世事政情

　　【晴報專訊】由ERROR成員郭嘉駿（193）及李炘頤（Alina）主持的ViuTV節目《Fashion Killer》現正播映，二人在節目中招募最強造型師，來一場時裝界大比試。身形高大的193坦言雙腿太長，買褲經常「吊腳」；而在ERROR隊友中，他直指梁業（肥仔）衣着要「大執」，更講笑指肥仔需要斷骨增高。

Alina與193同樣熱愛時裝，主持《Fashion Killer》最適合。

　　《Fashion Killer》經過早前海選及香港選秀，最後從幾百位參賽者中，挑選最後十強參賽者。郭嘉駿說：「大家有唔同意見，又有拗撬，又會搞到有人喊。」原來十強參賽者中，有人來頭不小，193說：「最後呢十位參賽者，當中有兩位前輩級參賽者好熟悉fashion，有一位仲曾經幫天后梅艷芳襯衫，嗰年我先一歲，所以我都唔敢批評前輩。每個人對fashion嘅感覺唔同，我都會尊重。」193與李炘頤笑言拍攝時乘機自肥，邀請參賽者給予服裝意見。193說：「我希望幫到參賽者入行，始終做fashion或者設計真係唔容易。」

肥仔最需要大改造

　　回想自己的時裝歷程，193與Alina異口同聲表示曾經歷時裝車禍，193自爆當年曾仿效Janice Man（文詠珊）戴貨車帽，令本身已高人一等的他再「增高」20厘米。他又說：「同埋以前好鍾意戴膠框眼鏡或者木製眼鏡，覺得自己超潮，但依家睇番就覺得好娘。」至於哪一位藝人的衣着需要大改造？193即說：「梗係肥仔（梁業）啦，佢最好加長對腳，斷骨等啲骨再生番出嚟，但佢跳舞㗎嘛，一陣跳唔番點算！不過如果佢有1.8米咁高，我哋（ERROR）到時就唔使再係企鵝排法，平時企喺隔籬係保錡（吳保錡），以後變咗肥仔，個個都咁高，哈哈。保錡同阿Dee（何啟華）身形比較正常，但肥仔實在太出眾，就算唔睇樣，都好易認得出佢嘅身形。」193搞笑建議肥仔多穿闊腳褲，能完美遮蓋鞋子，方便加添多個鞋墊，拉長身形比例。

193笑指肥仔（左）的身形太突出，設計形象有難度。（IG圖片）

　　193與Alina同樣熱愛時裝，參加《全民造星III》入行的Alina，透露在《造星III》決賽當晚穿上自己設計的紅色戰衣作賽，193聞言大感佩服：「嘩！估唔到真係臥虎藏龍。」而入行前曾任時裝買手的193，笑言因員工能以半價購物，所以經常「使凸」買衫，「（買衫）畀公司啲錢仲多過自己份糧，雖然呢一、兩年的確少咗買衫，但最近有一個自己好鍾意嘅品牌就快結業，所以一口氣買咗好多新衫返嚟儲。我聽過呢個牌子一件好多年前、本來值幾千蚊嘅衫，依家已經炒到成20萬，不過我買嘅係新款，可能要等幾十年後賣出去先值錢。」

Alina在《造星III》決賽穿上親自設計的戰衣參賽。（資料圖片）

李炘頤與男友Stanley鬥買鞋

　　二人又表示最愛買鞋，193家中更有一座「鞋山」，「因為啲鞋太多，多到求其掟埋屋企一邊，又唔想留鞋盒，搞搞下變咗一座山。每次出門口前最花時間就係搵鞋，試過喺中間拎一隻鞋出嚟，結果成座鞋山冧咗，哈哈！」而Alina則會將寶貝靚鞋井井有條放在「鞋牆」，她笑指同居男友、MIRROR成員邱士縉（Stanley）同樣愛買鞋，所以二人各佔「鞋牆」一半空間，相當公平。提到193身形高大，他直認買褲尤其困難，「喺香港買褲全部都吊腳嘅，要買歐洲牌子先至着到上身。」Alina聞言表示以前不覺得要花錢投資靚褲，現在已改變想法，「因為一條好靚嘅褲好難買，所以我見到好鍾意嘅褲，就算幾貴我都會買。」早前她飛往日本，在日圓貶值下盡情購物，結果豪花六位數字，笑言返港後要努力賺錢。

