世事政情

　　劉松仁自從2020年被拍到行路撐拐杖兼手腕扭曲，一度驚傳中風，不過松哥透過好友否認傳聞，更繼續在微博分享自己的近照，跟朋友聚會、行山、吃喝玩樂，生活如常，但就沒有再接受幕前的工作。近日，劉松仁執導的舞台劇《利瑪竇》載譽重演，他跟王梓軒一齊接受無綫娛樂新聞台《Star Talk》的訪問，首次對主持人王鎮泉開腔回應自己的健康傳聞。

　　劉松仁透露《利瑪竇》首演之後已經希望重演，不過礙於疫情，最終延期4年，將於今年4月在香港文代中心大劇院再次搬上舞台。提到跟王梓軒的結緣，原來來自《華麗轉身》，當時王梓軒面對一場感情複雜的戲份，對手汪明荃急搵休息中的劉松仁幫手指導對方。劉松仁大讚王梓軒音樂方面很有天份，所以今次音樂舞台劇很快就決定邀他做主角。問到劉松仁會否參與演出？他說：「如果我有命嘅話...」

　　劉松仁跟杜琪峯老友鬼鬼，今次劉松仁搞舞台劇都有找他幫忙問意見，問到為何兩老友記不合作？他說：「佢本來叫我簽三年合約，我話唔好喇，我唔想冇咗個朋友，我諗我哋合作真係可能會鬧交。三年幾部戲幾錢啫？唔係錢嘅問題，犯不著冇咗朋友，唔係等錢使等開飯，等開飯就可以吞聲忍氣睇佢面口都應該，唔係冇飯食，佢又唔一定用我，我又唔一定要拍佢戲，大導演同大演員唔好互相撕殺，所以就從此唔合作！」

　　劉松仁指4年前執導《利瑪竇》時，驚覺自己丁點戲癮都沒有，甚至有恐懼。劉松仁說：「我唔拍呀喇，如果拍就唔矜貴，所以我決定唔再拍，電影都唔拍喇！」

　　王鎮泉問及劉松仁的健康情況，劉松仁不置是否，他表示：「總知人生係生、老、病、死，我哋無論邊個階段都好，都要活得精彩，要積極面對！我哋老喇，老跟住病，病跟住死，呢個過程唔可以或缺，我話畀自己聽，無論咩階段都要精彩，病都要精彩，死都要瀟灑，唔好好多牽掛。我就係抱住呢個態度去面對往後嘅路，唔可以因為去某個階段，唔好啄住某個病，覺得劉松仁好病、好悽涼，而唔記得佢拍咗50幾年戲喎！點解我要被你講我病咗？你唔會病咩？我會病，個個都會病呀啦！我希望大家係講佢病咗，但點樣去面對，呢樣嘢先值錢呀嘛！困難個個都面對，你點面對！」

　　前麗的花旦李影逝世享年70歲，有幕後人證實消息。據指李影日前於其加拿大列治文寓所跌倒，又婉拒朋友照顧，當地傳出朋友未能取得聯絡，上門時發現李影跌倒並神智模糊，於是報警將其送院，可惜最後不治。

　　身在溫哥華的藝人黃淑儀與李影相識近50年，證實對方在當地離世的消息，透露在當地時間25日下午二時左右收到電話:「我當時都好震驚，個電話係我弟婦打畀我，佢係李影嘅麻雀腳，好老友，佢話另一位藝人張惠儀當時喺現場，我即刻打畀張惠儀。」黃淑儀透露李影幾日前跌親但冇睇醫生，同朋友講只係扭傷，但就拒絕探訪亦唔肯出門，朋友就將煮好嘅飯餸放喺佢門口。黃淑儀指自己原本約李影明天見面，尋日打畀對方都冇事。

左起：劉松仁、李影與黃淑儀

　　黃淑儀表示直到今朝有朋友致電李影但無人接聽，於是登門探訪，見李影躺於床上並表示身體不適及想嘔吐，朋友便召救護車及聯絡張惠儀，張惠儀到場時見到李影仍然精神。救護員到場時即時為李影做逾半小時心外壓，但搶救無效，李影兩名女兒即時訂機票由香港飛溫哥華為母親處理身後事。黃淑儀指本來由李影家人公布，因為李影一家都好低調，但件事已經傳到香港朋友圈，而佢自己都算係第一身了解情況，所以回應事件，免得愈傳愈亂。

　　黃淑儀表示心情十分難過，又指李影一直壯健冇病痛，冇諗到會突然離世：「可能佢唔想麻煩朋友，所以就話自己冇事。」黃淑儀大讚李影為人好，超級順得人：「我哋成日講笑，話佢仇人都都可以打麻雀，佢係唔記仇嘅人，係個好爽嘅人。」李影一直於香港居住，本月14日回到溫哥華，原定下月更會為當地的兒童醫院演出。

　　李影參加麗的電視訓練班後加入娛樂圈，於麗的電視主演過不少劇集，成為麗的當家花旦之一。同期同學包括有韓馬利、麥當雄和劉松仁，她先後拍過《星星月亮太陽》、《半生緣》、《浪淘沙》、《大白鯊》及《人在江湖》、《親恩情未了》等劇集，李影曾與劉松仁拍拖7年。劉松仁對於李影過身表示不知情：「我哋一直有聯絡，但冇聽過佢有咩病。」他稱要打探一下便匆匆收線。

　　李影1984年跟相戀數個月的商人沈海鍵閃婚並移民加拿大，可惜這段婚姻維持8年便離婚收場，李影獨力照顧兩個女兒，其中一名女兒沈穎婷參選2004年港姐入行。

　　其後曾李影回流返香港拍劇，不過產量不算多。已經有一段時間未有幕前演出的李影，上年上映的電影《12日》中亦有客串演出，於婚宴中扮演奶奶角色，雖然歲月在李影的身上留有痕跡，但反而令她增了幾份女人味，星味不比當年遜色！