世事政情

　　張敬軒間中在IG上都會分享一些搞笑經歷，曾經大爆家傭姐姐煮早餐的笑料。近日自爆要跟自己好好對話，兼且寫低願景圖，藉此希望有機會把夢想都變成真。可能他與自己對話得多，聽力都變得敏感，聽到自己的心聲之餘，仲聽到隔籬單位的「靈異」聲音，嚇親寶寶半夜瞓唔著。

　　不時在IG分享姐姐早餐的張敬軒，有不少搞笑事情與粉絲分享。今次，他半夜分享的並非搞笑事，反而是一單疑似靈異事件，而且仲嚇到他半夜差一點睡不著。故事是這樣的，張敬軒在IG 限時動態內，分享了一張在洗手間內的照片，他寫道，「諗住刷個靚牙早啲瞓，耳邊突然有啲喃嘸聲？！有啲驚驚。7月都未到…膽粗粗搵源頭…。」

　　果然是膽色過人，張敬軒突然「柯南」上身，周圍搵聲音源頭，終於被他聽到是甚麼聲音，「聽到好似係隔籬屋發出喎，咁即係人為啦！！邊有人半夜三更喺度喃嘸喃嘸㗎，嘈住晒點瞓？！」謎底終於解開，相信他都可以有覺好瞓。而似乎這個聲音，跟林家謙有關，他回覆了張敬軒的限時動態，還寫道，「唔係我嘈，係你太早瞓，8點係阿公阿婆作息時間。」相信二人有搞作，所以才會有這另類接觸。

　　張敬軒其實一直以來，都遇不過少靈異事件，當年住在百年古宅Felix Villas（緋荔樹/福利別墅）就曾經試過通靈經驗。有次相約一班朋友到家中作客，其中一位識通靈的朋友，透過靈擺探測到靈體在家中，還深入地「傾偈」。

　　之後，張敬軒與「他」透過靈擺溝通，對方形容自己是「這裡的風、沙、一草一木」，還表示，「好多曾經住過喺呢度人唔會介意呢度會變成點，甚至唔會去欣賞，但係你嚟咗之後，除咗幫忙修理好物件外，仲帶咗好多愛入嚟，就如在對的時候遇上對的人。」張敬軒還將這段對話告訴填詞人林若寧，然後把這經歷寫成歌曲《找對的人》。

　　另外，張敬軒亦透露過小時候在廣州的經歷，他與友人曾闖入一間大屋，入屋後發現有好多神怪擺設，好奇心下到處影相留念。回家後他將相機內的記憶卡打算在電腦內讀出相片，卻發現相片佈滿了白色一點點，放大看清楚竟然有大發現，每一點白色點都見到一個人的五官，而且正在咆哮，嚇得他立即刪除。

　　黎芷珊2012年於萬千星輝頒獎典禮憑節目《最佳男主角》奪得「最佳節目主持」獎，而上得佢節目嘅都係巨星或者話題人物，因此唔少人都對節目《芷珊約你》有所期待。不過日前芷珊嘅表現就被彈到一棟都冇，唔知睇咗嘅大家又有冇同感呢？

　　黎芷珊主持嘅清談節目邀請到嘅嘉賓粒粒皆星，一連8集嘅《芷珊約你》就約到溫拿、張敬軒、草蜢、王嘉爾、許志安、陳慧琳以及楊千嬅做嘉賓，見到呢個陣容都不免令人有期望，其中許志安更加係首次於專訪中提起「安心事件」；而楊千嬅亦係首次就被fans唾棄剖白，然而訪問內容令到唔少觀眾都大失所望。

　　許志安節目中提到「安心偷食」時表示：「呢個傷疤會跟住我一世，成為提示我做人嘅方向。」而芷珊未知係咪為咗保持二人友誼，可以話係未點到已止，冇再深入問落去，網民都大彈訪問「內容唔入肉」，睇完好似睇咗陣風咁。另外，黎芷珊亦活用徐子珊《My盛lady》中教嘅港女必勝回應大法，經常都以「真係㗎」對應各式各樣嘅答案，以不變應萬變，就算你冇聽人講咩，咁樣答都一定冇死，黎芷珊只係爭在未問埋「咩嚟㗎」。

　　有網民睇完楊千嬅一集， 表示令佢更加討厭楊千嬅，更大插芷珊所有問題，都只係為方便受訪者「讀稿」，同時方便佢討好受訪者，更指佢訪問技巧，如同「搵紙刀鋸牛扒」，令觀眾失望：「你想觀眾點樣？睇你phonebook（電話簿）有幾星級？不要這樣啊，不要學人成為令觀眾失望的人啊。」網民同時指製作團隊以《東張西望》「何伯何太」思維譁眾取寵，刻意用啲楊千嬅喊得肉酸嘅畫面，反而唔去令更內容實在。另外，黎芷珊每集固定「畀一個小秘密我」環節都被嫌棄，可能大家都真係冇秘密，明星們分享嘅秘密都真係好「小」，小秘密到去阿婆都唔想知嘅程度，完全無法為節目最後帶嚟爆點，令人以為有高潮卻只係帶嚟更大嘅失望。

　　黎芷珊擁有四分之一葡萄牙血統，黎芷珊姑姐為黎婉華，是已故賭王何鴻燊元配。黎芷珊參與歌唱比賽時被當時著名的音樂人安格斯發掘，1984年初與陳樂敏及陳慧嫻一同推出首張唱片《少女雜誌》，其後在姑丈何鴻燊安排下加入無綫電視，成為兒童節目《430穿梭機》及《閃電傳真機》主持人。離開兒童節目後曾於多個資訊節目擔任主持，包括《香港早晨》、《K100》、《城市追擊》、《東張西望》、《七百萬人的傳奇》等，亦曾為娛樂新聞台擔任主播。 2012年黎芷珊主持《最佳男主角》嶄露頭角，觀眾們方知佢人脈極廣，天王巨星都非常畀面佢做嘉賓。