【必睇掃街攻略】走遍花園街 食盡傳奇6大美食小店
「花園街」可說是充滿香港情懷的老地方，街道中心擺滿攤檔，小販一攤接一攤，佈滿整條長街，價廉物美的貨品應有盡有，不單有賣衣服飾品及生活用品等小商品，同樣在街頭巷尾也可以找到許多美食小店，咖哩魚蛋、碗仔翅、魚肉燒賣、煎釀三寶，甚至各類水果應有盡有，購物之餘還可以「掃街」，一次過可以滿足大家兩個願望！
「花園街」美食小店多不勝數，小編當然要率先為大家準備不可錯過的「掃街攻略」啦！今次介紹的小店有的是本年度米芝蓮推介，有的是扎根花園街多年的老字號，亦有美食「過江龍」，更有新開的格調小店，一定有間啱你心水！
米芝蓮創意薯店－叁薯
叁薯是太子小食新店，主要售賣三款煮法的薯仔，以焗、煎及薯蓉為主，全部即叫即做，廣受大眾歡迎，佢更榮獲2016年米芝蓮街頭小食推介，既然要掃花園街，當然必先要前來拜訪佢啦！
招牌焗薯是採用原隻美國薯仔，先以180℃焗兩小時，配以三款芝士，包括：Mozzarella 芝士、自家製卡夫芝士以及酸忌廉芝士，再撒上蔥花、紫洋葱粒及少許辣粉。手掌大的焗薯，賣相吸引，芝士味香濃！
重量級芝士酸忌廉原隻焗薯 $35
焗薯看上去並非「太大個」，但食落就知份量不少，一個人食亦難免「太飽肚」！焗薯的口感不會太硬或太腍，食落有咬口，薯仔中間切左幾刀，上面的芝士能輕易流落焗薯中間，芝士味濃，原本以為食落會好漏，但芝士上面的酸忌廉正好有中和作用，再加上洋蔥粒，味道層次更加豐富！
另一款推介就是香煎薯餅，先將薯仔切成幼絲，慢慢將薯絲煎作圓餅型，再加入洋蔥、煙肉煎香，惹味香口！
香煎煙肉洋蔥薯餅 $28
薯絲焦脆爽口，入口有種煎炒的「鑊氣」，配合煙肉碎和洋蔥，更是惹味香口，不過若然只吃薯絲，便略嫌偏油，配上酸忌廉可以減輕油膩的感覺，整體的味道竟然有點似「卡邦尼」！提提大家要趁熱吃，不然就會太油膩！
叁薯
地址：太子水渠道30-32A號美星樓地下5號舖
營業時間：下午12時至晚上9時
下頁介紹花園街廿年街頭老店－真知味
扎根廿年街頭老店－真知味
要數花園街當中最具香港街頭小食風味的老店，不得不提「真知味」，魚蛋、魷魚、碗仔翅以及車仔麫等，「港式」小食應有盡有，佢最令小編回味的就是他們的「港式秘製辣醬」，香濃惹味！
魚皮餃 $8
真知味的人氣小食非「魚皮餃」莫屬，魚皮餃啖啖肉且口感彈牙，但真正令大家回味無窮，每次行過都一定要放低「八蚊」的重點就是他們的秘製辣醬，魚皮餃配上辣醬後，更加惹味，一食就停唔到口！而每串「魚皮餃」，都會附送一粒「燒賣」，或許魚皮餃成本太貴，所以用燒賣頂替吧！
魷魚 $10
眼看不少客人都下單要魷魚，小編也決定一試，魷魚口感爽口彈牙，但卻淡而無味。不過，配上秘製辣醬，依舊令人回味！
魚肉碗仔翅 $24
另一款人氣美食就是魚肉碗仔翅，翅中放滿魚肉，魚肉香甜帶有少少胡椒味，碗仔翅的冬菇、肉絲、蛋花，同樣份量十足！
真知味
地址：旺角花園街161A號
營業時間：上午11時至晚上10時
下頁介紹---「新加坡人氣班蘭小店」摩豆Modos
