財智

　　中原指數連跌六個星期，不少睇淡樓市的人非常雀躍，認為自己眼光獨到，其實不是眼光獨到，因為大部分評論員都表示香港樓市缺乏投資價值，即使叫大家唔好買樓，冇人買，樓市自然會下跌，本來物業代理界的評論員死雞撐飯蓋都要睇好樓市，但奈何他們要搵食，如果唔講樓市大跌，冇人賣樓，食穀種都唔掂，而事實上亦有成果，對上一個星期二手樓成交量大升一倍，本來成交量大增是反彈先兆，但物業代理界話價跌量跌，仍然睇淡樓市，或者他們是對的，但有違市場規律。

　　香港樓市在過去三年，經歷社運以及因疫情封關，但樓價只是下跌了7%，雖然有移民英國的評論員質疑數字做假，但事實上香港樓價真的不是下跌太多，但傳媒只是集中報道劈價蝕讓的成交，對於賺錢的就輕輕帶過，令人誤會樓市大跌，尤其是用BNO移民去英國的香港人，他們當然希望離開之後香港樓價大跌，這證明他們的移民決定是英明神武，其實，如果不是英國有BNO移民計劃，香港的樓價根本不會下跌，因為BNO計劃要求移民去英國的香港人首先做賦稅居民，全球收入以及資產升值都要交稅，如果入境前唔賣樓，有可能以及所得利潤要與英國政府四六分帳，所以，那些用BNO身份去英國的人話睇淡樓市而急急忙忙賣樓。如果我是英國政府一定會很嬲，那些BNOer寧願蝕讓都唔想日後益英國政府。

(iStock)

　　不少人唔明白不少半新樓的業主亦會話加息而劈價賣樓，而且劈價的幅度相當大，如果擔心加息，三四年前就唔應該買樓。其實理由很簡單，就是那些業主當日買樓的時候有機會獲得巨額回贈，即使劈價賣樓亦可能打個和，而那些業主的借貸比率是相當高，甚至有一些是用呼吸plan買樓，他們擔心加息而令他們供樓的負擔大增而是可以理解，既然唔使蝕，點解唔賣樓，起碼都曾經做過業主，如果樓市大跌，他們幾咁英明神武，倘若樓市上升就隻字不提，冇人會記得那些業主。
　

　　今年即使在年初時撤辣，但樓價仍然下跌3%，大部分專家都認為今年樓價仍然會下跌，幅度大約5至10%，傳媒話有玄學家8年前已經預測得到，當時玄學家話，2024年區區都唔旺，判了香港死刑，其實，玄學家意思是2024年之後香港才轉弱，而事實上到了2024年，香港樓價已經比高峰時下跌了25%，如果繼續下跌，咁樣就真係大件事，嚴格來說，玄學家的預測不算準確，甚至他自己都不信自己，既然話2024年之後區區都唔旺，點解在兩年前買了一幢小型商業樓。

（Shutterstock）

　　我認為只要有一個條件，樓價下半年不但不會下跌，甚至不跌反升，有人話唔使問阿貴，一定是減息，如果美聯儲局開始減息，樓價就唔會下跌，老實說，這個可能性非常之高，但主動權不在香港手裡，拜登傻傻戇戇，唔知道減息是競選連任的一大優勢，遲遲唔肯減息，現在民調比特朗普拋離，就算減息作用亦不大，甚至唔減好過減，或者會有意想不到的收穫。

　　有人話，只要銀行唔call loan，樓價就不會下跌，其實，銀行只是向商業物業，或者持有多個住宅單位的業主call loan，並沒有向只有一個自住單位，而又準時還款的業主call loan，但住宅價格仍然下跌，所以，唔call loan這個條件對樓市影響亦不是咁大，不會因為銀行唔call loan令樓市不跌甚至反升。

　　有很多人不明白，在過去20個月，租金差不多個個月都升，而樓價只是在撤辣後有一陣虛火，但亦只不過升了兩個月，其他時間全部下跌，租金升，樓價跌是一個反常現象，其實，很多租客都有打算買樓，但銀行唔做按揭，他們唯有暫時租樓住，所以一個條件就是如果銀行在下半年願意借錢俾人買樓，不少現在租樓的人就會買樓，多了人買樓，樓價自然會上升。