193與Alina大讚十強參賽者有實力。（資料圖片）

　　【晴報專訊】ERROR成員郭嘉駿（193）最近推出今年首支單曲《以為只是沒送花》，新歌以其情史為藍本，紀念他與前女友的一段情。近日ERROR主演的電影《陰目偵信》票房未如理想，193更爆出「謝票非義務」言論，疑拒再謝票；前日已回歸謝票場的193，解釋並非拒絕謝票，又認為事件引起網民對電影的關注，反而錯有錯着。

前日，193再次現身《陰目偵信》謝票場。（IG截圖）

　　郭嘉駿請來ERROR隊友梁業（肥仔）一起去台灣，與當地女神林莎和李恩菲拍攝《以為只是沒送花》MV。提到以歌曲紀念舊情，本身開設咖啡店的193透露，原來開舖的念頭，也是受前女友影響。他慨嘆以前不懂得情趣和浪漫，不懂閱讀伴侶的心意，跟對方拍拖四、五年，最後分手收場。193目前正籌備下一首新歌，但時間倉促，身體又欠佳，「一個月前，我無啦啦發燒，好攰又頭痛，跟住有鼻水、痰，過多幾日開始咳，仲有血，我咳爛咗喉嚨，完晒工作先去睇醫生，醫生話我有病毒。我人生第一次連續食10日、兩種唔同嘅抗生素，食完都未好，依家睇緊第三次醫生。」

193邀得台灣女神林莎在MV中飾演前度女友。

新聞當作逆向宣傳

　　早前，193為主演的電影《陰目偵信》謝票後，在粉絲Telegram群組發言，表示收到騷擾訊息，又指謝票並非義務，揚言拒再謝票；而古天樂被記者問及事件時，表示「好忙就唔好勉強，唔好捱壞身體」。193說：「古生講得啱，謝票係一定要做，因為可以同觀眾交流，之前謝票我都好開心，可以同觀眾分享我嘅角色設計。又學古生話齋，量力而為，前幾日我都出咗IG story，我話『去到就去，我都唔夠膽應承大家啲咩』，（如果）錄音、拍嘢超時…我嚟唔到，唔想大家失望。」

　　會否擔心事件影響形象？或電影公司不再找他拍戲？193說：「我當時唔係咁嘅意思，嗰段說話放喺Telegram群組，諗住同fans講，因為有人問我點解唔去謝票，所以先解釋番唔係義務。當刻我都諗係咪要delete（刪除）？我知言論上係講錯咗，可以修飾，可以靚啲…但經過『燒畀你』事件，知道我嘅Telegram有好多間諜、hater，所以我唔delete！好定唔好嘅新聞，對我嚟講都係新聞，呢單新聞我見到有hater鬧我，亦有fans支持我，同埋去到第二、三日事件發酵，終於有人討論番《陰目偵信》呢套電影，咁神奇？」他事後亦有向電影公司解釋，自己並非拒絕謝票。

呃梁業入股開食肆

　　此外，提到最近肥仔有份投資的兩間食肆先後結業，193抵死說：「我係咪要多謝肥仔？我間Cafe成日被人話呃錢，我發覺逆向宣傳，只要講到超差，啲人就愈想去試！肥仔單新聞出咗之後，好多人都讚我間Cafe，咦！我要叫肥仔入股，我有安慰佢，佢個形象好啱做飲食，我諗住下一間呃佢入股，就算蝕錢，佢都會掟錢出嚟，佢好有錢，所以佢唔介意蝕少少，賺錢咪一齊賺，都幾開心！肥仔依家心情OK，錢財身外物，你諗下佢幾型，執咗兩間都仲有錢，日日買名牌，希望佢快啲同我開多間，或者我哋四兄弟開一間，我哋三個呃肥仔錢！」

193笑指肥仔有錢，提議ERROR四子夾份開食肆。（資料圖片）