世事政情

　　方力申未入行前是香港隊泳手，有「飛魚」的稱號，就算今時今日轉做藝人，但都不時練水去世界各地的游泳比賽，好動的他還會打籃球。而他近來再次打乒乓波，與尹光和吳大強等人組成「中年好乒乓」切磋球技。不過當中最為年輕的他，反而被狙擊得索晒氣，72歲吳大強變「吳大抽」大力扣殺，仍然面不改容。

　　近日，方力申正在做內地巡迴演唱會，早前在佛山舉行演出後，8月即將巡至中山進行。現時趁有機會，就把握時間休息一下。運動員出身的方力申，運動細胞比其他人強，但當「飛魚」跳到陸地上，就有啲阻滯。他近日跟《中年好聲音》中最受歡迎長者吳大強、尹光和劉浩龍等人約埋打乒乓波。一班「中年好乒乓」球來球去數波波，方力申不敵吳大強，打波其間不時慘叫。吳大強保刀未老，變「吳大抽」。

　　方力申在IG貼出了當晚「中年好乒乓」的現場情況片段，片段中分別有跟尹光和吳大強對打。他寫道：「同尹光哥，Uncle Bill 强哥，仲有班阿哥打ball ball… 結果我就唱光B嘅數波波，單打冇贏過。鬼咩，十幾年冇打，連塊球拍都唔見咗。好彩即刻搵我哋奧運獎牌得主 @minniesoo 幫拖，介紹咗塊靚拍畀我。新拍真係好鬼有彈性。#屎坑波架撐多 #中年好乒乓。」

　　估唔到平時又有游水、又打籃球好有運動細胞，兼且曾是香港游泳隊成員的方力申，卻在乒乓枱上，面對著尹光和吳大強時就有點吃力。打波期間不時發出聲音，尹光和吳大強就沉著應戰，何其冷靜。

　　吳大強活力十足，反應敏捷，他變身「吳大揪」起勢出動正手、反手大板大板揪擊，不時殺得方力申措手不及，只聽見現場睇打波的朋友們，不時讚吳大強好波。不過貫徹一向的性格，吳大強都十分冷靜。

　　男子組合MIRROR眾成員當中，盧瀚霆（Anson Lo）都出名是「大胃王」，可能他經常要練舞運動量好大，所以經常都要食嘢補充體力。近日，他在工作期間，就食到著名的糯米糍。對住美食都難以收到平時斯文的狀態，大口大口把糯米糍塞進口內。

　　MIRROR最近有不少是非，成員陳瑞輝（Frankie）、江熚生（AK）惹來緋聞，但為免節外生枝，大家都免得多嘴，越講越亂。而其他成員都各有各忙，也愛莫能助。AK和陳卓賢（Ian）正各自準備個人演唱會的綵排，而盧瀚霆（Anson Lo）就為新歌排舞。可能朝早工作量大，消耗很多體力，他經常都要食嘢醫肚。

　　眾所周知，Anson Lo的食量好驚人，半夜三更回家，有時都會急不及待吃「教母」為他準備的晚飯，他在 IG內都經常分享自己的膳食。而早前，他聯同MIRROR眾成員一起去外地拍旅遊節目，他們接受訪問時就大爆，Anson Lo半夜都會突然肚餓，飢不擇食下執隊友們放在門口垃圾桶旁的棄置食物。而且又爆他對食物沒有特別追求，有時就懶得連放涼了的飯都照塞入口，通常都有隊友李駿傑（Jeremy）照顧代勞，幫Anson Lo整杯麵。

　　近日，Anson Lo日日出外開工，有機會吃到好出名的糯米糍，他與幕後工作人員拎起菜單點選喜愛的口味，他就點了紅豆餡的糯米糍。大家都坐在車上品嚐美食，他就刻意拍低助手的食相，為免被拍得狼狽照，對方都用背脊面對鏡頭。

　　而Anson Lo就好大方，拮起大大粒的糯米糍，他近乎是表演深喉絕技，成功挑戰一大口把食物鯨吞到口中，而且吃的時候也陶醉得瞇起雙眼，而且口中充滿白色粉末，不過食完都忍不住笑。有時工作行程十分緊密，Anson Lo都惟有在保母車內吃東西醫肚，之前在限時動態，他就在車上吃湯麵，笑言，「車程中吃湯麵是一種挑戰。」

　　其實Anson Lo豪氣表演這個大絕表演都並非第一次，跟張繼續拍戲未埋位時，都試過一口把飯糰吃了一半；而在節目《MIRROR GO》時夜，就大口大口吃麥皮蟲麵包，食相都好狂野，相信都是他的神徒必儲的相片。

　　另外，為慶祝Anson Lo 7月7日生日的大日子，盧瀚霆國際後援會於6月26日至7月10日期間舉行，以生日主題「SoaR」（翱翔）在九龍塘又一城舉行《Anson Lo & Sontos - SoaR Pop Up Store》。盧瀚霆國際後援安排「小神徒」擔任模等兒，率先體驗《Anson Lo & Sontos - SoaR Pop Up Store》。8歲小神徒Helly被Anson Lo舞姿吸引，好大膽向偶像示愛：「Hello Anson Lo哥哥，生日快樂！無論你去到邊、做啲咩，我都會支持你，同埋你唱歌好有型、唱歌好好聽，我愛你！」而9歲神徒興奮表示見過偶像，更即席跳對方歌曲《My Life》：「謝票場見過佢真人，覺得佢好靚仔，所以專登同媽咪講學跳佢啲舞。如果可以同佢同台，我估唔會驚反而極興奮添。」而兩位6歲小神徒就大讚偶像靚仔，笑言成為未來男友的標準，仲即席唱偶像新歌《深閨》。

　　是次活動將展出Anson Lo在MIRROR演唱會中，演唱《MY LIFE》時穿上的水晶閃石戰衣，以及3米闊的巨型天使翅膀，與生日主題「SoaR」（翱翔）互相呼應，屆時勢必成為打卡重點。展覽場地中央的心形佈置，概念來自最新歌曲《深閨》MV，佈置可供神徒和大眾扣上特製心形鎖。此外，Anson Lo於MIRROR世界巡唱期間，以寶麗萊相機拍下的多張照片，亦首次於Pop Up Store公開，神徒和大眾可親身感受Anson Lo世巡時的喜悅與努力。

　　為讓每位參觀人士有絕佳體驗，今年還有全像3D投影相機，令每位參觀者彷如與Anson Lo在同一空間內，渡過甜美一刻。每日會派出籌號，名額有限，先到先得。有得玩仲有紀念品帶走，種類有很多，包括Anson Lo得意公仔、旅行萬用插蘇、襟章等，紀念品可於6月21日起於指定網站預約。