世事政情

　　楊千嬅早前50歲生日，人生到達半百的大日子，她選擇與歌迷會一起度過，舉辦近千人的《MEET YOU AT THE HALFWAY MINI CONCERT 生日限定》大派對，除了選唱了不少平日少唱的歌，讓歌迷驚喜萬分之外，亦把自己這幾年的經歷及心路歷程公開，用作鼓勵所有愛她的朋友，希望大家於人生面對困難時要學識不要放棄自己，對話真情流露令歌迷們大為感動。

　　早前千嬅正日生日，在香港「東蒲」搞生日派對，她說：「我係香港出生長大，我一早決定50歲一定要喺呢度同家人同朋友過，好多謝你哋陪我過呢個生日，我真係冇諗過自己唱歌會唱到半百（歲），除咗感恩、感激，呢段咁長人生路程，回頭望係非常精彩，亦從冇遺憾。今日嚟得嘅朋友，我知你哋已經係我家人，感謝你哋多年來選擇咗我，聽住我嘅歌同我一齊成長， 我好耐冇喺香港表演，我唔想喊呀，喊完鼻涕又變痰，唱唔到好唔抵。」

　　千嬅獻唱出《偷生》、《嬅麗緣》、《我是羊》、《稀客》等歌曲，主動跟歌迷傾偈:  「呢幾年你哋過得好嘛？我知大家走過唔同經歷，都一定係非常之唔容易，我自己都經歷咗好大考驗，相信大家都目測到我嘅過程，感謝曾經好擔心我嘅朋友，你哋唔駛擔心我，我過得好好！係，過程係好唔容易，但係我終於知道，楊千嬅出生就係要學識解決問題，我發現我回望人生，我都係笑比喊嘅多，都係開心嘅人生。 過去嘅日子，經歷高山底谷，得到好多養份同智慧，我今日好想分享畀大家聽，之前嗰幾年其實都幾難過，你見到我唔係好出嚟，匿埋咁耐，時肥時腫，被人影到『畸形樣』，哈哈哈......新時代網絡風暴係一個好震憾嘅經歷，我乜都遇過晒， 幾十歲人我同自己講，有咩未見過？ 真係低處未算低，當我經過呢段日子，我發覺自己真係好強大，今日好感恩，上天比我係有力氣時，經歷呢個浩瀚人生。」

　　她又真情流露同大家分享情緒問題，「低潮嘅情緒係無色無味，當人負面時，要容許自己唔開心，我都試過死頂，唔想被人知我唔開心，刻意扮開心嗰陣，嚇親好多人，大家好擔心我，嗰一刻我又迷惘又唔知發生咩事，好困擾。尤其見到自己啲音樂、CD碎到一地都係，個心好痛，我連朋友都唔敢再關注，你鬧我冇問題，唔好鬧埋我啲朋友，諗住一個人撐唔好害人，曾經我覺得好恐怖，所以首先選擇熄機，唔好睇唔好理，唔好聽，休息啦，畀自己時間消化。我點企得番起身？係你哋（歌迷）畀咗好多力量我，你哋好多人PM我，畀好多鼓勵我，其中有一個歌迷，佢將我多年來上台講得獎感受的說話，剪咗幾分鐘片比我，好似成三分幾鐘，我一路睇一路喊， 原來我同人講過嘅嘢，曾經幫到人，最後今日幫番我自己， 我發現困難時只有係自己救自己，唔好放棄自己。今日我想同愛我嘅人講，希望你記得，面對任何困難，記住有心跳就有希望，唔好放棄自己。我希望你哋可以愛自己，要有健康身體，永遠面對挑戰最高難度時，加油提升自己嘅能量，遇到最壞最唔開心嘅事，都係可以逆轉， 入得呢個會，有番咁上下POWER，我進化你哋同我一齊進化，一齊進步！呢個係『千嬅群英會』嘅精神，我五十歲都做到，你哋咁後生，你哋可以活得更精彩！重點放喺當下，記得所有人對自己的美好，好好珍惜愛你嘅人 ，照顧好自己，咁先可以繼續做自己想做嘅事。 大家聽住我嘅歌，就可以似我保養得自己得咁好。」全場歡呼拍掌時，千嬅再笑指，「我唔係話保養得好個樣，我係話呢度，個腦。」大家又即報以熱烈掌聲。

