財智

　　有著名股票分析員兩公婆打算每人買一個新住宅，仲要大單位，很可惜，雖然兩個一齊買機會較高，但仍然買唔到，問我有冇計，我話冇，不過，地產商見到形勢大好，一定會打鐵趁熱，加推新樓單位，一定可以買到，不過可能會貴些少，分析員話，貴些少冇問題，最緊要買到。

　　我唔知政府有冇留意新樓熱賣，如果有留意，應該重推較早前的限呎流標地，我夠膽講，如果重推，有九成以上機會可以賣得成，但很可惜，政府有各種機制卡住，不能打鐵趁熱，在短時間內推出流標地再次招標，可能浪費了一次賣地的好時機。

　　老實說，政府賣地愈多條件限制，地價一定會愈低，較早前政府第一次推限呎地，大家都未能掌握市場對較大單位反應，發展商只會用試水溫式落標，如果投到而市場反應又不佳，損失亦唔會咁大，但自從新樓盤開售之後，較大單位比納米樓的需求大得多，就算所投得的土地沒有限呎，地產商都會興建比較大的單位，唔會考慮興建納米樓，限呎的不利因素消失，土地價值自然會提高。

發展局局長黃偉綸。 (資料圖片)

　　有了最近的新樓銷售成績，不少有落標的地產商都會後悔，他們會認為，如果當時出高一些價，或者可以奪得土地，所以，如果政府重推土地，有很大機會可以成功出售，至於政府內部機制如何處理，我們不時聽到有人說特事特辦，即時重推土地也可以特事特辦，理由是打鐵趁熱。

　　今年即使在年初時撤辣，但樓價仍然下跌3%，大部分專家都認為今年樓價仍然會下跌，幅度大約5至10%，傳媒話有玄學家8年前已經預測得到，當時玄學家話，2024年區區都唔旺，判了香港死刑，其實，玄學家意思是2024年之後香港才轉弱，而事實上到了2024年，香港樓價已經比高峰時下跌了25%，如果繼續下跌，咁樣就真係大件事，嚴格來說，玄學家的預測不算準確，甚至他自己都不信自己，既然話2024年之後區區都唔旺，點解在兩年前買了一幢小型商業樓。

（Shutterstock）

　　我認為只要有一個條件，樓價下半年不但不會下跌，甚至不跌反升，有人話唔使問阿貴，一定是減息，如果美聯儲局開始減息，樓價就唔會下跌，老實說，這個可能性非常之高，但主動權不在香港手裡，拜登傻傻戇戇，唔知道減息是競選連任的一大優勢，遲遲唔肯減息，現在民調比特朗普拋離，就算減息作用亦不大，甚至唔減好過減，或者會有意想不到的收穫。

　　有人話，只要銀行唔call loan，樓價就不會下跌，其實，銀行只是向商業物業，或者持有多個住宅單位的業主call loan，並沒有向只有一個自住單位，而又準時還款的業主call loan，但住宅價格仍然下跌，所以，唔call loan這個條件對樓市影響亦不是咁大，不會因為銀行唔call loan令樓市不跌甚至反升。

　　有很多人不明白，在過去20個月，租金差不多個個月都升，而樓價只是在撤辣後有一陣虛火，但亦只不過升了兩個月，其他時間全部下跌，租金升，樓價跌是一個反常現象，其實，很多租客都有打算買樓，但銀行唔做按揭，他們唯有暫時租樓住，所以一個條件就是如果銀行在下半年願意借錢俾人買樓，不少現在租樓的人就會買樓，多了人買樓，樓價自然會上升。