世事政情

 　　【晴報專訊】男團MIRROR成員江熚生（AK）、楊樂文（Lokman）、王智德（Alton）及邱傲然（Tiger）齊齊演出ViuTV新劇《繩角》，飾演職業拳手的四子開拍前跟隨正統訓練，又操fit身形拍攝打拳戲；不過爆肌身材易操難keep，AK坦言目前已比拍攝時消瘦不少，只有曾是健身教練的Alton力保肌肉。

（左起）Tiger、AK、Lokman及Alton大擺搞笑打拳甫士。

　　江熚生、楊樂文、王智德及邱傲然在《繩角》中飾演職業拳手，眾人算是有武術底子，Tiger從小習武，又曾奪不少武術獎項，但他說：「以前學嘅功夫同今次拍劇嘅西洋拳，完全係兩碼子嘅事。」Lokman亦有習武經驗，「我以前學跆拳道，考到黑帶一段，最高級可以去到九段，但上到嗰個階段就已經唔係『打』，而係要寫文。」他自言中學時因愛上跳舞，後來選擇跳舞而放棄跆拳道；而AK拍劇集《打天下》時學過空手道，亦曾是跆拳道初學者，「但我唔識分左右，打唔到四方拳，所以提升唔到。」問到在劇中最好打的成員是否飾演日本拳王的Alton？Lokman笑說：「劇中最好打係Alton，現實中都可能係，不過我哋無人敢證實，亦無興趣知，哈哈！」

劇中，拳館老闆梁祖堯睇中AK的潛質，栽培對方成為職業拳手。

Alton戲裏戲外最好打

　　劇中有多場拳賽場面，AK最難忘與Lokman在擂台上對決的場口，拍足四晚通宵。Lokman表示︰「呢場戲要一shot拍攝，之前花好多時間排練招式，因為導演希望喺兩、三個take之內完成。雖然拍得好辛苦，但大家都拍得好開心，拍完後放下心頭大石。」Alton大讚兩位好兄弟的拳賽場面充滿節奏感，令他與駱振偉（Thor）接着拍攝擂台戲時，發揮得更投入，士氣亦提升不少。至於Tiger雖然有操肌，但他不但沒有打拳場口，連騷肌鏡頭也欠奉，「雖然我喺劇中係三師兄，但主要靠把口，格鬥就無我份。」不過Lokman指Tiger的角色十分亮眼，不但串連各師兄弟的關係，亦是眾人之間的催化劑。

Alton飾演日本拳王井澤魂，是全劇最打得之人。

　　四子拍攝期間要長時間保持fit爆身形，Lokman坦言，最辛苦的是拍完打拳戲後回家，雖然十分疲累，但仍要繼續進食增磅及健身，才能維持身材。至於曾是健身教練的Alton，笑言拍《繩角》是他入行以來最fit的一次。問他們目前的身形，是否依然媲美拍劇時？AK自言拍攝時的大隻身形已不復見，「我瘦咗好多，變咗鋼條，少少（肌肉）仲有嘅，但流失咗好多。」至於Alton笑說︰「我依家算係合格範圍啦。」而Lokman形容自己身材只在合格邊緣，Tiger則搞笑說︰「我直頭要重讀呀。」三位兄弟聞言即哈哈大笑。

Lokman身形向來瘦削，要努力進食增磅及健身。

 AK望認真學打拳

 　　至於誰在劇中打得最「甘」？三子有默契地齊齊指着AK，AK表示︰「其實我同Thor嘅對打場面真係好甘，因為我嘅角色由零開始被人捉去拳館學打拳，所以過程中要拍好多打拳戲；Thor真係好勁，睇住佢嘅身形變化，佩服得五體投地。」AK指打拳是非常好的運動，將來若有機會，他希望認真學習打拳。

Tiger（前左）雖是拳館師兄，但無份拍打戲。

　　MIRROR隊長Lokman（楊樂文）宣布與女友分手，成為MIRROR中「尾二」一位「失守」隊員，唔少人都覺得非常震驚。MIRROR隊中僅剩Stanley（邱士縉）一位仍然同《全民造星》已經拍拖嘅女友一齊。