　　講心聲期間，千嬅多次死忍眼泛淚光，最終忍不到爆喊，她搞笑大叫，「死啦，化咗好耐㗎隻眼妝，我呢個水瓶座好跳，唔知自己講緊咩啦，你自己砌番埋佢啦。人生無去無來，音樂係有來有住，我會努力做更多新作品，唱多啲歌，希望可以繼續鼓勵到你哋。世界很大，人好渺小，我哋要好好活好每一日 ，將好嘢互相分享，希望大家心中可以充滿愛！」歌迷向她大叫「我愛你」，她則幸福笑著開心回應，「多謝你！」聚會來到最後，大會推出大生日蛋糕，全場同千嬅合唱生日歌，活動完結，歌迷仍留在現場不斷呼喚楊千嬅，不願離去，不停大叫安歌安歌，千嬅就跑出去同大家講，「真係唔可以留啦，個場係十點關門，我生日剩番兩個鐘，你哋俾我同屋企人同朋友過啦。」歌迷才不捨離開。

　　黎芷珊2012年於萬千星輝頒獎典禮憑節目《最佳男主角》奪得「最佳節目主持」獎，而上得佢節目嘅都係巨星或者話題人物，因此唔少人都對節目《芷珊約你》有所期待。不過日前芷珊嘅表現就被彈到一棟都冇，唔知睇咗嘅大家又有冇同感呢？

　　黎芷珊主持嘅清談節目邀請到嘅嘉賓粒粒皆星，一連8集嘅《芷珊約你》就約到溫拿、張敬軒、草蜢、王嘉爾、許志安、陳慧琳以及楊千嬅做嘉賓，見到呢個陣容都不免令人有期望，其中許志安更加係首次於專訪中提起「安心事件」；而楊千嬅亦係首次就被fans唾棄剖白，然而訪問內容令到唔少觀眾都大失所望。

　　許志安節目中提到「安心偷食」時表示：「呢個傷疤會跟住我一世，成為提示我做人嘅方向。」而芷珊未知係咪為咗保持二人友誼，可以話係未點到已止，冇再深入問落去，網民都大彈訪問「內容唔入肉」，睇完好似睇咗陣風咁。另外，黎芷珊亦活用徐子珊《My盛lady》中教嘅港女必勝回應大法，經常都以「真係㗎」對應各式各樣嘅答案，以不變應萬變，就算你冇聽人講咩，咁樣答都一定冇死，黎芷珊只係爭在未問埋「咩嚟㗎」。

　　有網民睇完楊千嬅一集， 表示令佢更加討厭楊千嬅，更大插芷珊所有問題，都只係為方便受訪者「讀稿」，同時方便佢討好受訪者，更指佢訪問技巧，如同「搵紙刀鋸牛扒」，令觀眾失望：「你想觀眾點樣？睇你phonebook（電話簿）有幾星級？不要這樣啊，不要學人成為令觀眾失望的人啊。」網民同時指製作團隊以《東張西望》「何伯何太」思維譁眾取寵，刻意用啲楊千嬅喊得肉酸嘅畫面，反而唔去令更內容實在。另外，黎芷珊每集固定「畀一個小秘密我」環節都被嫌棄，可能大家都真係冇秘密，明星們分享嘅秘密都真係好「小」，小秘密到去阿婆都唔想知嘅程度，完全無法為節目最後帶嚟爆點，令人以為有高潮卻只係帶嚟更大嘅失望。

　　黎芷珊擁有四分之一葡萄牙血統，黎芷珊姑姐為黎婉華，是已故賭王何鴻燊元配。黎芷珊參與歌唱比賽時被當時著名的音樂人安格斯發掘，1984年初與陳樂敏及陳慧嫻一同推出首張唱片《少女雜誌》，其後在姑丈何鴻燊安排下加入無綫電視，成為兒童節目《430穿梭機》及《閃電傳真機》主持人。離開兒童節目後曾於多個資訊節目擔任主持，包括《香港早晨》、《K100》、《城市追擊》、《東張西望》、《七百萬人的傳奇》等，亦曾為娛樂新聞台擔任主播。 2012年黎芷珊主持《最佳男主角》嶄露頭角，觀眾們方知佢人脈極廣，天王巨星都非常畀面佢做嘉賓。