世事政情

　　以空手道運動為主題，由歐錦棠、談善言、江熚生（AK）主演的ViuTV劇集《打天下》，相隔4年再拍《打天下2》，近日已經播出。今次還有不少真高手出現，除了有香港空手道奧運銅牌得主劉慕裳外，亦有日本空手度高手、黑帶二段武田梨奈和宮原華音參演。劇集比之前打鬥場面更多，而且難度更高，睇得觀眾十分肉緊。

　　在新一輯劇集中，加入MIRROR另一位成員邱傲然（Tiger），早前AK與Tiger宣傳接受訪問，大談拍攝經過。AK表示今輯更多動作打鬥場面，而且有不少動作都是臨場加插，AK與Tiger在片場即學即做，AK說：「我哋跳開舞，記動作同埋做佢哋嘅要求，都容易啲達到，華麗度就我哋兩個呢幾年學嘅嘢唔同，我哋都有拍過打戲，《繩角》都有鍛練，所以今次嘅打戲，比第一輯係華麗，好睇啲。」

　　劇情講述Tiger做AK的敵人，二人對打場面最多，經常會有衝突埋身肉搏，AK表示：「我主力係打空手道，而Tiger就係另一門武術，佢係打MMA（混合格鬥），佢係負責鎖人，我負責解鎖，但我哋主要都係學咗兩堂。」

　　劇集中，Tiger是幫派中人，性格火爆，與AK衝突好多，他最難忘宣傳片中，二人在地下拳賽對打，這一幕足足拍了兩天，Tiger說：「嗰場戲要拍通宵，連攝影師都要拍到碌落地，台前幕後為嗰幕好睇做嘢。呢一幕拍得好好，咁辛苦都覺得件事好值得。」

　　AK表示當日大家拍到尾段，已經身水身汗，他笑言：「當時好熱，大家又冇著衫，出咗好多汗，又攬埋一舊，我哋打嗰陣表情真係好複雜，複雜唔知係好辛苦定係嫌棄大家，好複雜。」

　　就算打得再辛苦都是值得的，AK透露Tiger的表現被很多人都看到，令一向低調的Tiger被看到，AK說：「佢（Tiger）有被人讚，拍好多場，導演、武師、武指都讚係打得好打得靚。我今次冇畀人讚，但唔影響進度都算好。」

　　Tiger自小就學武術，讀大學的時候，曾經跟歐錦棠上課，他說：「棠哥有喺浸會教，當時我上咗好耐，keep住係佢教。」他回憶入行後，有日在觀塘巧遇歐錦棠，禮貌上前打招呼：「我同棠哥say hi之後，佢同我講會開《打天下2》，問我有冇興趣，我梗係話有，我真係有興趣。之後先同佢相認，相信打招呼時佢係唔認得我。」

　　新一輯劇情，角色跟著社會大事而推進，同步成長，AK表示：「劇入面係講緊戴口罩嘅世界，疫情下我哋點面對困難，真實世界都係剛完成疫情，呢三年關口，大家睇劇時，希望感受到當時疫情下帶來嘅不便，大家當時點解決問題，自己又點樣走過困難。今次訊息會比《打天下》 更深層次，好似阿談（談善言）嘅故事線，遇到問題我哋要點樣面對同解決，畀我哋一個反思。呢幾年，自己都有經歷，同MIRROR成員都遇到一啲事情，同樣有好多嘢反思。」

　　AK還笑言，第一輯劇集播出後，基本上都沒有脫離角色：「基本上我唔係好甩角色，因為阿媽好鍾意，佢成日重溫，仍然睇得好開心，每次睇依然好似第一次睇咁樣，所以喺屋企我會見到關志浩（AK飾）出現。」

　　一直以來Tiger和AK對拍攝很有興趣，Tiger曾經為MIRROR團歌《破鏡》執導外，還曾經應鮮浪潮邀請拍攝《第十七鮮浪潮國際短片節》拍開幕短片《是日精選》。二人今次拍《打天下2》時，都經常請教黃偉傑導演，Tiger表示導演好友善，會詳細教導，AK笑言：「有時我哋都問係咪會太煩，係咪唔好意思唔答，同前輩合作，梗係要學嘢先，吸收到差唔多時間先試。我係有呢個興趣，可能由MV開始先。但而家連啲鏡頭都未搞清楚，仲係好遠路程。」