「雞蛋仔人氣小店」摩豆Modos
開業只有四個多月的小店「摩豆」，在花園街已經打響了名號，成為新一代的長龍店。Modos是香港人創立的品牌，當中以班蘭食品最受人客歡迎，更經常推出各款創新的得意口味，帶來不一樣的新鮮感！
這裹有很多新穎且具創意的雞蛋仔，包括：招牌班蘭味、羅宋湯、班蘭和積及橙朱古力雞蛋仔，聽到名字也覺很特別吧！小編當然要先一試招牌班蘭味雞蛋仔啦！
班蘭雞蛋仔 $18
新鮮出爐雞蛋仔，外面「脆卜卜」而且內裏煙韌，帶有淡淡清新的班蘭香味，入口卻似芋頭口味？！整體而言，味道不會太甜，值得一試！
難怪這股「班蘭香味」可以吸引到不少外國遊客，不禁前來一嚐這款特色創意「雞蛋仔」！
積及橙朱古力雞蛋仔 $22
（圖：ms.kiukiu）
除了班蘭外，其他特色雞蛋仔在網上都有極高評價，例如積及橙朱古力雞蛋仔，網友ms.kiukiu形容賣相可愛，有Halloween的感覺，橙朱古力的香氣四溢，含大量半融的朱古力粒，橙的酸中和了朱古力的甜，味道配合得很好，值得一試！
店內除了雞蛋仔，亦有其他食品如雪糕以及手調飲品系列，小編買雞蛋仔加廿蚊，就買了一杯班蘭軟雪糕，味道又如何呢？
班蘭軟雪糕（原價$25 換購價錢20）
淡綠色的雪糕倍添少女般的青春可愛，底部加上「脆卜卜」玉米片，整體看似小盤栽一樣，未食都經已賞心悅目！
雪糕的口感軟滑，奶味很重，班蘭味略嫌不足，因為奶的份量較多，所以雪糕難免溶得好快，一定要「襯凍食」呀！
看到雞蛋仔與雪糕的組合，小編忽發奇想，決定將他們合二為一！
班蘭雪糕加班蘭雞蛋仔，雙重「班蘭」體驗，味道比雪糕窩夫更出色，因為雞蛋仔的口感更煙韌，而且配合雪糕「即點即食」，能保持雞蛋仔外層的香脆口感，兩種班蘭味道相輔相成，令整體的味道進一步提升！
摩豆Modos
地址：旺角花園街174號A1鋪
營業時間：下午12時至晚上11時
下頁介紹---港式傳統老餅家「奇趣」
港式傳統老餅家「奇趣」
位於旺角花園街的傳統中式餅店「奇趣餅家」，是數一數二的老字號餅店，有著不同的傳統餅食，有老婆餅，豆沙餅，有大有細旳光酥餅，還有雞仔餅和香蕉糕等等，不少人專程到來一嘗懷舊的味道。
從遠處經已可以「奇趣餅家」的大紅招牌。
鎮店之寶－燒餅
紅豆燒餅($4/個$17/5個)
紅豆燒餅軟軟的糯米皮口感煙韌，餅面上多了白芝麻，香氣撲鼻，餅皮煎得香軟而不油膩！吃了一口會讓人想要馬上再咬一口的衝動！餅中紅豆餡亦不會過甜，甜味剛好，平均分佈在餅心，說得上是「巧奪天工」的燒餅呀！
合桃酥（$4/個 $15/4個）
合桃酥酥香鬆化，咬下去爽快俐落，合桃香口，味道甜香，份量十足卻只售四元，如此佳品，慶幸現在仍然能吃到！
摩囉酥（$4/個 $15/4個）
摩囉酥味道極似老婆餅，外層口感鬆脆，內裡的餡料應該是老婆餅的糖冬瓜蓉，口感軟糯之餘亦不太甜，不過吃一個已經很飽了！
這種前舖後工場的舊式餅店，在香港已經少之又少。一些涉及繁複工序的傳統懷舊餅點，亦逐漸絕跡於大大小小的餅店了。「奇趣餅家」仍能堅持至現在，這或許正是它獨有的魅力及吸引力吧！難怪它也被獲選為2016年米芝蓮街頭小食推介！
