府運作，但最近一次帳委會只有兩個記者出席，而呢屆立法會出年就完結，至今從未召開過獨立調查委員會。

　　無獨有偶，早幾日被視為「唯一反對派」嘅議員狄志遠，亦質疑立法會監察功能較以往削弱，佢話有議員提出反對意見後，獲官員致電「唔使咁呀？」，事後更加惹來另外兩位建制派立法會議員公開反駁。

完善選舉制度後，立法會與政府的關係無以往那麼緊張。(Shutterstock)

　　Tina就以上觀點問過幾位立法會議員，一位今屆先當選嘅「嫩口」議員某程度上亦認同謝嘅講法，佢話留意到過去帳委會開記者會都係非常大陣仗，好多記者追問，之後嘅媒體篇幅都唔細；但係今屆帳委會似乎無咗相關功能，如謝偉俊所講，最近一次報告記者會，得兩個記者到場，再問番相關委員，原來當日記者係零提問，帳委會讀完新聞稿之後好快就完咗個新聞發布會，傳媒朋友對帳委會呢次報告根本係漠不關心。

　　「出現咁嘅情況有兩個可能，一就係帳委會喺審議嘅過程唔夠賣力，發現唔到政府點樣大花筒、點樣失職；另一個就係審計署本身份審計報告其實亦只不過係小罵小鬧，專門搵啲搔不著癢處嘅位去批評其他政府部門，等公眾唔好認為現屆政府有失職嘅地方。不過，就咁睇最新兩個進行公開聆訊嘅篇章，似乎又真係睇唔出審計署搵到咩政府部門有重大甩漏嘅地方，向好方面諗，就係政府部門真係有改進、公務員都係跟足程序去做嘢。」

　　然而有資深議員就特別指出，議員並唔係無監察嘅功能，只不過有啲議題可能好早就已經叫停政府，或者提出咗反對意見等政府吸收，好似垃圾徵費咁，議員反對嘅角色就非常重要，如果唔係，政府一定按時間表推出咗，都證明立法會係有監察作用嘅。嗰名資深議員同時強調，完善選舉制度之後嘅立法會亦會監察政府，不過就唔會再好似以前咁樣，透過喺立法會入面投反對票，而係事先作良好溝通，認為咁樣都係良好互動。