財智

　　上星期有一日早上去了一間相熟茶餐廳，有客人叫我簽名支持分拆匯豐(00005)，我不但唔簽，仲反問點解要分拆匯豐，分拆匯豐好似將一個大單邊舖一分為二，變成一個小單邊舖，以及一個普通舖位，香港就是那個普通舖位，損失幾多很難預計，一般投資者都會想盡辦法將一個小單邊舖以及幾個舖位變成一個大單邊舖，冇人會咁蠢反其道而行，簽名支持即是倒自己米。

 （資料圖片）

　　大約一年前，彭博已經問過我匯豐是否應該分拆，我當時的答案與現在一樣，但理由不同，我對彭博講，我有不少國內老友，全部在匯豐都有戶口，他們擔心匯豐分拆，以後變成一間香港本土銀行，失去了與歐洲聯繫的作用，到時候他們被迫搵另一間銀行代替，一個唔好彩搵到一間被人低價收購的銀行就大件事，我不是講笑，如果匯豐去年分拆，估計會有不少戶口搬去瑞信，結果大家都應該知道。我的國內老友全部都唔贊成分拆，我亦唔贊成。

　　雖然有聲音要求匯豐分拆，但其實不是太多，只是不斷重覆，又打人叮人戰術，令人覺得很多香港人要求分拆匯豐。老闆立刻做一個實驗，馬上不記名投票，結果是在場20個客人，只有兩個贊成，兩個冇意見，其他都不贊成。雖然，或多或少都是因為我的解釋，但大多數客人亦有分析能力，我的解釋只是他們分析理據之一。

　　今年即使在年初時撤辣，但樓價仍然下跌3%，大部分專家都認為今年樓價仍然會下跌，幅度大約5至10%，傳媒話有玄學家8年前已經預測得到，當時玄學家話，2024年區區都唔旺，判了香港死刑，其實，玄學家意思是2024年之後香港才轉弱，而事實上到了2024年，香港樓價已經比高峰時下跌了25%，如果繼續下跌，咁樣就真係大件事，嚴格來說，玄學家的預測不算準確，甚至他自己都不信自己，既然話2024年之後區區都唔旺，點解在兩年前買了一幢小型商業樓。

（Shutterstock）

　　我認為只要有一個條件，樓價下半年不但不會下跌，甚至不跌反升，有人話唔使問阿貴，一定是減息，如果美聯儲局開始減息，樓價就唔會下跌，老實說，這個可能性非常之高，但主動權不在香港手裡，拜登傻傻戇戇，唔知道減息是競選連任的一大優勢，遲遲唔肯減息，現在民調比特朗普拋離，就算減息作用亦不大，甚至唔減好過減，或者會有意想不到的收穫。

　　有人話，只要銀行唔call loan，樓價就不會下跌，其實，銀行只是向商業物業，或者持有多個住宅單位的業主call loan，並沒有向只有一個自住單位，而又準時還款的業主call loan，但住宅價格仍然下跌，所以，唔call loan這個條件對樓市影響亦不是咁大，不會因為銀行唔call loan令樓市不跌甚至反升。

　　有很多人不明白，在過去20個月，租金差不多個個月都升，而樓價只是在撤辣後有一陣虛火，但亦只不過升了兩個月，其他時間全部下跌，租金升，樓價跌是一個反常現象，其實，很多租客都有打算買樓，但銀行唔做按揭，他們唯有暫時租樓住，所以一個條件就是如果銀行在下半年願意借錢俾人買樓，不少現在租樓的人就會買樓，多了人買樓，樓價自然會上升。