財智

　　近日唔知點解，所有人都話樓市下跌，有老友見我們有不少物業，不停追問我點解唔賣樓，否則利息上升，想賣都冇人要，我話公司的物業借貸比率不高，回報亦合格，我亦睇唔到樓市會下跌到一個災難式地步，實在是沒有必要賣樓，老友對我的答案不滿意，彷彿現在唔賣樓就是罪過。

（iStock）

　　我同老友講，現在賣樓的是甚麼人，大多數是財務有困難的人，打算移民的人，俾人嚇到要賣樓的人，我唔想同那些人爭飯食，所以唔賣樓，如果我們現在也賣樓，打算買樓的人一定會壓價，那些賣樓的業主一定會受到損失，那些錢對他們來說是非常重要，我唔會做衰人，即使日後樓價大跌，我們損失慘重，就當做了好事，做生意，唔係一定要贏到盡，現在唔同那些急於賣樓的人爭，樓價跌幅一定會減少，最後是幫了別人亦幫了自己。

　　老友始終認為我很蠢，我反問老友睇樓市會不會跌兩成，或者中原指數跌至150點，老友話唔敢肯定，我話唔敢肯定就更加唔好賣樓，萬一樓價唔跌甚至升，現在無端端賣了樓的人就損失慘重，而事實上有不少人，在沒有必要情況下將自住單位賣走，到最後只能租樓住，好彩的就可以買回一個面積比較細，質素比較差的單位。至於現在點解有咁多人話樓市下跌，這叫做法不責眾，咁多人一齊錯，即是大家都冇錯，我並不是話樓市不會下跌，而事實上在美國瘋狂加息之下，香港樓市一定會受到影響，但未至於要在沒有需要的情況下賣樓，這就是我唔賣樓的原因。

　　我同老友講，現在賣樓的人一定有自己的原因，但多數唔會講真說話，只會話睇淡樓市，老實說，太多專業人士講樓市下跌，對那些打算賣樓的人沒有影響，只是嚇窒了沒有壓力賣樓的人，無端端將自住單位賣走。

　　今年即使在年初時撤辣，但樓價仍然下跌3%，大部分專家都認為今年樓價仍然會下跌，幅度大約5至10%，傳媒話有玄學家8年前已經預測得到，當時玄學家話，2024年區區都唔旺，判了香港死刑，其實，玄學家意思是2024年之後香港才轉弱，而事實上到了2024年，香港樓價已經比高峰時下跌了25%，如果繼續下跌，咁樣就真係大件事，嚴格來說，玄學家的預測不算準確，甚至他自己都不信自己，既然話2024年之後區區都唔旺，點解在兩年前買了一幢小型商業樓。

（Shutterstock）

　　我認為只要有一個條件，樓價下半年不但不會下跌，甚至不跌反升，有人話唔使問阿貴，一定是減息，如果美聯儲局開始減息，樓價就唔會下跌，老實說，這個可能性非常之高，但主動權不在香港手裡，拜登傻傻戇戇，唔知道減息是競選連任的一大優勢，遲遲唔肯減息，現在民調比特朗普拋離，就算減息作用亦不大，甚至唔減好過減，或者會有意想不到的收穫。

　　有人話，只要銀行唔call loan，樓價就不會下跌，其實，銀行只是向商業物業，或者持有多個住宅單位的業主call loan，並沒有向只有一個自住單位，而又準時還款的業主call loan，但住宅價格仍然下跌，所以，唔call loan這個條件對樓市影響亦不是咁大，不會因為銀行唔call loan令樓市不跌甚至反升。

　　有很多人不明白，在過去20個月，租金差不多個個月都升，而樓價只是在撤辣後有一陣虛火，但亦只不過升了兩個月，其他時間全部下跌，租金升，樓價跌是一個反常現象，其實，很多租客都有打算買樓，但銀行唔做按揭，他們唯有暫時租樓住，所以一個條件就是如果銀行在下半年願意借錢俾人買樓，不少現在租樓的人就會買樓，多了人買樓，樓價自然會上升。