世事政情

　　喺網絡世界，九成人都係鬧人責罵人狠話四出，但往往又唔諗諗自己有咩做錯。剛剛旅遊達人項明生喺網絡聲討秘魯港女要求包機係公主病，點知畀網民奮力聲討項亂咁鬧港女之餘又唔話參加秘魯旅行團嘅港人，更畀人翻出佢喺2月仍然身在中南美洲掃抗疫物品。說到底，「責己以周、待人以約」，又有幾多人得到？

　　先下罪己狀，Tina 2月初亦因為機票未能取消而起行去咗日本，亦有喺當地搵抗疫物資，見到日本依家情況，我真係覺得自己當日嘅行為係幾咁愚蠢。依家唯有乖乖留喺屋企做個負責任嘅人。

　　香港人唔負責任嘅行為，罄竹難書。有老豆帶住個戴手帶嘅女出去「搵食」畀人鬧到狗血淋頭；有女警唔肯戴口罩去驗血搞到驗血人員暴露風險之中。呢類消息，網上無日無之，搞到今時今日，我反而覺得面對世紀疫情之時，成龍名句：「中國人是要管的」，原來係不無道理，又或者應該講，地球人都係要管的。

　　不過講到最不負責任，林鄭又考第一，遠遠拋離其他港人，可悲嘅係，佢係香港最大嗰位，無人管到佢。

　　回帶疫症初期，佢同世衛譚德塞肝膽相照，聽從建議唔戴口罩，下令官員「戴咗都要除咗佢」之外，跟往成個政府嘅部署往往都係落後人前；關又封得慢過人、派錢又係慢過人，就連禁酒令、餐廳「限半令」等一系列措施，林鄭出招總係「出半招」留一手，難為佢今日仲夠膽自我批評話「確診病人未能入院情況不理想」而唔係直接認錯，佢又有無諗過，香港去到今時今日醫療可能爆煲嘅狀況，佢負嘅責任係最大嘅呢？

　　小女拜託林鄭，唔想做好特首份工，都做返個負責任嘅香港，依家社區明顯出現不明感染源頭，好應該要全個社會停一停，斷絕社區所有不必要社交，利用庫房龐大資源向受影響行業作出補償，只有比病毒行前一步，先有機會反擊成功。政府繼續做啲唔做啲，好多香港人亦會繼續不負責任，咁疫情只會永無止境。

　　唔經唔覺，立法會又去到暑假休會時間，要去到10月先會恢復會議。無會開唔代表議員係悠悠閒，事關10月就係《施政報告》公布嘅日子，呢排一眾議員就忙緊輪住「面聖」，向特首提交《施政報告》建議，希望特首接納佢哋提出嘅意見，放入去《施政報告》之中，咁亦都係完善選舉制度之後，立法會議員其中一個比較容易理解嘅KPI。

　　接納建議係一個指標，但其實立法會議員另有一個重要職能，就係監察政府運作、監察政府有無亂咁用公帑，呢方面立法會又有無起到佢嘅功用呢？近年講嘢愈來愈大膽、其中一位最資深嘅議員謝偉俊，似乎就唔多認為立法會起到監察作用，佢噚日見完特首交建議，亦都指出立法會依家嘅監察功能「失真」，例如立法會常設嘅政府帳目委員會，以及《權力及特權法》賦權成立嘅獨立調查委員會，都係為咗調查公營機構財政、監察政府運作，但最近一次帳委會只有兩個記者出席，而呢屆立法會出年就完結，至今從未召開過獨立調查委員會。

　　無獨有偶，早幾日被視為「唯一反對派」嘅議員狄志遠，亦質疑立法會監察功能較以往削弱，佢話有議員提出反對意見後，獲官員致電「唔使咁呀？」，事後更加惹來另外兩位建制派立法會議員公開反駁。

完善選舉制度後，立法會與政府的關係無以往那麼緊張。(Shutterstock)

　　Tina就以上觀點問過幾位立法會議員，一位今屆先當選嘅「嫩口」議員某程度上亦認同謝嘅講法，佢話留意到過去帳委會開記者會都係非常大陣仗，好多記者追問，之後嘅媒體篇幅都唔細；但係今屆帳委會似乎無咗相關功能，如謝偉俊所講，最近一次報告記者會，得兩個記者到場，再問番相關委員，原來當日記者係零提問，帳委會讀完新聞稿之後好快就完咗個新聞發布會，傳媒朋友對帳委會呢次報告根本係漠不關心。

　　「出現咁嘅情況有兩個可能，一就係帳委會喺審議嘅過程唔夠賣力，發現唔到政府點樣大花筒、點樣失職；另一個就係審計署本身份審計報告其實亦只不過係小罵小鬧，專門搵啲搔不著癢處嘅位去批評其他政府部門，等公眾唔好認為現屆政府有失職嘅地方。不過，就咁睇最新兩個進行公開聆訊嘅篇章，似乎又真係睇唔出審計署搵到咩政府部門有重大甩漏嘅地方，向好方面諗，就係政府部門真係有改進、公務員都係跟足程序去做嘢。」

　　然而有資深議員就特別指出，議員並唔係無監察嘅功能，只不過有啲議題可能好早就已經叫停政府，或者提出咗反對意見等政府吸收，好似垃圾徵費咁，議員反對嘅角色就非常重要，如果唔係，政府一定按時間表推出咗，都證明立法會係有監察作用嘅。嗰名資深議員同時強調，完善選舉制度之後嘅立法會亦會監察政府，不過就唔會再好似以前咁樣，透過喺立法會入面投反對票，而係事先作良好溝通，認為咁樣都係良好互動。