奇趣餅家
地址：旺角花園街135號地下
營業時間：星期一至日 08:00-20:00
下頁介紹---新彊風味串燒「野火燒」
新彊風味串燒「野火燒」
最近天氣都凍冰冰，最啱就係去BBQ，可惜去一轉BBQ，所出動的人力物力實在太大，倒不如去街頭食一串又一串串的串燒仲好啦！花園街旁的新彊風味串燒「野火燒」，從大遠處都經已聞到濃烈的孜然香！
看看餐牌，就知道價錢公道！有牛肉串、羊肉串、豬頸肉、土匪雞翼、雞肉串，若想吃得健康一點的話，有粟米、韮菜、蒜芯以及四季豆，選擇雖然不多，但美食從來就貴精不貴多，最重要夠美味！
雞肉串燒 $12（買一送一 $6／串）
表面燒到金黃微焦，肉質嫩滑，並無雪味，雞肉香味很重！更是買一送一，超抵食！
豬頸肉串燒 $12
豬頸肉燒到香脆，肉質爽口彈牙，這裏的串燒都不會再額外提供醬料，所享受的是食物本身的味道！
羊肉串燒 $12
調味均勻，食完亦冇油膩同口乾，充滿肉汁，口感帶點煙韌，孜然粉味香，但不會完全掩蓋羊肉的肉味！
野火燒
地址：旺角通菜街124號E1店
營業時間：上午8時至晚上8時
下頁介紹---文青格調小店「木言斤」
文青格調小店「木言斤」
在花園街走著走著，無意中發現了這間充滿「文青」韻味的小店，以藍色為主調，配以英倫歐美風格的懷舊裝飾擺設，別具格調，裏面售賣的禮物雜貨種類繁多，是店主從台灣、日本等地搜購的精品，而且價錢相當合宜！
裝潢固然之是花盡心思，這間充滿格調的小店更售賣一款自家設計甜品，又名「Ice Dog」，Hog Dog（熱狗）大家應該就聽得多，什麼是Ice Dog？
「Ice Dog」是他們上環西班牙餐廳分店的甜品師傅所設計，概念源自法國著名閃電泡芙Éclair，這款加大版的Éclair有21 cm長，比一般足足長兩倍！泡芙由甜品師傅做起送到小店，當收到客人訂單後，就會將焗至香脆。人客可以任選六款新西蘭雪糕、三款自家製吉士醬及五款配料，自行組合口味。
「Ice Dog」可以任選6款新西蘭雪糕的其中之一，包括：芒果熱情果乳酪、朱古力、彩虹、雜莓乳酪、曲奇以及抹茶；3款自家製吉士醬，包括：原味、抹茶和白朱古力。
另外可選兩款配料，包括：綿花糖、士多啤梨粒粒、朱古力針、橙皮或脆脆片。
編輯自選：雜莓乳酪雪糕配抹茶吉士醬「Ice Dog」
冰凍的雪糕，配上熱辣香脆的泡芙，令人難以抵擋！雜莓乳酪雪糕酸甜，入口清新，抹茶味吉士醬抹茶味道濃郁，香甜回甘，配上士多啤梨粒粒乾果，整體配搭一流！
更有趣的是，這裏用的紙巾是「美金」，用的匙羹是「泥鏟」，的確玩味十足！
樓上雅座更會不斷播放韓流MV，一邊聽歌一邊品嚐「Ice Dog」，這便是品味生活！
與三五知己不妨到這裏來選購充滿玩味格調的禮物，購物完便柯打一個「Ice Dog」，步上樓上雅座，與朋友渡過美好時光！
木言斤
地址：旺角花園街118號地鋪
營業時間：下午12時至晚上10時