　　Lokman剛剛突然於Instagram限時動態宣布分手消息，Lokman言辭間表示當中似乎已經一段時間「掙扎」：「我們已經分開了一段時間，相隔了一段時間才公布，是因為我們也想確認一下事情，確認一下對方，在一個我們都舒適的情況下向大家交代。」

　　Lokman表示同前女友關係依然良好：「分開是和平的，關係是舒適的，我們也已經踏上成長的路上，更加了解自己和對方。十分感恩一起走過的日子，我們之間只有滿滿的祝福和感謝，希望大家給予我們空間去成長。過後也不會在公開場合對這段關係作出任何回應或討論，希望大家明白與體諒！我們感謝對方！感謝各位！」Lokman前女友甄吳露茜（Luxi）同時都發同樣聲明。

　　Lokman同Luxi拍拖七年，上年曾喺社交平台上載花束照及留言「「今次掂晒啦老豆（竇）！」，即時引起求婚成功嘅揣測。不過Luxi之後出席活動時就否認有關傳聞，稱Lokman只係「520」送花， Luxi當時表示結婚冇壓力：「結婚不嬲都係靠衝動，所以唔會plan幾年之後結婚，同埋大家都仲後生。」然而，Luxi日前去到台灣澎湖散心，早露分手端倪：「聽說看海會讓人心情變好。謝謝澎湖治癒了我，然後我就曬傷了。」然而，二人拍拖期間一同飼養三貓一狗，暫時未知去向，恐怕都會成為「單親家庭」。

　　MIRROR 12子唔少入行前都有已經有穩定女友，不過都喺入行後相繼分手，現時只剩Stanley一個仍然係同「元祖」女友一齊。Stanley與女友Alina拍拖七年感情穩定，熱愛潛水嘅Stanley日前透露，諗過將來舉行水底婚禮，奈何女友不愛潛水，所以打消念頭。而Alina早前都喺電台訪問分享與Stanley相識經過：「我哋係大學讀書時一齊喺主題公園工作認識，識咗十幾年，有次拍廣告撞番，見番一年先一齊。」Alina表示Stanley人氣急升，拍拖都冇壓力：「佢近排忙啲，溝通時間少咗，但感情又再昇華咗，學識點溝通先可以維持到一段好嘅關係。」希望呢一對可以打破MIRROR分手魔咒。

盤點MIRROR分手魔咒

Frankie

　　MIRROR顏值擔當Frankie出道前是一名專業舞蹈員，與前女友Hei拍拖13年，可惜上年兩人就在IG限時動態出文宣佈分手，Frankie近日更被指原來一早偷食現任女友Christy，令一眾粉絲感到心痛。

Edan

　　Edan（呂爵安）於2018年參加《全民造星》時，與Stephanie仍屬情侶關係，後來女方出帖文，表示拍拖三年的二人和平分手，會支持Edan繼續去追夢：「細個以為咩唔夾呀timing呀全部都係移情別戀嘅藉口，但理智與感情角力左（咗）好一段時間，我都agger（贊成）朋友會係我哋目前最適合嘅關係。」不過之後Stephanie曾暗示因為男方偷食導致分手。

Jer

　　Jer（柳應廷）前年被指與拍拖5年女友Kelly鬧分手，皆因網民發現Kelly於IG取消追蹤了阿Jer，而阿Jer亦承認自己正與Kelly冷戰中，現在阿Jer的IG也沒有再追蹤Kelly，事後二人宣布分手，而回復自由身嘅Jer早前於MIRROR喺英國開騷時都有於IG結識下異性。

Ian

　　Ian（陳卓賢）入行不久就在ViuTV 劇集《無限斜棟有限公司》中，與模特兒盧慧敏（Amy）撻著愛火，兩人愛得低調，甚少放閃，不過Amy曾在IG發文指「也願每一個人可以找到一個一起瘋狂，笑著世界瘋狂的人」，Ian則更回覆：「I think I’ve found one」。不過前年二人和平分手，結束兩年情。