財智

　　香港在去年第四季，負資產數目急升至二萬五，比第三季多一倍，香港政府大為緊張，因為繼續倍翻，到了今年第二季，就會有十萬個負資產，媲美2003年的高峰期，政府官員相信已經開了很多次會議，商量怎樣解決問題。

　　有老友問我負資產的問題如何解決，老友所問非人，我又唔係官員，知道點樣解決都冇用。不過，根本唔使花心機去解決，本來天下本無事，只不過是庸人自擾之，負資產是人造產品，不過不是特登去做，而是在不知不覺間造出來，如果不撥亂反正，到了今年第二季，負資產宗數可能超過十萬。至於如何撥亂反正，簡單到不得了，就是銀行停止call loan，唔call loan就唔會出現負資產，講都冇人信。

(資料圖片)

　　有人話我搞錯，銀行停止call loan，只會損失更大，絕對行唔通。那人唔明白，今日銀行call loan是與以往不同，銀行不會向那些接近資不抵債的人call loan，而是向按揭借貸比率不足五成的業主call loan，不少被call的業主不勝其煩，唯有以市價八、九折賣走手上一兩個物業，將按揭借貸比率降至四成，滿足銀行要求。但銀行唔知道咁樣做，其實是給了自己很大麻煩，被call的業主沒有問題，但由於那些業主以低價賣樓，做成樓價下跌，那些用八、九成按揭上車的業主，他們的物業有機會變成負資產，雖然銀行是不會向那些負資產業主call loan，但難保他們自動放棄，對於銀行來說，根本是一個大包袱，這是否庸人自擾之。

　　如果銀行唔向那些按揭貸款比率低於五成的業主call loan，那些業主根本唔會以市價八、九折賣樓，樓價就唔會跌，那些用高成數做按揭業主的單位，就不會變成負資產，由此可見，負資產是由銀行製造出來的。

　　今年即使在年初時撤辣，但樓價仍然下跌3%，大部分專家都認為今年樓價仍然會下跌，幅度大約5至10%，傳媒話有玄學家8年前已經預測得到，當時玄學家話，2024年區區都唔旺，判了香港死刑，其實，玄學家意思是2024年之後香港才轉弱，而事實上到了2024年，香港樓價已經比高峰時下跌了25%，如果繼續下跌，咁樣就真係大件事，嚴格來說，玄學家的預測不算準確，甚至他自己都不信自己，既然話2024年之後區區都唔旺，點解在兩年前買了一幢小型商業樓。

（Shutterstock）

　　我認為只要有一個條件，樓價下半年不但不會下跌，甚至不跌反升，有人話唔使問阿貴，一定是減息，如果美聯儲局開始減息，樓價就唔會下跌，老實說，這個可能性非常之高，但主動權不在香港手裡，拜登傻傻戇戇，唔知道減息是競選連任的一大優勢，遲遲唔肯減息，現在民調比特朗普拋離，就算減息作用亦不大，甚至唔減好過減，或者會有意想不到的收穫。

　　有人話，只要銀行唔call loan，樓價就不會下跌，其實，銀行只是向商業物業，或者持有多個住宅單位的業主call loan，並沒有向只有一個自住單位，而又準時還款的業主call loan，但住宅價格仍然下跌，所以，唔call loan這個條件對樓市影響亦不是咁大，不會因為銀行唔call loan令樓市不跌甚至反升。

　　有很多人不明白，在過去20個月，租金差不多個個月都升，而樓價只是在撤辣後有一陣虛火，但亦只不過升了兩個月，其他時間全部下跌，租金升，樓價跌是一個反常現象，其實，很多租客都有打算買樓，但銀行唔做按揭，他們唯有暫時租樓住，所以一個條件就是如果銀行在下半年願意借錢俾人買樓，不少現在租樓的人就會買樓，多了人買樓，樓價自然會上升。