世事政情

　　鄧兆尊早前作客「田豪祖3寶」Facebook做直播主持，大談近日熱辣辣的娛樂話題，提及翟威廉在一個訪問中自認有海量性伴侶，鄧兆尊表示欣賞他夠坦白，因藝人都是常人有七情六慾。被問到圈中有沒有「大兜亂」的關係，兆尊形容有「炒粉」的情況，亦大爆曾有同劇女演員邀請上門，對方以性感內衣色誘......

　　鄧兆尊跟「田豪祖3寶」YouTube Channel主持曾志豪、貴花田及王耀祖一向老友鬼鬼，每逢有主持放假，鄧兆尊都充當「客席主持」參與直播的工作，由於兆尊經常大爆娛樂圈的秘聞，所以大受網民歡迎。近日，鄧兆尊在直播期間以翟威廉海量性伴侶為話題，他被問到有沒有圈中人主動送上門做性伴侶？兆尊坦言：「點會冇吖？以前有一個同我拍同一套劇嘅女演員，放咗工叫我幫佢整（修理）個漏水嘅擺設，佢話壞咗，可唔可以放工有時間嚟幫佢整？我話好，去到一開門，嘩，喱士睡衣，真係乜都凸晒出嚟咁濟，我好奇怪行入去間屋，點知佢仲同工人講：『鄧生我同佢冇嘢呀，佢嚟整嘢！』我一整完梗係即刻走啦，喺嗰個情景，好明顯係一個局，仲整落去？我唔係何伯呀大佬！」曾志豪和貴花田追問事件的後續，鄧兆尊再爆料：「收尾有人中咗招啦，（有冇手尾跟？）嗰個男人係結咗婚嘅，藝人嚟嘅，我唔知有冇手尾，只知個女星越搬越近個男人屋企。」

　　問到性伴侶是否找藝人會比較安全？兆尊說：「搵藝人大家有保障呀嘛，你唔篤爆我，我又唔篤爆你，但藝人就好難招呼，始終男女都有身分，一線食四線，四線一定受氣。而家出面有好多公關會安排好多嘢，中介有好多著數，唔淨係講錢。試過有女藝人，而家冇做呀喇，當時同我講話想賺啲錢，我答佢搵我都幫佢唔到，佢話：『你不如圈養我啦！』我做唔到呢樣嘢，所以介紹咗畀我朋友，個男仔冇結婚，（你唔要就推畀人？）喂，我冇用過，你有所需，佢有所求啫，撮合咗佢哋，都拍咗拖十幾年，作為同事介紹畀佢，而且對方單身，呢樣我覺得冇問題。」兆尊表示圈中「玩家」通常有樣睇，「單身未必係爛玩，通常結咗婚先爛玩，最高（手）係出去玩，話畀人知已經結咗婚呀喇，仲曬手機啲仔女相，所以出去做咩，人哋都唔會追究你，令人唔好有憧憬以為可以做女朋友。」

　　歐錦棠不時在其YouTube節目《乜乜棠水舖》中，大爆娛樂圈鮮為人知的秘聞。最近他分享電視台台慶玩命表演，例如吳剛師傅「徒手滾油取物」、心口碎大石等，大爆當中的造假真相，親自示範如何掩人耳目！

　　吳剛師傅在90年代便是籌款節目的台柱，經常搽到成身油的他最出名就是徒手在一大鍋滾油中取金元寶，又試過即場飲滾油，睇到觀眾嘩嘩聲。

　　不過歐錦棠笑言當中其實有竅妙，鍋中「滾油」暗藏玄機！棠哥拍片示範，他先在小鍋中落油，然後溝了大量白醋或米醋，開火後很快便「煲滾」：「因為醋嘅沸點低過油好多，會浮喺油面上，（開火後）好快就有泡泡，令人以為好熱好滾。」他即示範伸手入油，只見十分輕鬆，不過他提醒網民切勿模仿，因為依然有一定危險性。

　　歐錦棠亦指吳剛師傅另一名作就是「空手煎魚」，單靠氣功隔空將魚煎熟。他笑言，其實事前取走魚的內藏，放一條發熱線在裡面，再連接到護腕中的電芯，實則用電力剪魚，只需出煙便可，不用真的煮熟。

　　此外，另一個經常在台慶出現的「心口碎大石」表演，歐錦棠表示當中造假成分少，皆因會用上真正的麻石，當中巧妙之處在於揸鎚扑石之人：「揸鎚會由師傅做，佢哋識用力，用鎚角扑落去，唔會一鎚到底。」不過，他指師傅都會失手，最經典一次是馮寶寶在亞視台慶心口碎大石，師傅連扑兩次都未能扑開石頭，結果第三次用力過猛，表面上沒受傷的馮寶寶，原來一條肋骨骨裂，要看多次醫生。