　　MIRROR 全體成員首次擔正的電影《12怪盜》將於本月底上映，鏡粉們即將看到偶像在電影內施展渾身解數演出。對於首次合體拍電影，12子都對票房有很大期望，他們形容電影內容包羅萬有：有兄弟情、搞笑、動作等，而且故事帶出的「核心意思」，相信觀眾能應用於在現實生活不同情況，能吸引鏡粉以外的觀眾。這齣戲以喜劇形式拍攝，12位成員特別加了很多他們之間的笑料，到時在戲中公開。

（本網圖片）

　　《12怪盜》由12名成員陳瑞輝（Frankie） 、王智德（Alton）、楊樂文（Lokman）、邱士縉（Stanley）、江熚生（AK）、柳應廷（Jer）、陳卓賢（Ian）、盧瀚霆（Anson Lo）、李駿傑（Jeremy）、呂爵安（Edan）、姜濤和邱傲然（Tiger）主演，12人在一個名為「怪盜公會」內，各人身懷獨特的絕技，他們奉命完成一宗將會影響全地球的重要案件。最初12人聚少離多，默契欠奉而險令任務失敗，最後他們決意團結一致合作完成艱巨的任務。

（本網圖片）

　　12位成員早前接受訪問，對於今次電影內有爆破、飛車等場面，加上要與敵人大打出手有不同難度的動作場面，笑言大家表現得有型，Lokman和Alton開場不久已大展身手，Lokman笑說：「現場好多工作人員都提我哋，爆炸嗰幕會好大聲，唔好做眨眼或者縮膊嘅小動作。」Alton笑謂原本有心理準備，但越提醒要注意後，自己反而變得緊張。

（大會提供）

（大會提供）

　　至於Lokman和Anson Lo特別多動作、打鬥場面，大家取笑Anson Lo是「受傷擔當」，Anson Lo表示：「連續拍咗兩日打鬥戲，有啲動作踢腿太高，拉親腳筋，不過好快好番。同埋戲入面我要撻喺地下，本身有墊嘢，但都痛，過一陣條腰就冇事。」

（大會提供）

（大會提供）

　　Ian則有飛車場面，亦能小心應付，他說：「揸車時要好專注，因為嗰一幕後面有架車追得好貼，而前面又有大石阻塞通道，我哋喺山上面較偏遠嘅地方拍，大家都有用對講機溝通，但收訊息唔係太好，我哋封咗路拍，拍拍下追車時，有外來車入嚟，所以立即停止拍攝。」

（本網圖片）

（大會提供）

　　在電影尾聲，12位成員與敵人惡鬥對打場面，他們拍攝前要預先練習，看來簡單的動作，都要有技巧，AK表示這幕戲花了兩日拍攝，Lokman說：「呢一幕好好玩，12個人對所有敵人，係好大挑戰，因為大家要記住所有動作，如果有一個人走遲半秒，就要全部人由頭再嚟過，好好玩。」

（大會提供）

（大會提供）

　　訪問的時候，大家都推舉Stanley為最有經驗的「大師兄」，拍攝時都不斷對其他成員提點，Stanley就大爆電影內，他們都加插了很多Inside Joke，令他們講對白時更搞笑和感覺自然。其中一幕，姜濤以體重自嘲，他與其他成員走進「車立」內出現超重的情況，他笑謂都是由Stanley提意。而另一幕姜濤稱呼客串演出的ERROR成員梁業做「死肥仔」，現實中姜濤不喜歡以這說話形容其他人，姜濤說：「除咗佢（梁業）之外，平時覺得加個死字有啲唔好⋯但呢次幾爽，想繼續講。」

（大會提供）

　　另外，在戲中12位成員都各有技能，Stanley透露劇組人員以各人性格來設計角色，至於現實生活中，大部分成員都希望能夠像戲中的AK角色，可以有動物傳心的技能，與自己的寵物對話。Anson Lo說：「我想同自己隻狗傾偈，我隻狗好似好驚蚊，見佢成日會避開啲蚊。」Jeremy也想知道，為何自己的貓咪不肯跟自己同床而睡。Tiger選擇較冷門的技能游繩：「就係想睇下有乜用，雖然只係落去，冇得上番去，但唔使等「車立」幾好。」

　　今次12成員一起擔演，當然會吸引到鏡粉捧場，AK表示這套戲內容羅萬有，有兄弟情、搞笑、動作，有些核心意思大家受用：「講大家團隊合作，除咗MIRROR之外，會有其他合作團體，或者同自己Team點樣合力做，一班隊友鞏固目標，可以應用喺不同生活圈子。」他們對於票房都有信心，若到3000萬票房，推出平時愛影浴缸的照片的Anson Lo公開自己在浴中的照片，若達到一億，對方更會直播沖涼情況，不過Anson Lo立即拒絕。