世事政情

立會透視鏡
11/02/2019

單挑領展大山,葉劉立不敗之地

#葉劉淑儀 #領展 #麥美娟 #立法會

  一到選舉年,政治人物自必然動作多多,而踏入豬年,第一個「衝豬」嘅估唔到就係新民黨主席葉劉淑儀。葉劉無神神掟出一個私人條例草案,建議修例為原為房委會旗下、已出售或轉售嘅商場、車位等物業引入租金增幅管制、空置稅及現有租戶優先續租權,正式喺人日之前將一份大禮送畀譽為「香港大山」嘅領展。

 

  議員嘅私人條例草案,先唔好諗過唔過到立法會嘅分組點票,第一步首先係要得到葉劉「妹妹」林鄭月娥嘅首肯,條例先可以掟去立法會討論同投票。咁「妹妹」又有咩點要考慮?首先,香港一向係最自由嘅經濟體,喺香港營商,無論係中資外資本地資,大家都人人平等,無乜政策嘅干預,呢個係香港賴以成功嘅基石;葉劉呢個條例草案,只係針對領展旗下嘅物業,擺到明就係一下鑿爛呢個基石,Tina相信無論林鄭有幾唔鍾意領展,都犯不著要為「姐姐」抬轎,估計呢個草案連去到立法會嘅機會都偏低。

 

  既然係咁,作為行政會議成員之一嘅葉劉又為乜要搞場大龍鳳?有政圈中人就分析,今次葉劉單挑領展大山,無論成唔成功,都必然俘虜全港十八區公屋嘅心,全港民望大幅飆升,唔再只係做中產票后;而咁樣最大嘅好處係爭取到籌碼畀葉劉明年出戰超級區議會嘅界別去拎立法會入場券,而港島嘅席位就可以交捧畀返上次補選輸咗嘅陳家珮,所以條例草案成敗與否唔仲要,真係項莊舞劍,意在沛公。

 

  呢個亦都解釋到點解葉劉只係搵到工聯會麥美娟而搵唔到民建聯一齊撐呢個條例草案,事關民建聯李慧琼同埋周浩鼎上屆拎左兩席超區,如果葉劉嚟緊呢一屆又真係埋位搶一席的話,周浩鼎一齊選而又選到嘅機會自必然大大降低,最後可能會走返去新西出選,又影響到同區黨友嘅布置。所以話嚟緊睇民建聯點樣回應葉劉呢個條例草案(又唔可以抬轎、又唔可以得失公屋選民)就係最過癮嘅新年節目喇!

 

  最後恭祝各位經濟通讀者豬年豬籠入水、珠光寶氣!

 

29/01/2024

23條立法,重視程度遠高於《國安法》

#國安法 #立會透視鏡 #李家超 #葉劉淑儀 #廖長江 #梁美芬 #張宇人 #鄧炳強 #23條立法 #立法會 #港聞娛樂

  行政長官李家超上星期去立法會出席互動交流會,其中一個環節係專講《基本法》23條立法,議員發言發問極為踴躍,大家發言嘅方向,同當年由葉劉淑儀做局長推銷23條立法時真係天淵之別,議員全程零質疑,掉番轉頭係全面配合立法。

 

  23條立法如箭在弦,咁站在政府嘅角度,擔心嘅當然唔再係條例會唔會過,而係條例掟咗出嚟之後,外界特別係外資、外國領事、所有嘅外部勢力,對條例嘅睇法係點,任何可能會觸動到反對聲音嘅「星星之火」,都要盡可能喺擴散之前整熄佢。

 

  所以李家超先會特別提到,會設立「應變反駁隊」,專門去監察所有網上輿情,做好應變工作。至於「應變反駁隊」由邊個主導,據聞就會由玩社交媒體特別出色,兼且係主責立法工作嘅保安局局長鄧炳強親自操刀,其他相關嘅司、局、處,例如律政司、新聞處等等,都會喺「應變反駁隊」中有一席位,負責協調工作。

 

《基本法》23條是有關國家安全的條款,禁止七類危害國安的行為。(資料圖片)

 

  有政圈中人就指出,今次23條立法,感覺上重視程度仲緊要過《香港國安法》,而用「反駁隊」呢個名,好明顯睇得出,政府係預咗會有好多針對23條立法嘅不實言論喺網上傳出,甚至係用懶人包等方式,喺社交媒體、通訊軟件等快速傳播。政圈中人仲話,呢啲不實言論估計都係由海外傳番過嚟香港,要執法係非常困難,所以最快嘅做法唔係澄清,而係反駁。所以特首用「反駁隊」呢個名,就係想採取一個主動權,一有不實,就撲出嚟反駁,而「反駁隊」成員更可能要分更長時期運作,避免一啲不實言論喺凌晨時分傳出,到早上先反駁就已經處於下風。

 

  另外聽聞,立法會每一個板塊都將會全方位工作去配合23條立法,地區、功能組別同選委界別都各自會被安排任務,要做到滴水不漏。至於重中之重,當然就係成立法案委員會去審議23條,聽聞唔少議員都相當踴躍,已經打定開口牌,估計要抽籤先入到去委員會。而頭牌做主席嘅更會係「名流青史」,所以幾個大牌議員都表示有興趣,自由黨張宇人已經話自己乜嘢委員會主席都無,就係為咗審23條。過去佢都立咗不少汗馬功勞,包括中大改革等等,但係佢身兼行會成員嘅身份就似乎有欠公正性,再加上佢唔係法律界,要審呢條法律似乎未必安到政府嘅心。如果要喺有律師背景嘅議員之中搵個「定海神針」,似乎廖長江或者梁美芬就最大可能,不過都要睇睇背後各方勢力嘅角力,先能夠定到主席人選。

#食譜 #素食 #數碼營銷 #電影 #移民 #減肥 #創科 #Netflix #外賣 #辦公室貼士 #疫情 #在家運動 #WFH #抗疫不悶 #限聚令 #辦公室求生術
more on etnet.com.hk