吃喝玩樂

　　打開門做生意，當然希望日日爆滿，多多媒介曝光，大量宣傳，係咪？九成時間係，但也有一成情況，唔係。

　　事實，我肥碌食通港九新界，好的，一定會介紹（唔好的，免提，佢自會陰乾），因推動飲食業，為香港好，點解唔多點做？

　　不過，你一廂情願幫手推廣，間中未必個個受，尤其當佢剛剛攞咗米芝蓮銜頭，就真係弊傢伙，因大量生客擁至，熟客無位，行家挖角，廚師跳槽或跳草裙舞，做店主的，煩到癲。

　　此時，若再有鋪天蓋地宣傳報道，咁就分分鐘變「送佢一程」，係乜，做到冧檔也。

　　冇誇大，我正正目睹兩個例子，無謂再提，總之，最終是——執笠⋯⋯慘情。

　　老老實實，今次介紹呢間，對老饕來講，真係介紹都多餘，因屹立西環近四十年，晚晚爆瀉，正是「德記」也。

當不少人呻飲食業冇得做同時西環德記就晚晚如此。話「冇得做」者可會認真研究原因？

　　小弟與店主黃生黃太N年前投緣，唔想煩佢，故此，久不久才訂枱，睇睇有乜新嘢。（老友話多餘，因其實此處最好食的，正是舊嘢）。

高大威猛的黃老闆晚晚站在高台上監察菜館一切。

　　小弟勁鍾情德記的滷水大拼盤，次次冇得輸——粉嫩鵝肝、肥美鵝腸、入晒味有（o趙）頭的鵝掌鵝翼及腍腍的鵝肉。

這個鹵水拼盆可講獨步香江。

　　呢個拼盤，真真獨步香港，不知幾許食客遠道而來，正為一嘗此極品。

　　歎完，一圍「傳媒老是佛」已乾咗四支紅酒。

　　當然唔少得，為潮式凍花蟹。如今的香港潮州店，一係冇貨，一係斬到你成頸血。德記勝在貨真價實，收費合理，找數絕不會嚇破膽，以為入完香港某大「富豪醫院」。

大大隻凍花蟹，不少店用來劏客。德記只收合理價錢。

　　黃太特別推薦飲杏汁白肺湯，生磨杏仁，足料，入口香噴噴，啖啖滑嘟嘟。

新鮮杏仁磨的杏汁白肺湯，香又滑。

　　潮式大拼盤是全晚唯一有食剩的，點解？因在座個個三高兼肥肚腩，面對陣容龐大的蝦棗、墨魚卷、脆皮糯米釀大腸，全部油炸，點敢狂食，故只可以一件起兩件止。

這是唯一有剩的潮式酥炸大拼盆，因在座位位「三高」也。

　　不過，個個雖話怕乜怕物，但當羔燒四寶丸一上枱，班大哥又似乎忘記身有糖尿病，可能心諗：「死就死啦，一次啫，去邊度搵到咁鬼正潮州甜品呀？」我肥碌乃其中之一，雖冇糖尿病，但歎完一碗咁勁熱量美食，肯定翌日要齋戒再在運動場急步十個圈，但⋯⋯值得嘅。

「三高」？當遇上羔燒四寶丸時，一於死就死啦！

　　大滿足後，離開往櫃檯找數，咦⋯⋯發覺黃太青春咗、潮咗、靚咗喎！點解呢？下次再問。

　　到德記晚飯，一定要買兩樣嘢才Bye Bye，一為門口的砵仔糕，長期有條龍，打曬「為食報告」啦；另一為獨家秘製鹹檸檬，回家浸梳打水或用來蒸元朗烏頭，配搭正到飛起。

德記潮州菜館

地址：堅尼地城卑路乍街3號益豐花園地下

電話：2819 5568

　　高鐵開通後，潮汕團爆到七彩，我肥碌亦去過N咁多次，主要歎一味香港冇的美食——潮汕鮮剖牛肉火鍋，真真滋味無窮，試一次後必定上癮，得閒就心思思殺上去。

　　近兩年基於汕頭牛火紅，故大灣區新開不少汕頭牛火鍋。唔知點解，就是不同味道不同質素，結果，仍是要上汕頭。

　　不過，當地牛肉雖冇得頂，但論廚功呢？好似差香港一班波噃。

　　單講滷水鵝，當地吹到獅頭鵝幾巴閉，條頸要過千人仔，但⋯⋯老老實實，當地雖然有新鮮鵝，但做出來的味道，相比香港，仍有所不及。

　　小弟真替香港班廚師唔抵，因若攞到即劏新鮮食材，尤其牛及鵝，整體出品必定彈離潮汕，如此，我哋呢類為食鬼就不用山長水遠了。

　　香港潮州店，不少老字號做到烏下烏下了無生氣，尤其本來是潮州菜大本營的九龍城，幾間曾經響噹噹名店，落到下代手，不單無復當年勇，反之，執下一間，執下又一間。

　　想食高水準嘅去邊？早年人人話去上環兩興及尚興，八九十年代我試過兩次，條頸滴住血離開，冇誇張，可能當年小弟經濟能力薄弱卦。

　　最近，潮州為食大哥吳錫輝微微咀話：「肥碌，帶你去間新嘢，名尚盛，由尚興老闆孫淑強（Tony）帶原有班底殺過萬宜大廈搞，好掂！」

　　第二個話掂，我必懷疑，因近年小弟已食到個咀愈來愈尖，但輝哥話得，幾大去，尤其由佢「卜」位，大大個江湖地位也！

　　果然，Tony見輝哥駕到，不敢怠慢，全程由寫菜落單到撲出撲入廚房監工，皆親力親為。結果，我地大群「為食敢死隊」真真食到舐舐脷，公認呢餐值九十五分（平日八十分已經收貨）。

　　我最難忘兩味，一極平，一極貴。

　　平的為街市每斤三十蚊的新鮮鱭魚，Tony用來做魚飯。今個月開始當造，因要準備產卵，故條條雖只六吋長，但肉質肥美嫰滑標晒油，勁好味。

現今是鱭魚最肥美季節，這是原汁原味潮州魚飯做法。

　　另一為潮州翅，合理價近四百一碗，聽落成餐飯咁貴，但不單物有所值，肯定為小弟歎過（當然唔多啦）最正斗的一碗。

這碗潮州翅驟眼看不出乾坤，但卻是我吃過最頂級的。

　　其他另一極品，為就算上汕頭都冇呢級功力炒出的薄殼，有相大家睇，上枱已令人眼前一亮，嘩！乜可以泡製得咁靚仔？眾為食好友大喝：「各位兄弟，咪食住，打卡先！」

超靚仔炒薄殼，打完卡唔捨得食。

　　另外，潮州名產欖菜也是正到飛起，Tony 當日在街市買到最新鮮的龍躉腩，就用欖菜蒸之，腩位件件彈牙肥美，不只，最大享受為將滿是骨膠原的厚皮往咀裏送，再來啖美酒。

潮州欖菜蒸龍躉腩，肥美到癲。

簡單一碟潮州炒麵線，見證大廚功力。

　　人生，太多變幻，故應放下令人不快的執著（尤其自己改變不了而只能等時間改變的現實），趁能行能走，約老友多多見面多歎美食多談開心事啦，對身心健康有莫大幫助㗎！

「為食敢死隊」超滿意，即拉老闆孫淑強拍照留念（後排右二）

地址：香港中環德輔道中六十八號萬宜大廈地下G04舖

電話：2854-4557