世事政情

　　林峯自從當上爸爸後，萬事都以家庭為先，就算開工拍戲，不時都見到老婆張馨月帶埋愛女Luna探班，一家三口甜到漏。近日，張馨月分享自己到布吉參與王嘉爾生日派對的照片，同場還有JW王灝兒，玩得非常盡興。隨後，張馨月轉戰到曼谷，匯合老公林峯一齊去睇Bruno Mars的演唱會。

　　泰國近來星光熠熠，事關王嘉爾在布吉舉辦盛大的生日派對，不少圈中好友都有出席，又玩水、又玩火兼放煙花，熱鬧非常，JW和張韾月都是座上客。而林峯近日被小紅書的網友野生捕獲，不過今次不是在內地拍戲，亦不是香港的親子樂，而是泰國曼谷。有網友在曼谷坐車時，目擊林峯和張馨月所坐的電單車經過，雖然電單車只有兩個位，不過林峯和張馨月一於少理，齊齊坐上電單車做乘客，三人行坐電單車左攝右攝，避開塞車。雖然林峯明知被拍，刻意避開鏡頭，但張馨月就大方任影，見到阿峯坐在司機的後面，隔開太太以免跟司機有肌膚之親，而為怕最尾的太太有危險，他都反手攬實太太免生意外，網友們都大讚林峯夠晒細心。

　　隨後，有另一名網友在小紅書分享跟林峯的合照，他表示：「曼谷看Bruno Mars隔壁站著林峯。」相中林峯所戴的黑色帽和白色上衣跟坐電單車的影片符合，網友們就聯想到，相信林峯和張馨月為了趕到場地睇騷，又要避開曼谷的嚴重塞車情況，迫不得已才冒險三人坐電單車趕到現場。別以為兩公婆難得放下Luna「二人世界」，原來Luna都有同行，演唱會翌日，張馨月分享他們帶Luna去兒童樂園玩的照片，大讚林峯是寵妻好老公、愛家庭的好爸爸。

　　劇集《家族榮耀之繼承者》正在熱播，收視和討論度都非常之高，而劇情進入高潮，Nana（梁靖琪飾）鍥而不捨要搵到自己身世，先是發現自己的親生媽媽是邵家碧（張鳳妮飾）而不是戴綺婷（余安安飾），已經大為失落，沒想到最終發現原來丘守義不是自己的親生爸爸，不斷要搵出親生爸爸的真相，最終越揭越傷心，最近播出的兩集的內容都幾乎焦點放在她崩潰狂喊的戲份，喊足三集。

　　這三集幾乎全部都是Nana的戲份，本身已經是豪門家族反叛性格的她，偏偏執著於自己的身世，鍥而不捨要搵出身世之謎，驗完DNA再四出奔走明查暗訪，最終驚揭原來高成（吳岱融飾）才是自己的親生爸爸，即時來一聲「雷聲」。事關Nana一直深愛高浚（林峯飾），最終竟然發現高浚是她的哥哥，劇情絕對可以媲美幾十年前的黑白粵語長片咁淒美。

　　Nana連續喊足三日，加上喊戲有異常多的特寫和鏡頭效果，展現出她的喊戲層次，不過觀眾就不太買帳，認為喊戲太多太煩，特別是她崩潰到面容扭曲，實在睇得難受。網友留言說：「劇情和演技都over咗」、「劇情極無聊，邊個係生父？使唔使好似死老竇咁啊？ 你已經長大成人有乜關係呢？」、「又要去查，又要喊！」、「呢套戲好煩！」、「粵語長片劇情」、「因為佢她老竇（梁家樹）是監製、所以用佢！」、「編劇是否牽強？硬要寫到Nana冇EQ、冇IQ，媽咪都說那人已死，Nana仲竟然問葬在那！？」、「梁靖琪好難頂」、「Nana always crying for no reason. So annoying（Nana喊都冇原因，勁煩！）」等等。

　　不過Nana頂多喊埋今晚，事關劇情交代她將會被智斌（羅子溢飾）推落海失救致死，而梁靖琪昨晚一集含淚向親生爸爸高成道別自拍一幕，眼淚和情緒都恰到好處，成為海量崩潰喊戲之中的佳作。今次梁靖琪飾演Nana都相當大挑戰，現年41歲的她已經是兩孩之母，跟34歲的陳瀅演同齡姊妹之餘，更是演活反叛少女夜夜笙歌的角色，相當不容易。雖然對梁靖琪的批評甚多，不過她的老公施雋賢都有捧場，更拍下老婆開水喉式爆喊的一幕，大讚對方，認真Sweet！