世事政情

　　記得Tina細個上中國歷史堂，教中史嘅阿Sir係講到歷朝更替之時，特別強調《論語》入面一句至理名言「民無信不立」，意指一個地方或政府失去咗人民對佢嘅信任，負責管治嘅政府就難以存在。而今時今日嘅林鄭政府，充分體現咩叫「民無信不立」。

　　政府喺上星期二(5日)，喺香港連續十幾日已經再無本地感染個案嘅時候，宣布向全香港市民派發「香港專利」嘅可重用口罩，公布一出，「嘩」聲四起，「嘩」政府派口罩派到疫情就嚟退卻嘅時候先嚟派之餘，亦「嘩」政府又唔招標又唔公布邊間廠做，有利益輸送之嫌。嘩嘩吓之下，登記截至5月11日止，政府話有超過280萬個登記。

　　喺今次世紀疫情之下，政府派口罩本來就係德政，雖然都係公帑畀錢去造，但話晒都唔使市民直接喺荷包拎錢買，估計政府評估過市民頂盡嘅反應都係「No Thx」，估唔到最後演變成另一場公關災難。畀市民話咁遲先派，建制派引述政府中人指出，事前已經係預計到，但疫情點樣演變都唔係政府話到事，但隨後發展到媒體質疑政府同口罩生產商利益輸送、專利問題以至口罩抗毒能力問題等等，就真係始料不及。

　　今次派口罩變派「口實」，畀市民噴到一面屁，進一步顯示林鄭政府已經去到誠信破產邊緣，淺黃深黃嘅人唔信林鄭就唔使多講，就連好多對政治唔多關心、投票多數投畀建制嘅普羅大眾，都質疑政府嘅施政目的同效率，令整體市民對政府嘅信任度跌至冰點。有建制中人就話：「政府派一萬蚊同埋多輪抗疫措施夾埋使咗二千億，但正面效果已係極速被消化，雖然多日無本地個案、疫情稍見緩和，但好明顯依家市民唔覺得係政府嘅功勞，大家都覺得係香港人自律得返來嘅成績，呢樣正正都係對政府唔信任嘅表現。」建制派中人仲話，由派發銅芯口罩事件睇到港人同政府係幾咁「不同心」，而林鄭一日在位，對建制派選情都繼續會係最大嘅威脅。

　　唔經唔覺，立法會又去到暑假休會時間，要去到10月先會恢復會議。無會開唔代表議員係悠悠閒，事關10月就係《施政報告》公布嘅日子，呢排一眾議員就忙緊輪住「面聖」，向特首提交《施政報告》建議，希望特首接納佢哋提出嘅意見，放入去《施政報告》之中，咁亦都係完善選舉制度之後，立法會議員其中一個比較容易理解嘅KPI。

　　接納建議係一個指標，但其實立法會議員另有一個重要職能，就係監察政府運作、監察政府有無亂咁用公帑，呢方面立法會又有無起到佢嘅功用呢？近年講嘢愈來愈大膽、其中一位最資深嘅議員謝偉俊，似乎就唔多認為立法會起到監察作用，佢噚日見完特首交建議，亦都指出立法會依家嘅監察功能「失真」，例如立法會常設嘅政府帳目委員會，以及《權力及特權法》賦權成立嘅獨立調查委員會，都係為咗調查公營機構財政、監察政府運作，但最近一次帳委會只有兩個記者出席，而呢屆立法會出年就完結，至今從未召開過獨立調查委員會。

　　無獨有偶，早幾日被視為「唯一反對派」嘅議員狄志遠，亦質疑立法會監察功能較以往削弱，佢話有議員提出反對意見後，獲官員致電「唔使咁呀？」，事後更加惹來另外兩位建制派立法會議員公開反駁。

完善選舉制度後，立法會與政府的關係無以往那麼緊張。(Shutterstock)

　　Tina就以上觀點問過幾位立法會議員，一位今屆先當選嘅「嫩口」議員某程度上亦認同謝嘅講法，佢話留意到過去帳委會開記者會都係非常大陣仗，好多記者追問，之後嘅媒體篇幅都唔細；但係今屆帳委會似乎無咗相關功能，如謝偉俊所講，最近一次報告記者會，得兩個記者到場，再問番相關委員，原來當日記者係零提問，帳委會讀完新聞稿之後好快就完咗個新聞發布會，傳媒朋友對帳委會呢次報告根本係漠不關心。

　　「出現咁嘅情況有兩個可能，一就係帳委會喺審議嘅過程唔夠賣力，發現唔到政府點樣大花筒、點樣失職；另一個就係審計署本身份審計報告其實亦只不過係小罵小鬧，專門搵啲搔不著癢處嘅位去批評其他政府部門，等公眾唔好認為現屆政府有失職嘅地方。不過，就咁睇最新兩個進行公開聆訊嘅篇章，似乎又真係睇唔出審計署搵到咩政府部門有重大甩漏嘅地方，向好方面諗，就係政府部門真係有改進、公務員都係跟足程序去做嘢。」

　　然而有資深議員就特別指出，議員並唔係無監察嘅功能，只不過有啲議題可能好早就已經叫停政府，或者提出咗反對意見等政府吸收，好似垃圾徵費咁，議員反對嘅角色就非常重要，如果唔係，政府一定按時間表推出咗，都證明立法會係有監察作用嘅。嗰名資深議員同時強調，完善選舉制度之後嘅立法會亦會監察政府，不過就唔會再好似以前咁樣，透過喺立法會入面投反對票，而係事先作良好溝通，認為咁樣都係良好互動。