財智

　　信置突然以低市價三成開售觀塘裕民坊凱匯，成績驕人，一Q清枱之後還是一Q清袋，有年輕朋友連續兩次落第，到了第三次已經信心盡失，問我在信置內部識唔識人，可不可以幫他，最低限度俾一個機會佢去揀樓，年輕朋友未買過樓，不知道現在買樓的程序是相當嚴謹，叫信置內部幫忙，連提都唔好提，否則有機會被邀請去飲咖啡。

　　年輕朋友話如果第三次都抽唔到，他應該怎樣做，我話值得恭喜，因為凱匯make your purchasing power great again，當第三次仍然抽不到，代表有千多個實在購買力已經買了凱匯，市場上少了那一批購買力，剩餘的購買力反而會變成天之驕子，打算賣樓的業主因為沒有足夠購買力，唯有減價才可以將單位賣走，現在剩餘的購買力可以慢慢睇慢慢揀，根本不用自己鋤價，凱匯無形中迫那些打算賣樓的業主減價。

　　凱匯成功，一定會有其他地產商跟隨，劈價賣樓就會變成新常態，市場上的購買力就會被新樓盤吃掉，剩餘的購買力反而有更大的議價能力，話唔定可以用非常優惠價錢買到非常優質單位，所以，抽唔到或者揀唔到合心水單位的人不應氣餒，或者這是他們的福份，可以從二手樓巿場上揀到適合自己的單位。

　　有一件事買家一定要留意，當打算買樓的人在市場上楝到適合自己的單位，就千祈唔好猶疑，或者擔心樓價會繼續下跌，老實說，誰人都不敢保證樓價是否會繼續下跌，但如果不下定决心去買樓，就永遠都無機會買到樓，現在是買家時間，買到新樓固然是好，但買唔到竟然更好，但如果不在這段時間買到適合自己單位，即是捉到鹿唔識脫角，好都變成唔好。

　　今年即使在年初時撤辣，但樓價仍然下跌3%，大部分專家都認為今年樓價仍然會下跌，幅度大約5至10%，傳媒話有玄學家8年前已經預測得到，當時玄學家話，2024年區區都唔旺，判了香港死刑，其實，玄學家意思是2024年之後香港才轉弱，而事實上到了2024年，香港樓價已經比高峰時下跌了25%，如果繼續下跌，咁樣就真係大件事，嚴格來說，玄學家的預測不算準確，甚至他自己都不信自己，既然話2024年之後區區都唔旺，點解在兩年前買了一幢小型商業樓。

（Shutterstock）

　　我認為只要有一個條件，樓價下半年不但不會下跌，甚至不跌反升，有人話唔使問阿貴，一定是減息，如果美聯儲局開始減息，樓價就唔會下跌，老實說，這個可能性非常之高，但主動權不在香港手裡，拜登傻傻戇戇，唔知道減息是競選連任的一大優勢，遲遲唔肯減息，現在民調比特朗普拋離，就算減息作用亦不大，甚至唔減好過減，或者會有意想不到的收穫。

　　有人話，只要銀行唔call loan，樓價就不會下跌，其實，銀行只是向商業物業，或者持有多個住宅單位的業主call loan，並沒有向只有一個自住單位，而又準時還款的業主call loan，但住宅價格仍然下跌，所以，唔call loan這個條件對樓市影響亦不是咁大，不會因為銀行唔call loan令樓市不跌甚至反升。

　　有很多人不明白，在過去20個月，租金差不多個個月都升，而樓價只是在撤辣後有一陣虛火，但亦只不過升了兩個月，其他時間全部下跌，租金升，樓價跌是一個反常現象，其實，很多租客都有打算買樓，但銀行唔做按揭，他們唯有暫時租樓住，所以一個條件就是如果銀行在下半年願意借錢俾人買樓，不少現在租樓的人就會買樓，多了人買樓，樓價自然會上升。