財智

　　每當大型百貨公司大減的時候，公司女同事就會在午飯時間或者放工後大買特買，我問點解唔怕買貴左，女同事話唔怕，因為平時已經睇啱，不過太貴，知道百貨公司每年會有春秋二祭，以大減價形式回饋顧客，所以當百貨公司大減價，立刻身先士卒去搶貨，仲話係我教，買靚樓荀樓是可求不可遇，而非可遇不可求，去百貨公司搶貨也是一樣，孺女可教也。

　　近日物業市場受到新冠肺炎疫情影響，買賣兩難，成交量非常少，我叫營業部同事向女同事學習，現在用多些少時間去睇樓盤。老實說，現在亦只是得個睇字，業主是不會減價，但如果有一日，某些業主因為財務問題而大幅減價，到時公司可以儘快做到決定，因為有很多人如果唔打算買樓，根本唔會睇樓，當他們見到樓價下跌而有心買樓的時候，物業已經被其他有心人買走了。所以，在樓市淡靜時去睇樓是物業投資者的功課，平時唔做功課，考試又怎會有好成績，況且，現在物業代理又非常樂意帶客戶去睇樓，如果是市旺的時候，難保有一些物業代理會話，如果冇興趣買就無謂睇，未睇樓先睇代理面色，但絕對不能夠怪他們，大家都要搵食，在市旺，如果不打算買樓的確唔好浪費別人時間。

　　在個多月前，TVB同我做訪問，主持問我當時是否可以買樓，我話可以，不過要買優質單位，當時在市場上亦有不少優質單位出售，前幾日，同一個節目又同我做訪問，主持人話在上一次做完訪問之後，她有留意大部分成交都是優質單位，所以樓價在疫市下都沒有下跌，但現在形勢有所改變，優質單位已經很少，而且叫價不菲，現在大部分成交都是質素比較差的單位，成交價亦比以往稍低，造成樓價下跌現象，主持相當細心，她說的一番話應該由我講，的而且確現在樓價下跌是一個假象，因為現在的低價成交的單位質素不及較早前成交的，如果是同樣質素的話，樓價會比以前高，所以，如果唔做功課，根本察覺不到樓市有這樣的變化。

　　今年即使在年初時撤辣，但樓價仍然下跌3%，大部分專家都認為今年樓價仍然會下跌，幅度大約5至10%，傳媒話有玄學家8年前已經預測得到，當時玄學家話，2024年區區都唔旺，判了香港死刑，其實，玄學家意思是2024年之後香港才轉弱，而事實上到了2024年，香港樓價已經比高峰時下跌了25%，如果繼續下跌，咁樣就真係大件事，嚴格來說，玄學家的預測不算準確，甚至他自己都不信自己，既然話2024年之後區區都唔旺，點解在兩年前買了一幢小型商業樓。

（Shutterstock）

　　我認為只要有一個條件，樓價下半年不但不會下跌，甚至不跌反升，有人話唔使問阿貴，一定是減息，如果美聯儲局開始減息，樓價就唔會下跌，老實說，這個可能性非常之高，但主動權不在香港手裡，拜登傻傻戇戇，唔知道減息是競選連任的一大優勢，遲遲唔肯減息，現在民調比特朗普拋離，就算減息作用亦不大，甚至唔減好過減，或者會有意想不到的收穫。

　　有人話，只要銀行唔call loan，樓價就不會下跌，其實，銀行只是向商業物業，或者持有多個住宅單位的業主call loan，並沒有向只有一個自住單位，而又準時還款的業主call loan，但住宅價格仍然下跌，所以，唔call loan這個條件對樓市影響亦不是咁大，不會因為銀行唔call loan令樓市不跌甚至反升。

　　有很多人不明白，在過去20個月，租金差不多個個月都升，而樓價只是在撤辣後有一陣虛火，但亦只不過升了兩個月，其他時間全部下跌，租金升，樓價跌是一個反常現象，其實，很多租客都有打算買樓，但銀行唔做按揭，他們唯有暫時租樓住，所以一個條件就是如果銀行在下半年願意借錢俾人買樓，不少現在租樓的人就會買樓，多了人買樓，樓價自然會上升。